Read Chothe Naga ROUPHUH 10 Bible Online

ROUPHUH 10 - Chothe Naga bible

ROUPHUH 10

¹Chuna keina adang arat ane wanrui akha wanram hei thou tumma jung ri inge amo ha shumphai na hlum meh, akha chu alu wa hujing hujang na jeilea mamai shun ka siemni hekti ae akha chu ma kae ngei kom sermei inncho ngei hek ti ae.

²Makutta ahongsha abai ajul ehoi ae amona makae Chungtieng na tuipi len chunga shi ae, akha chu uitieng akae na kang palla shi ae.

³Hana sora ram tara hekta aring shanrol la kok shukkae, amo na makok shu nutienga luri tara sari hana ko arol ringa shange.

⁴Mani na trongthou shelen kei na jiekka shi tikta ae inge Chutiweta wantienga sharol akha na rilha thei inge, “Luri sari ngei na rilha thuppa shi oh jiekka shi no oh!”

⁵Chuna tuipi len akha chu kangpalla ngirra am kari phur wanrui hana wanram tienga changtiengpa akae ha dom meh.

⁶Akha chu atreem nei no ringa am Chungthieng awar, alei akha chu tui pilen, hana shunga am eheilim pata shempipa minga saro ei sho ae wanrui hana rillea, “Atai eko am mang ni jo weh.”

⁷Chutiweta wanrui sari hana matumpet ngei tum jui ja Chungthieng na thiempu ta dangpi phur hekta amo na athup ma ae ang ha ae shai jo ae.

⁸Chuna wantienga tronga am shanrol hana lea ah keita ril shier ae, “Thingo akha chu tuipi len akha chu kangpal chunga ngirra apa wanrui kut chunga am ahong sha abai ajul ha lah oh.”

⁹Kei na thingweta wanrui kolla asin abai ajul ha keita pek ranga nie inge amo na keita rillea, “Nahi laa weta bakko, nawon shunga thur ange chuti weta namurra chu huistui hekta hlun mange.”

¹⁰Keina makut chung hei thou wa ashen abai ajul ha laa weta bakkinge hana kamurra huistui hekta hlum ae chuti weta kei na kowol jui ja chu kawon shunga thur sho ae.

¹¹Chuna keita rilpi ae, “Woiha lea ah nang na Chungthieng marou hi jat changlimna tronglim chang honna akha chu Rengpa ngei ta sui thingo.”