Read Chothe Naga ROUPHUH 11 Bible Online

ROUPHUH 11 - Chothe Naga bible

ROUPHUH 11

¹Kei ta abib rang mal kai mal akha pe so weh akha chu hitta rillea, “Thingweta Chungthieng mokna inn akha chu shaiphung ha hih oh.

²Chutiweta ruishang awaa ngei ha chu hih no oh, maram chu jat adang taranga pek sha ae, manina atieng hupi chunga hla somly ani kae ah tro ange.

³Keina karanga ngir ani borapuntit sheng weta hla ange akha chu mani na nalei rungni lashing akha lea rajani shamruk shunga Chungthieng trongshan sui ange.”

⁴Meelungir ani ha chu shimlei Rengpa maikunga ngir churuphor thingkung ani akha chu photol ani ha sha ae.

⁵Atu jong akha na manita mangpi tikti ae jui ah, sarmei ha mani mur hei thou shukweta manita anda ngei ta mangpi ange, hiekta atujongna manita mangpi jang ngei ha thattange.

⁶Mani na awan har weta Chungthieng trongsha shamlei apha shunga ru shur no rang ae nea ha manita pe sho ae. Mani ha tuichir tuilim ko athee wulpi rang anea ko am meh, mani na shimlei chunghi reiweta mani dit rai eja lim malunna shukpi rang ane kom pe showe.

⁷Mani na ahra trongshan ril shu jaija atreem amlou kum shunga shuk ramsha hana mani hitta shullange. Amona mani ta nea ange akha chu manita thattange.

⁸Chuna mani pum ha alok hupi hulai lamma mani Rengpu ta tara that na ah, tulla am mange. Na hupi hata dangna ming chu Sodom anolea Egypt ti ae.

⁹Jatlim Changhonna mee ngei, malmashi adang, adangei tronglim, akha chu ringa am kutshem eja na mani pum ngei hata rungni inthum lea ahui annange akha chu manita phum ma ngei pi an no weh.

¹⁰Shimlei chunga mee ngei na ariem mange maram chu manui ani hi that sharukka. Mani na kha lea kha kuthul pe hlakka ariem reen nei ange maram chu na rouphupa ani hina malmashi chunga ehekta aol shukpi ae.

¹¹Rungni inthum lea ahui nutienga Chungthieng hei thou shuk aring ringchang huthal na mani shunga lut so weh, akha chu mani na ngir thou so ae manita ri lim na atri ah hirre.

¹²Chuna rouphupa ani hana wanram tienga manui ta ril shanrol thei ae. “Hina kalla hango!” Mani ta anda ngei na thir lei ah mani ha wanram ma shumphai shunga thing so weh.

¹³Apha hana makka ehekta akal lingnu nukkae, hupi ashom mangpi so ae akha chu mee lashing sari thatte, limma am mee ngei ha atri so weh akha won Chungthieng malok mashei ha dom so weh.

¹⁴Woini shunapa atri alou ha shu so weh, chuti weta woithum shunapa atri alou ha ranga phao shai jo weh!

¹⁵Wanrui sari na hana mani tumpet ha tum sho weh, wanram tinga aring shanrol ngei na hitta rillea, “Shimlei chunga pal ranga arat tha atun chu ani arangpu akha chu sanpi pa tah so weh, akha chu amo na atreem am no wa pallange!”

¹⁶Chungthieng maikunga mani phomlu ah onga am ulien shomni inly ngei na mani mai ha athui tienga bu ah Chungthiengta mokka,

¹⁷rillea: “Arengpu Chungthieng arat athei pa amatienga kom atun na kom nang chak sha ae kam na ariem ma dom munge maram chu nang alok narat ha choija pal so che.

¹⁸Jat adangei na atripi mani lungshat na shi so weh, maram chu nalungshat ha tung so weh athi sha ngei ta routreem ang apha asowe na shukngei, rou ma phu ngei akha chu namee lim, nangta atri ajak lim alok akha chu asin lim ta amant pek rang apha ha tung so weh. Aleiram hitta mangpi ngei ta mangpi rang apha ha tung so weh.”

¹⁹Wanram Chungthieng mokna inn ha hong so weh akha chu roungir hlak thuwl ha hana riso weh. Hana huchamplak luri tara ah lingnu nukka ehekta arat arel deng so weh.