Read Chothe Naga ROUPHUH 12 Bible Online

ROUPHUH 12 - Chothe Naga bible

ROUPHUH 12

¹Hanapa chu alok atripi ringailou akha wanramma shuk so weh, namei akha na semni ta punpai hekta pai ae, hana hla na makae thuija, akha chu arshi ashom ani na malubur chunga am meh.

²Nameina ha nao don ang nei ah akha chu nadon ranga aol ana pha ah ouwa am meh.

³Adang atripi ringai lou shukkae wanram ma.

⁴Alu sari aki ashom am akha chu alu sari hana chunga reng lubur bur alok ashan shantai akha shukkae. Amei hana wan arshi sharuk inthum shunga akha kai weta shimlei chunga junna hla so weh. Hana namei hana unga ha don weta bak ranga nao don nangnu maikunga ngirra am meh.

⁵Akha chu amona spa akha don so weh. Amo na jatlim ta thir molla sum rung anga ae, akha chu amota hitta Chungthieng mapham lu amna ah unga hatta ruikal so weh.

⁶Chungthieng na nameinu matarang shem ma shi amunt ram rukka tanna thing so weh. Amo ta amunt hana rungni lashing akha lea riha ni shomruk shella runga shi ange.

⁷Chuna wanramma ral shuk so weh maikel akha chu mawanrui ngei nashantai akha chu mawanrui ngei ta ral ae so weh.

⁸Chutiweta shantai ha maishi pha ah amo akha chu mawanrui ngei ha wanramma shetta am ngeipi nijo weh.

⁹Akha chu shantai lospa arul tarpu ha, Dijabol akha chu Saitan ta kok, shimlei lim la hungthei mitpu akha chu mawanrui hitta aleiram ma junna hla so weh.

¹⁰Chutipa chu keina wanram hei thou ae aring shanrol ril ha thei inge, “Atun chu Chungthieng aring kaetlo ha tungsowe, atun chu Chungthieng na Reng akha changa ma ae nea ha ripiso weh! Atun shanpi pa na ma ae nea ha ripi so weh! Maramchu Chungthieng maikunga ngirra am akha ha akha chu ashoun ajan lim ma ani uleanao ngei ta neinunt pepa ha wanram hei thou junna hou so weh.

¹¹Ani uleanao ngei na rul ha mani chunga nea so weh kelmo theesan jarra akha chu mant na adiek rousham hana jarra akha chu mani na mani ringchang phao thi ang apam am no weh.

¹²Chuna wanram nangei na ariem jui oh akha chu hana am nangei lim! Chutiweta eja ah atri pi meh aleiram akha chu tuipi lin taranga! Maram chu hra Saitan nangei am na tum jung so weh akha chu amo ha alungsha na shihakti ae, maram chu amo na dange ti chu mataranga apha hi atante chak am so weh.”

¹³Shantai hana amo hi aleiram ma junna hou showeti hi dang pha juija amo na spa don nameina hatta achok arel thou so weh.

¹⁴Nameinu hata alok rammu hina ahla ani pe ah amatienga ma am na ram rukka jung thing ranga akha chu shantai na aol ana pek hi phano ranga akha chu amunt hana akum inthum lea ahui amota runga am ranga thing so weh.

¹⁵Namei nu ha tuina choija thing ranga shantai na mamur hei thou wa tui pilin shukpi so weh.

¹⁶Aleiram na nameina ta sanne ti chu amo na abau wa shantai murhei thou shuk tui pilim ha amo na rol so weh.

¹⁷Shantai ha ehekta ano namei nu ha tla ano hung so weh akha chu namei nu hana atu ate Chungthieng ril jui akha chu Jisu ripi phur adiek lim ta ngoiringei ta shul ranga thing so weh.

¹⁸Chuna shantai hana tuipi lin hou wa ngirra am phur so weh.