Read Chothe Naga ROUPHUH 18 Bible Online

ROUPHUH 18 - Chothe Naga bible

ROUPHUH 18

¹Hina nutienga keina wanrui akha wanram heithou tumma jung ri inge. Amo ha alok ane choi ae, akha chu made mawar na aleiram lim warre.

²Amona shanrol ringa au weh, “Alok Babylon nu ha treem so weh, hana chu amota dejabol akha chu thieng lou muihla ngei na mallunna anna am meh, thienglou eja lim akha chu atierpi awa ngei na mashunga ringa am meh.

³Maram chu jatlim ma woklou pum na dit akal matuisik hana ruisowe. Aleiram arengpu limna amo hitta vokno tullu lu sowe, akha chu shimlei chunga ajen theileng thing apa ngei na pum na dittienga naha, naha lokka hang so weh.”

⁴Chuna keina wanram tienga adang shanrol khana ril, theiphur inge, “Shukjou oh kamee ngei oh! Makol heithou shukjou oh! Mapak hana nang to no oh, amota akang lak pha rang hana nang tol no oh!

⁵Maram chu mapak ngei hana honna thangwan hekta wang so weh, akha chu Chungthieng na mahrat nolim ha ngeithei ao.

⁶Nangta ae hekta amota ae oh ma ae phur ta lella nang na ae oh, nataranga enrang shem hatta lella woini shukka lokka enrang mawonshang shunga shi oh.

⁷Eja ah amo na matakta domma akha chu shalet phur ha, hahekta hatta makhai aolana pe oh. Maram chu malung shunga rillea: ‘Kei chu Rengnu changa onge! arongnu nonge, etikka ko ningshi ninghrul am mang nonge!’

⁸Hina rouram sharukka nahani chu amo na aol ana rai na machunga rei tuk kange, rai eja, aol ana akha chu butang jutang pha ange akha chu amota sarmei shunga hollange, maram chu amota routreem pa Arengpu Chungthieng amo ha ene nea pa ae.”

⁹Alei ramma arengpu ngei amo hitta vokno pum na dit ae ngei na, amota sarmei kan meihut ha rijui ja mani na hupi chunga an weta trap pange.

¹⁰Maol ha atri jarra mani na aram lah ah ngir weta rillange, “Atri pi ae! atri pi ae, alok hupi, Babylon, alok hupi nang hi oh! Maram chu apha akhate shunga akang lah ang wa so weh!”

¹¹Alei ramma ajen theileng thingei pa na ko trap pange akha chu amota thitah ange, maram chu mani pot ngei ha atu na ko leipi nijowe.

¹²Atuna ko mani sona, rupa, amant lungei, akha chu kungkap ngei akha chu mani punshan mukka pun atang thingei akha chu shaipi ha heithou shem pot lim akha chu amant tam thing thier marble.

¹³Hana anna hlak chihui mikshi marui mapange ariem ahoi myrrh, akha chu shiriktai; akha chu shiktui, shang nem, shiel akha chu kelmo, shakur akha chu kanglui ngei, kor ngei akha chu mee ngei phao ah.

¹⁴Ajin theileng thingei na amota rillea, “Napha num pot lim ngei ha am nijowe akha chu nanei nadon limpa ngei kom thing so weh nangna woiha lea ah tukkang nijo che ae!”

¹⁵Ajin theileng thinga hupi hana achong areng shuk ngei na aram lah ah ngirre maram chu mani na ma ol ma nant ha pha num no jarra mani na trappa thitah ange,

¹⁶Akha chu rillange, “Eja ah atri pi meh! Eja ah atri pi meh, alok hupi ha, amo na pun amant tam chak masheng ha akha chu sona hri amant tam lung akha chu kungkap na hlam ha!

¹⁷Apha akha shunga manei madon lim ha mang so weh, kunglim ma lamkai ngei akha chu hana shunga chungai, kungrui ngei akha chu tuipilin na aring rang tullu lu ah am adang dang ngei na aram alah ah ngirre.”

¹⁸Hupi kang meihutha mani na rijui auwa shukkae: “Hi alok hupi hekti hi etikka kom am no shonge?”

¹⁹Mani na mani lu-wa awut the weta thitah ah tappa rillea. “Eja ah atri pi meh, alok hupi hina taranga kung don limna tuipi ah tullu aja anei achong tul shuk hupi ha amo hi ae! hatiweta apha akha te shunga eheilimpa mange!”

²⁰Ariem mo thangwan ram, maram chu matreem sharukka! Ariem mo, Chungthieng meengei akha chu ahal rai akha chu rouma phu ngei oh! maram chu Chungthieng na nangei ta amo na aphur nujuija amo ta mangpi so weh.

²¹Chuna ane wanrai akha alung alok akha sharra tuipi lin shunga junweta rillea, “Hisowe alok hupi Babylon ta junna housowe akha chu woiha lea ah etikka ko ri ang no weh.

²²Rasham rol akha chu malmashi shanrol, thil trumpet tum ngei ha nakol hei thou wa etikako thei pha ang nijowe, thiem tham atu akha te phae nakol hei thou tukkang nijowe. Hana shangshuk rasha kom nakol hei thou thei ang nijowe.

²³Etikako lea ah photol meiwar nakol hei thou ri ang nijowe nakolla, mou rui na ariem rasha kom etikakom thei ang nijowe naram shunga alok ajin theileng thingei hana shimlei chunga rattek ti ae. Akha chu nang na dieklou doi ei hana shimlei mee ngei limta hungthei sho che!”

²⁴Babylon ta akang lakna maram chu roumaphu ngei thee akha chu Chungthieng meengei thee ha hupi shunga tukkae; oh weh, aleiram ma thatphur meelim ngei athee tukpha ae.