Read Chothe Naga ROUPHUH 2 Bible Online

ROUPHUH 2 - Chothe Naga bible

ROUPHUH 2

¹“Ephesiya ah am abom shunga wanrui ta jiekka hla ae: “Akut changtienga arshi sari choi ah am, akha chu sona thamei akae sari hana chunga rolla am Reng na roulam hi rilla am meh.

²Na ae hakom dang inge nangam ratta ae ha kom dang inge hana na dong thei kom dang inge hrano ngei ta dongthei no ae ti ha, akha mathei chakna ahul rui inge ta ril ngei rou takka chu ano ngei ta chang an na, mani murthei ha nang na dangpha so ae ti hi kei dang singe.

³Nang hi adang thei ae, kataranga aol ana dong che ae, akha chu nang na naha chan no lutta am che ae.

⁴Chutiweta nachunga kei na rou dolla shi inge, ti chu nang na amatienga nalungshit ha hla ah hou so che.

⁵Chuna sharukka nangna alo ta nulea ah cha mo hallo akha chu pak hai thou wa lea oh, akha chu amatienga na ae hekta ae oh, ano lea keina nakolla wa ah nathamei kae ha amunt hai thou wa lah ah hou ange.

⁶Chutiweta nangta ngairang akha chu keina katier Nicolatam ngei tullu ha nang na kom atier ae.

⁷“Ejonga nakour am tu lea chu muihla na akoksha abom ngei ta rilha thei oh! “Ralne ngei ta chu Chungthieng mahun shung tou ringchang thei ra ha bakrang kei na pepi ange.

⁸“Smyrna abom wanrui ta jiekka hla ae: “Thiweta ringa thou, athou na akha chu atreem na arengpa na roulim hi rillea.

⁹Ma ol na mant, akha chu na sara, rou takka chu nang chu achong che ae. Hana mani matakna Jihudy unge ril weta, atun chu ano saitan ngei abom changa am mani hrano rou ha keina dang inge.

¹⁰Aol ana nadong ang ngei ha atri no oh, an no, nangei ta chang an ranga dijabol na nangei mee ahre ta raen inn shunga hla ange, hana rungni nasom nangei na aol ana pha ange, nangna athit pha mei ngoi ring ha chango chu na keina nangta ral nea na aring lubur pe ange.

¹¹“Muihla hana akoksha abom ngei ta rilha akour am amo na thei shu oh! “Ane mee amo ta chu woi lea ah thi hana ephao ae nea ang no ae.

¹²“Perganum am abom ngei wanrui ngei ta jiekka hla ae: “Apop aha ani don chamsai choi arengpu na rou ngei hi rillea.

¹³Nangna na am na ram ha keina dang inge amunt hana saitan phomlu am meh, hana nang na keita chetta ngoiringe akha chu saitan na am na amunt na nangei kolla hana thatphur katarang lungir, keina ngoiringa ngei Antipas that ha nang na keita ngoiring che ae.

¹⁴Chutiweta nachunga karou dollang am meh, maram chu amunt hana Balam na chupi ha, jui ngei nakolla am meh, kutta shem hlawang ta don abak ka, enn, akha chu voknota tul ha ranga, Israel sanao ngei matienga kae mathui shukpi ranga Balak ta chupi ae.

¹⁵Chu hekta nangei kar shunga mee ngeina Nicolaitans ngei chupi nujai ae.

¹⁶Chuna sharukka lung hlongo, hati no lea keina ranga nakolla jungweta kamur hai thou shuk chamsai na mani chunga ral ae ange.

¹⁷“Muihla hana akoksha abom ngeita rilha akour am amo na thei shu oh! “Ral nea mani ta chu keina athuppa shi manna pe pi ange, akha chu alung angou pa hana chung athar ming jiekka makolla pe ange, nahi pha mee amo ano are chu atu akha na ko ming ha dang no ae.

¹⁸“Thyatira abom wanrui ta jiekka hla ae: “Sarmei hekti ade amit akha chu akae na sumsan hekta ade, Chungthieng sanao pa kol hai thou wa rou lim hi rillea.

¹⁹Natullu lu, nalungshit, ngoiring, natun lu akha chu nadongthei ha hana atunna nalu tullu hana atiera na ae ta lellea ti hi keina dang inge.

²⁰Chutiweta nachung karou dol inge, ti chu mathei chakka Chungthieng trang rou sham nu inge ta ril Jezebel ta ngei pi che ae, chuti weta amo na chu kasuuk ngei ta vokno ngei hitta tulha rang kutta sem hlawang ngeita don pot bak ranga hlem meh.

²¹Keina mashilung ranga makolla apha pe inge chuti weta amo na voklou tullu hai thou wa lung hlong num no ae.

²²Anno manina mani tullu hei thou lung hlongno lea chu, keina amota kotchunga, akha chu amo hitta voklou tullu lu ngei ta alok aol ana pha rang jun hou ange.

²³Keina manutieng jui ngei ha that tange, chuti lea chu akok sha lim ngei na keita meelim lung hal dang nea ae ta ripha ange keina ma ae ma ae na tullu nujuija lea pi ange.

²⁴“Chutiweta Thyatira am chu nangei chu hrano chupi juino chao ae akha chu ‘Saitan hina athuk rou’ (adang mee ngei na ril chu hek) nangeina dangno chau ae, nangei ta kei na rilla am minge kei na nangei chunga arit akha te phao dol pi ang nonge.

²⁵Chutiweta kajung malim phao shunga nangei am ha chetta choi oh,

²⁶Chuna ral nea manita akha atreem nea phao ka tullu lim ae ah am amota keina jat lim chunga ane pe ange akha chu kapa kolhei thou wa kapha na, keina jat lim chunga pal rang anea ha pe ange manita thier mol bukka akha chu alei keipi hekti ange, hana inthou sharpa kom keina manita pe ange.

²⁹“Muihla na akoksha abom sngeita ril hi akour am mee ngei na thei shu oh.