Read Chothe Naga ROUPHUH 21 Bible Online

ROUPHUH 21 - Chothe Naga bible

ROUPHUH 21

¹Chuna athar wanram akha, lea athar shimlei akha ri shinge, masha ah am wanram lea shimlei ram ha am nijo weh, hana tuipilin ka mang so weh.

²Chuna Chungthieng heithou athieng hupi athar Jerushalem na nuhla ang mouthar na apishal ta tukhlak ranga ahra pun dir sheng hekta wanram hei thou tumma jung ha keina ri sing ae.

³Hana keina phomlu hei thou wa aring shanrolla ril keina thei inge, “Atun chu Chungthieng inn ha malmashi hitta amsowe, amona mani hitta am ha ange akha chu mani ha mamee ngei chang shai jowe Chungthieng matak mak mani hitta am ha ange akha chu amo na mani Chungthieng chang ange.

⁴Amona mani mitui lim rupi ange, hana chu lea ah athi, aol ana, atrap am mang nijowe, alui limpa ha mang sowe.”

⁵Hana phomlu chunga onga am akha na rillea, “Atun chu keina eheilim pa tharra shem shange.” Amo na keita ril shierre, “Hi lim hi jiekka shi oh, maram chu hi rou ngei hi adiek kae akha chu ngoiringa ngai ae.”

⁶Amona rillea, “Tullu hi shu so weh! keihi mashapa akha chu atreem na inge, hana athou na akha chu atreem na inge atujong akha na tui rallea chu aring na tuichir ha amant shalla enrang pe ange.

⁷Atu jong akha na ral nea lea chu kakol hei thou na hi pha ange, keina mata Chungthieng chang ange akha chu amo na kasanaopa chang ange.

⁸Chutiweta, atri rat, ngoiring no ngei atierrang amngei meethat ngei, voklou tullu lu ngei, doikap eikap ngei kutta shem hlawang ta mok ngei akha chu murthei hung thei lim mani hina am rang amunt chu sarmei akha chu sulphar hitta kanga am sarmei kum ha ae nahi woini shuna pa athi ha.”

⁹Wanrui sari shunga akha na akutta atreem na aol ana na shihakti wonshang sari choi hana kakolla wa weta rillea, “Wa oh keina kelmo hana namei chang ang nu ha muh tikkae.”

¹⁰Muihla na keita lungmant na akha chu wanrui hana keita ehekta awang amul arella ruija kallea. Amo na keita Jerushalem athieng hupi wanram Chungthieng kol hei thou tum ma jung ha ri pi ae.

¹¹Chungthieng mahung majai na de ja am meh, hupi ha amant tam alung jasper hekti ae, liklei melsen hekta thienge.

¹²Inbang hako lokka wanga harre shongkar ashom ani am meh, hana shongkar chang honna wanrui ani na hakka am meh, shongkar hana Isarel phung ashom ani lim ming jiekka shi ae.

¹³Inn hana anak chang honna shongkar inthum am meh, nashu tienga inthum hlangtienga inthum shaktienga inthum akha chu natak tienga inthum am meh.

¹⁴Hupi hana inn bang ha alung inn munt ashom ani chunga sha ae. Hana chang kelmo hana ahal sharui ashom ani ming jiekka shi ae.

¹⁵Keita trongthoupi am wanrui hana hupi hana shongkar ngei akha chu inn bang ha hi ranga sona mol akha choi ae.

¹⁶Hana hupi ha kachal inly shukkae, hana adung awang angkha rukkae hana amo na hupiha lashi ani lea rihaly kelometer ae ta hisowe. Hana adung awang ashei ang kharukkae.

¹⁷Wanrui hana inn bang hatako meter shamruk wange ta mahou sha mahi muh juija hi so weh.

¹⁸Inn bang ha amant tam lung jaspar na sha ae, hupi ha ko athieng sona na sha ae liklei wonshang hekta thienge.

¹⁹Hupa hana inn munt thou na alung ha amant tam makhai na jonne ahalpa inn munt alung ha jasparre, ani shunapana salphar lunge inthum shupana agat alunge inly shuna pa nea emarallea.

²⁰Ranga shunapana onik dunge, aruk shunapana karnelian, hana sari shenapana aeng quartz alunge, arit shupana beril, aku shupana topaz ashom shupane khelsedony, ashom akha shupana turquoise ashom ani shunapana amethyst.

²¹Shongkar ashom ani ha kungkap lung ashom ani ae shongkar chang honna kungkap lung akha akha na sha ae. Hupi hana lampi ha ko athieng sona ah sha ae liklei hekta langhel ti ae.

²²Hupi hana mokna inn akha phao ri nonge maram chu mokna inn ha arengpu ene nepa Chungthieng akha chu kelmo ha ae.

²³Hupi hana ninu hlapa mawar darkar eko am no ae maram chu Chungthieng mahung majai na warra am meh, kelmo hana phatol ae.

²⁴Shimlei ah mee ngei na awar hana thuija thinge shimlei ah arengpu ngeina mani neidon lim ha choija luttange.

²⁵Hupi hana shongkar ngeiko honga chak am mange etikako kalti am mang nijowe maram hana jantieng ti am no ae.

²⁶Jat lim hana lokna akha chu anei adon lim ha hupi hana ehaija phae ange.

²⁷Akha chu kelmo hana aring abai shunga jiekphur ngei anowa chu a hana shunga ejongpa thinglou achor tullu akha chu murthei hungthei ae ngei na etikako hupi hana luttang no ae.