Read Chothe Naga ROUPHUH 3 Bible Online

ROUPHUH 3 - Chothe Naga bible

ROUPHUH 3

¹“Sardis ah akoksha abom ngei wanrui ngeita jiekka hla ae: “Na tronglam hi Chungthieng muihla sari akha chu arshi sari ehoi ah am akha na rillea keina na ae am ha dang inge, nanghi thi hal kom ringa am meh ti hi dang inge.

²Chuna enthou jou oh, akha chu ret jou oh hana thi anga am ngeita arat pe pi oh maram chu ka Chungthieng maihanga na ae mgam ha rakit no shonge ta kei na dang pha singe.

³Angei thei oh, nangei ta chupi akha chu nangei thei ha, aril jui oh pak hai thou wa lea oh, ejonga nangna enthou no lea keina nakolla aru theipa hekta phao ange akha chu kajung rang apha kam nangna dang ang no che.

⁴Chutiweta Sardis ah am nangei ahre chu nangei pum ni ha thienge, pun angou sheng weta kei hitta rolha ange maram chu nangei ha naha pha ah ngei ae.

⁵Ralne mani na hihekti pun angou ha sheng ange keina mani ming ngei ha ringna abai hei thou wa la ah hou ang nonge. Kapa akha chu mawanrui ngei maikunga mani ha kata ae ta ril shuk kange.

⁶“Muihla na akoksha abom ngei ta ril hi akour am ngei na thei shu oh!

⁷“Philadelphia ah am akoksha abom ngei wanrui ngeita jiekka hla ae: “Na tronglam hi athieng akha chu adiek David hina so choi amo na hlong weta atu akha na ko kalne ang no, akha chu kalweta atu akha nakom hongne ang no arengpu na rilla am meh.

⁸Keina nangam ha dang inge, nakolla jaitha atom ma am kom dang inge. Nang na karil nujai ae akha chu nang hi ngoiringa ngai ae atu na kom kal nea ang no innhar ha keina nakolla hongpi sange.

⁹Anno, Saitan hina abom matak na Jihudi ngei inge ti weta achu alou mur thei mam ta nakae kunga mok ranga kei na sem mange. Kei na nangta lungshi ae ti ha manita dangpi ange.

¹⁰Maram chu nang na katrongsan hi adong thei ah jui so che ae, shimlei chunga ringa am mee ngei chang an ranga aleiram lim ma phao anga am aol ana apha hana hai thou wa keina nangta sanpi ange.

¹¹Kei ranga jang ang sange, mee atu akha na nalubur lakno rang na am ha chetta choi oh,

¹²Ralne amota keina ka Chungthieng athieng inn na inn cho akha changpi ange hana amona amunt hana hei thou wa woiha lea ah shukka thing ang no ae akha chu kapa Chungthieng hupi, kapa Chungthieng wanram hei thou tum ma jung athar Jerushalem hana ming, akha chu kaming athar hi mak ha keina machunga jiekkange.

¹³“Muihla na akoksha abom ngei ta ril ha akour am ngei na thei shu oh!

¹⁴“Laodisiya ah akoksha abom wanrui ngei ta jiekka hla ae: “Amen, ngoiringa ngei akha chu adiek meelungir Chungthieng na shem thou arengpu hana rou hi rillea.

¹⁵Natullu ha kei na dang inge, nang na dai ko dai no ae sha kom sha no ae. Nangna adai anolea asha chang ha keina di inge.

¹⁶Chuna nangna lumbul, lumbul sha, akha chu sha kom sha no dai kom dai no ti shou chu kei na nangta kamur hei thou shak ka hou ange.

¹⁷Nang na ril che ae, ‘Kei hi chong inge akha chu awat ekom am nonge, kahei ang limpa am singe.’ Chutiwe nang chu eja ringrei pi akha chu rawan shi che ae maram nanghi sara, ae pum dir shallea akha chu mit cho ae.

¹⁸Keina nangta athieng sona kakol hei thou leiweta chong rang akha chu napum shalla ajak pha no rang angou pun dir, akha chu nang na ri pha rang namitta not rang shirik tui ha kakolla leirang rillinge.

¹⁹Keina kalungshit ngei limta ran inge, akha chu reichoi inge, shilang thiengo akha chu nalung hlongo.

²⁰Anno innharra ngira eta rei ja am minge, atu jongna kashanrol thei weta innhar hong lea chu, kei na makolla lutweta amo hitta akha chu amo na kei hitta bakha eenha ange.

²¹Keina ral nea ah kapa phomlu ah arengpu amo hitta ong ha hekta ral nea amo ta ko kei hitta kaphomlu ah ong ha rang pe pi ange.

²²“Muihla hana akoksha abom ngei ta rilla akour am ngei na thei shu oh.