Read Chothe Naga ROUPHUH 5 Bible Online

ROUPHUH 5 - Chothe Naga bible

ROUPHUH 5

¹Phomlu chunga onga am arengpu makut changtienga ashung aowa jiek, chungnam sari na nam abai akha keina ri inge.

²Akha chu chungnam ha kuipi ah abai ha hongne ang meh ta? Arat wanrui akha na sanrol wanga au ha kei na ri inge.

³Chutiweta wanram ma kom akha chu shimlei ah kom ano lea aleiram thuija kom abai ha hongweta anolea ashunga atuna kom an nea no ae.

⁴Abai ha hongweta ano lea an nea ang mee am no sharukka kei kalung tonga trappinge.

⁵Chutiweta ulien ngei shunga akha na keita rillea, trap no oh, ann no, Jihudya ngai kot shunga sor, David hina atu ate hana abai ha kom, chungnam sari hakom hongne so weh.

⁶Phomlu ajai ahkelmo akha ngirra am kei na ri inge, nahana aring muihla inly akha chu ulien changeina halla am meh, kelmo ha chu athat phur sha kai ae, amo chu aki sari amit sari, mani ha shimlei lim chunga hla Chungthieng muihla sari ha ae.

⁷Kelmo hana thingweta phomlu ah onga am akha hana changtienga choi aja am abai akul ha la so weh.

⁸Hana abai lak nutienga muihla inly hana akha chu ulien chang shomni inly hana kelmo nao maikunga tu weta mok so ae, mani meelim na thil akha akha akha chu athiengei mokjuija tol ariem ahoi shirik na shi sona wonshang am meh.

⁹Mani na athar la sha ae: “Abai ha la ah akha chu hana Chungnam ha honga hi nang chu ngei ae maram chu arengpu ta chu that weta, enshung, trong, mee akha chu jat chunghonna arengpu thit na Chungthieng taranga lei pi so ae.

¹⁰Manita ani Chungthieng tarang rengram akha chu thiempu chang rang arengpuna sempi so ae, akha chu mani na shimlei ah reng changa pallange.”

¹¹Woiha lea ah ka an na wanrui lasing, laleh eja sarol thei inge manina muihla akha chu ulien ngei hitta phomlu hulla ngirre.

¹²Akha chu rol wanga lah sa ae: “Arat, atri ajak lungsing lungwar akha chu anei achang ahung ajai adom pha ah ngei ah that sha kelmo nao ha chu mokka ngei ae.”

¹³Akha chu wanram ma shimlei thuija tuipi lien shunga am ringa am lim na domma lah sa ah am meh: “Phomlu hana onga am arengpu makolla akha chu kelmo nao ha ajak atri ah mahung majai ha atreem nei no wa dom chang shu oh.”

¹⁴Chuna muihla inly na rillea, “Amen!” Akha chu ulien changei na tu weta mok sho ae.