Read Chuj San Mateo 2 S 16 Bible Online

2 S 16 - Chuj San Mateo bible

2 S 16

¹Ayic ix b'at pilnaj vin̈aj rey David chi' d'a sjolom lum tzalan chi', ix javi vin̈aj Siba schecab' vin̈aj Mefi-boset scha vin̈. Yed'nac chavan̈ noc' b'uru vin̈. Ayoch stz'um noc', ayoch 200 ixim pan d'a yib'an̈ noc', 100 b'uyan̈ taquin̈ sat uva, 100 quechan̈ taquin̈ sat higo yaman yaji yed' jun tz'uum yed'tal vino b'ud'an.

²Ix sc'anb'an vin̈ rey chi' d'a vin̈: —¿Tas juntzan̈ ed'nac chi'? xchi vin̈. Ix tac'vi vin̈aj Siba chi': —Mamin rey, a noc' b'uru tic ol cuchan eb' al uninal. Axo ixim pan yed' sat te te' sloji tic, yic eb' a soldado yaji, axo pax vino tic ol yuq'uej eb' sc'unb'i sb'ey b'aj cuseltacxo tic, xchi vin̈.

³—¿B'ajtil ay vin̈aj Mefi-boset yixchiquin vin̈ ajalil aj Saúl ticnaic? xchi vin̈ rey chi'. —Ix can vin̈ d'a Jerusalén, yujto ix sna' vin̈ talaj tz'och vin̈ reyal icha ix sc'ulej smam icham yuj eb' israel, xchi vin̈aj Siba chi'.

⁴—Tato icha chi', a ticnaic a masanil tastac ay d'a vin̈aj Mefi-boset chi', ol iquejcani, xchi vin̈ rey chi'. —Mamin rey, ay in d'a yalan̈ a mandar, vach'ocab' tzin can d'a yol a sat, xchi vin̈aj Siba chi'.

⁵Ayic ix c'och vin̈aj rey David d'a Bahurim, ix elta jun vin̈ scuchan Simei yuninal vin̈aj Gera, ayto yuj sb'a yed' vin̈aj rey Saúl chamnac.

⁶Ix och ijan vin̈ sb'ajvaj d'a vin̈aj rey David chi', ix julvajpaxcot vin̈ d'a vin̈ yed' d'a eb' yajal ajun yed' vin̈ rey chi'. Oyanoch eb' soldado yed' eb' anima d'a spatic vin̈ rey chi'.

⁷Ix yalan vin̈aj Simei chi' icha tic: —Jachel a b'a d'a tic, ach milum anima.

⁸A ticnaic van a chaan spac yuj Jehová yuj jantac eb' yin̈tilal vin̈aj Saúl a milnacchamoc yic tzach ochcan reyal sq'uexuloc vin̈. A ticnaic toxo ix yac'och opisio Jehová d'a yol sc'ab' vin̈ uninal aj Absalón. Ix javi d'a ib'an̈ ticnaic yujto te milum ach anima, xchi vin̈ d'a vin̈ rey chi'.

⁹Ix yalan vin̈aj Abisai yune' ix Sarvia d'a vin̈aj rey David chi' icha tic: —Mamin rey, ¿tas yuj sb'ajvajcot jun vin̈ icha noc' chamnac tz'i' tic d'ayach? Cha in b'ati, b'at in xiquel sjolom vin̈, xchi vin̈.

¹⁰Ix yalan vin̈ rey chi': —Malaj eyalan eyic d'a jun vin̈ tic a ex yune' ex ix Sarvia tic. Tato tzin sb'aj vin̈, a am Jehová tz'ac'an yal vin̈. Tato icha chi', malaj mach syal scachanoch vaan vin̈, xchi vin̈ rey chi'.

¹¹Ix b'at q'uelan vin̈ d'a vin̈aj Abisai yed' d'a eb' ayoch yed' vin̈ yajalil, ix yalan vin̈: —Inatax a val vin̈ vuninal snib'ej tzin milanchamoc, ocxom val jun vin̈ yin̈tilal Benjamín tic. In sb'ajocab' vin̈, tecan a Jehová tz'ac'an yal vin̈.

¹²Talaj ol in snacot Dios yuj in cusc'olal tic, axo ol ajoc to ol yac' svach'c'olal d'a vib'an̈ sq'uexuloc tas tz'alji tic d'ayin, xchi vin̈.

¹³Ix b'atxi vin̈aj David chi' yed' masanil eb' ajun yed'oc, an̈eja' ix b'atpax vin̈aj Simei chi' d'a spac'ul lum vitz chi', ix b'ajvajxicot vin̈, ix sjulancot q'uen q'ueen vin̈ d'a scal eb', ix slan̈ancot lum pococ vin̈ d'a eb'.

¹⁴Ayic ix c'och vin̈aj David chi' d'a sti' a' Jordán yed' masanil eb' ajun yed' chi', te c'unb'inacxo eb', yuj chi' ix yic' yip eb' ta'.

¹⁵Axo vin̈aj Absalón yed' masanil eb' ajun pax yed'oc yed' vin̈aj Ahitofel, ix och eb' d'a yol chon̈ab' Jerusalén.

¹⁶Axo vin̈aj Husai arquita yamigo vin̈aj David, ix elta vin̈ scha vin̈aj Absalón chi', te chaan̈ ix avaj vin̈, ix yalan vin̈ icha tic: —Nivanocab' elc'och mamin rey, ach ic'jocab' chaan̈, xchi vin̈.

¹⁷Ix sc'anb'an vin̈aj Absalón chi': —¿Tom icha chi' tz'aj a naan d'a spatic vin̈ amigo chi'? ¿Tas yuj maj ach b'at yed' vin̈? xchi vin̈ d'a vin̈.

¹⁸Ix tac'vi vin̈aj Husai chi': —Maay, man̈ smojoc tzin b'at yed' vin̈. A mach sic'b'ilel yuj Jehová, sic'b'ilpaxel yuj eb' chon̈ab' israel, a yed' ol in canoc.

¹⁹An̈ejtona' ay mach smoj svac' servil, ol vac' servil vin̈ yuninal vin̈ vamigo chi'. Icha ix aj vac'an servil vin̈ a mam, icha val chi' ol aj ach vac'anxi servil, xchi vin̈.

²⁰Ix lajvi chi' ix yalan vin̈aj Absalón chi' d'a vin̈aj Ahitofel: —¿Tas tza na' a ach tic, tas ol co c'ulej? xchi vin̈ d'a vin̈.

²¹Ix yalan vin̈aj Ahitofel chi': —A tas tza c'ulej ticnaic to tzach vay yed' eb' ix schab'il yetb'eyum vin̈ a mam aycan stan̈vej spat, yic vach' snachajel yuj masanil eb' israel tic to tzach chacjicanel yuj vin̈ a mam chi', axo masanil eb' ayoch ed' tic ol ach yac'och eb' yipoc sc'ool, xchi vin̈.

²²Ix lajvi chi', ix sb'oanq'ue jun mantiado eb' d'a span̈anil palacio, ata' ix vay vin̈aj Absalón chi' yed' eb' ix schab'il yetb'eyum smam chi'. D'a yichan̈ masanil eb' chon̈ab' chi' ix vay vin̈ yed' eb' ix.

²³A d'a jun tiempoal chi', ayic sc'anchaj razón d'a vin̈aj Ahitofel chi' ichato a d'a Dios van sc'anb'an eb', yuj chi' a tas ix yal vin̈, ix yac'och vin̈aj rey David yipoc sc'ool. An̈eja' icha pax chi' ix sc'ulej vin̈aj Absalón chi'.