Read Chuj San Mateo 2 Cr 10 Bible Online

2 Cr 10 - Chuj San Mateo bible

2 Cr 10

¹Ix b'at vin̈aj Roboam d'a chon̈ab' Siquem, yujto ata' ix smolb'ej sb'a eb' yetisraelal vin̈, yic tz'ac'jicanoch vin̈ reyal yuj eb'.

²Ix c'och specal jun tic d'a vin̈aj Jeroboam yuninal vin̈aj Nabat d'a Egipto, yuj chi' ix paxta vin̈, yujto ata' c'ochnaccan vin̈ ayic yelnac vin̈ elelal d'a vin̈aj Salomón.

³Ix avtajcot vin̈aj Jeroboam chi' yuj eb' yetisraelal. Ayic ix javi vin̈, ix b'at vin̈ yed' eb' yic sb'at lolon eb' yed' vin̈aj Roboam chi'. Ix yalan eb' d'a vin̈ icha tic:

⁴—A vin̈ a mam, yelxo te ya munlajel ayoch yuj vin̈ d'a quib'an̈. Axo ticnaic jun, iq'uel jab'oc munlajel ya ayoch d'a quib'an̈ tic, ol cac'n̈ejoch co b'a d'a yalan̈ a mandar, xchi eb'.

⁵Ix tac'vi vin̈aj Roboam chi' d'a eb': —Ato chab'ej tzul in eyilxi, sval d'ayex tas tz'aji, xchi vin̈ d'a eb'. Yuj chi' ix pax eb' anima chi' smasanil.

⁶Ix lajvi chi' ix sc'anb'an vin̈aj rey Roboam chi' d'a eb' vin̈ yichamtac vinaquil chon̈ab', aton eb' vin̈ munlajnac yed' vin̈aj Salomón smam vin̈ icha tic: —¿Tas junoc pensar tzeyac' d'ayin? ¿Tas svutej tac'voc in b'a d'a juntzan̈ anima tic? xchi vin̈.

⁷Ix yalan eb' vin̈ d'a vin̈ icha tic: —Tato vach'n̈ej ol utej a b'a d'a eb' anima tic, ol a c'anab'ajan a b'oan tas snib'ej eb' chi', tato vach' pax ol utoc a tac'vi d'a eb', ol yac'n̈ejoch sb'a eb' d'a yalan̈ a mandar d'a masanil tiempo, xchi eb' vin̈.

⁸Palta maj schalaj yab' vin̈ tas ix yal eb' vin̈ ichamtac vinac chi'. Axo d'a juntzan̈ eb' vin̈ quelemtac junn̈ej q'uib'nac vin̈ yed'oc, ata' ix sc'anb'ej pax spensar vin̈ chi', aton eb' vin̈ ayoch d'a opisio yed' vin̈.

⁹Ix sc'anb'an vin̈ d'a eb' vin̈ icha tic: —¿Tas junoc pensar tzeyac' d'ayin a ex tic? ¿Tas svutej tac'voc in b'a d'a juntzan̈ anima tic? Snib'ej eb' sviq'uel jab'oc munlajel aycanoch d'a yib'an̈ eb' yuj vin̈ in mam, xchi vin̈.

¹⁰Ix tac'vi juntzan̈ eb' vin̈ quelemtac vinac chi' icha tic: —A eb' tz'alan chi' to tziq'uel jab'oc munlajel aycanoch d'a yib'an̈ eb' yuj vin̈ a mam chi', al d'a eb' icha tic: Tato ya munlajel b'aj ayex och yuj vin̈ in mam chi', a inxo pax tic, ec'alto syail b'aj ol ex vac'ochi.

¹¹Tato al ix yutej eyicatz vin̈ in mam chi', a inxo pax tic, ec'alto yalil ol vutej eyicatz chi'. Tato an̈ej noc' tz'uum ix yac'lab'ej vin̈ in mam chi' ex smac'ani, a inxo tic, a noc' tz'um ayoch q'ueen d'a sn̈i' ol vac'lab'ej d'ayex, xa chi d'a eb', xchi eb' vin̈.

¹²Axo d'a schab'jial chi', ix jax vin̈aj Jeroboam yed' masanil eb' anima chi' d'a vin̈aj rey Roboam chi', icha ix aj yalan vin̈ d'a eb'.

¹³Palta te chuc ix yutej vin̈ spacan d'a eb'. Maj sc'anab'ajej vin̈ tas ix yal eb' vin̈ yichamtac vinaquil chon̈ab' chi'.

¹⁴A tas ix yal eb' vin̈ quelemtac vinac chi', a ix yal vin̈ d'a eb' icha tic: Tato al ix yutej eyicatz vin̈ in mam chi', a inxo tic, ec'alto ol vutej yalil eyicatz chi'. Tato an̈ej noc' tz'um ix yac'lab'ej vin̈ ex smac'ani, a inxo pax tic, a noc' tz'uum ayoch q'ueen d'a sn̈i' ol vac'lab'ej d'ayex, xchi vin̈.

¹⁵Maj schalaj yab' vin̈ rey chi' tas ix yal eb' anima chi', yujto a Jehová ix ac'an sc'ulej vin̈ yic vach' tz'elc'och tas ix schec yal vin̈aj Ahías aj Silo d'a vin̈aj Jeroboam yuninal vin̈aj Nabat.

¹⁶Ayic ix yilan masanil eb' anima chi' to maj scha yab' vin̈ rey chi', ix yalan eb' icha tic: Man̈xalaj calan quic d'a yin̈tilal vin̈aj David yuninal vin̈aj Isaí. Ch'oc yin̈til eb', ch'oc pax quin̈tilal. Ex quetisraelal, con̈ paxec d'a co pat junjun on̈. Olxo yil sb'a eb' yin̈tilal vin̈aj David tic, xchi eb'. A d'a jun rato chi' ix laj pax eb' d'a spat.

¹⁷Ix lajvi chi', ix checjib'at vin̈aj Adoram yuj vin̈aj Roboam d'a eb' israel ix paxcan chi'. A vin̈aj Adoram chi' ay yopisio yilan eb' ac'b'il pural smunlaji. Ayic ix c'och vin̈ d'a eb' ix paxcan chi', ix julq'uenajcham vin̈ yuj eb'. Yuj chi' ix q'ue vin̈aj Roboam chi' d'a yol scarruaje, ix cot vin̈ elelal, ix javi vin̈ d'a Jerusalén. Icha chi' ix aj yelcan eb' israel chi' d'a yol sc'ab' eb' yin̈tilal vin̈aj David. Axon̈ej juntzan̈xo eb' cajan d'a juntzan̈ chon̈ab' d'a yol yic Judá b'aj ix yac' reyal vin̈.