Read Chuj San Mateo Job 13 Bible Online

Job 13 - Chuj San Mateo bible

Job 13

¹Masanil juntzan̈ tic ix vil val yed' in sat, ix vab' val yed' in chiquin.

²A tas eyojtac a ex tic, vojtacpaxi, mantoc yelxo val emnaquil vaj d'ayex.

³Palta tzin nib'ej tzin lolon yed' Dios Syal Yuj Smasanil. Tzin nib'ej tzin telaj in b'a yed'oc.

⁴A ex tic, yuj eyesalvumal tze c'ub'anel tas yel. Lajan ex yed' eb' an̈tum malaj vach' yochi.

⁵Comonoc numan tzex aji, yic icha chi' scheclaji to jelan ex.

⁶Maclejec eyab' tas ol vala', ol val tas nab'il vuuj.

⁷¿Am e naani to ol ex colvaj d'a Dios yuj eyesalvumal chi'? ¿Am e naani to ay tas ol yic' d'a e ac'oj musansatil chi'?

⁸Tze nib'ej tzeyac'och e b'a yed' Dios, tze colan e naani.

⁹Palta q'uinaloc tzex ch'olb'itaj yuj Dios chi', ¿tas tzex aj e naani? ¿Tzam yal eyac'an musansatil, icha tzeyutej junoc anima?

¹⁰Tato tze comon aq'uejoch e b'a yed' Dios e naani, ol ex stumej sic'lab'il.

¹¹A val smay ol ic'an e xivi, mato syal e tec'b'an e b'a d'a yichan̈ e naani.

¹²A juntzan̈ peca' c'ayb'ub'al tzeyala', malaj yelc'ochi, lajan icha junoc muro nab'a luum scac'och yipoc co c'ool.

¹³Axo ticnaic, tz'inec xe chi to ol in lolonoc, taxon̈ej scot d'a vib'an̈ yuj tas ol val tic.

¹⁴Vach'chom scotxon̈ej d'a vib'an̈, palta ol valn̈ej.

¹⁵Vach'chom yuj chi' tzin smilcham Dios, palta ol vac'n̈ejoch yipoc in c'ool. Ol in coln̈ej in b'a d'a yichan̈.

¹⁶Talaj ata' ay in colnab'il, yujto a junoc mach chuc max stec'b'ej sb'a yoch d'a yichan̈ Dios.

¹⁷Maclejec val eyab' tas ol aj valani.

¹⁸Toxo ix in na' tas ol vutej in colan in b'a, vojtac to vach' ol in elc'ochoc.

¹⁹Tato ay mach sch'oxaneli to ay in mul, syal voch vaan valani masanto tzin chami.

²⁰Ach in Diosal, chab'n̈ej val tas tzin c'an d'ayach, icha chi' syal in c'och d'a ichan̈.

²¹Actejxo ac'anoch in yaelal tic, man̈xo in a xib'tej yed' tas ay smay.

²²Avtej in, ol in tac'voc d'ayach, ma jun, tzin b'ab'laj loloni, tzach tac'vi d'ayin.

²³Al d'ayin, ¿b'ajtil ix och in mul, ma in paltail? ¿B'ajtil ay b'aj ix in ec' d'a yib'an̈ chi'?

²⁴¿Tas yuj tza c'ub'ejel a b'a d'ayin? ¿Tas yuj icha junoc ajc'ol tzin utej?

²⁵Lajan in icha junoc xil te' tz'ic'jib'at yuj ic', ma icha an̈ taquin̈ ac. ¿Tas yuj tzac' oval ved'oc, tza nib'ej tzin a sateli?

²⁶Te ya tzal d'ayin svab'i. Tza c'anb'an d'ayin tastac in mul yictax in quelemal.

²⁷Ichato ix ac'och q'uen cadena d'a voc, q'uelan achn̈ej ochi b'aj tz'em voc.

²⁸Yuj chi' vanxo in c'ab'at icha junoc tas sc'ai, ma icha junoc pichul ijtacxo.