Read Chuj San Mateo Job 18 Bible Online

Job 18 - Chuj San Mateo bible

Job 18

¹Ix yalanxi vin̈aj Bildad icha tic:

²¿B'aq'uin̈ val ol actej a loloni? Nachajocab' uuj, ichato pax chi' syal co loloni.

³¿Tas yuj tzon̈ al noc'al, man̈xa jab'oc quelc'och d'a a sat?

⁴¿Tas yuj tza chalchitej a b'a yuj chichonc'olal? ¿Am a naani yujto icha chi' tzutej a b'a ol can tz'inan lum luum tic, ma ol q'uexvoc yed'tal q'uen tenam?

⁵A tas ayoch yipoc sc'ol junoc mach chuc spensar, ol tupemoc, icha stup junoc candil vanxo stup sc'ac'al.

⁶Ol tup sc'ac'al scandil d'a yol spat, man̈xa saquilq'uinal ta'.

⁷Maxtzac yal yec' yed' stec'anil, van slocan sb'a yoc, stelvi yuj tas nab'il yuuj.

⁸Ichato ol em junoc ch'an̈ yaal d'a yol sb'e, ol can sud'naj d'a yol jun ch'an̈ yaal chi'.

⁹Ol em jun ch'an̈ yaal chi' d'a yol sb'e. A d'a sjaj yoc ol och sud'naj ch'an̈.

¹⁰C'ub'eltac yajem jun yaal chi' d'a yol sb'e.

¹¹Ayn̈ejoch xivc'olal d'a spatic yichan̈, ichato spechji b'eyec'oc.

¹²Ay tas d'ay d'a peca', axo ticnaic van scham yuj vejel, a yaelal q'uelanxo och d'ay.

¹³A jun ilya slajanel snivanil, axo sc'ab' yed' yoc ichato ol c'uxjocb'at yuj jun ilya chi'.

¹⁴Ol ic'joquel d'a scal junc'olal b'aj cajan, ol n̈erjoccanb'at d'a yichan̈ jun aj chamel.

¹⁵Ch'ocxo mach ol cajnajcan d'a scajnub'. Ayic toxo ix cham chi', ol tzicchajec' azufre d'a yol spat chi', yic satel jun yab'il chi'.

¹⁶Lajan val icha junoc te te' taquin̈xo sch'an̈al yib' yed' sc'ab'tac.

¹⁷A sb'inajnaquil ol satcanel d'a sat luum tic. Man̈xa b'aq'uin̈ ol b'inajoc.

¹⁸Ol ic'chajel d'a scal eb' pitzan b'aj sacq'uinal. B'aj ay eb' chamnac d'a q'uic'alq'uinal ol yumjoccanb'atoc.

¹⁹Man̈xa yin̈tilal ol can d'a schon̈ab' yed' b'aj cajan.

²⁰Ayic ol ab'chaj tas ix javi d'a yib'an̈, ol xivcanq'ue eb' cajan d'a stojolal b'aj sjavi c'u yed' b'aj tz'em c'u.

²¹Icha val chi' ol aj satel eb' chuc, aton eb' malaj yelc'och Dios d'ay, xchi vin̈aj Bildad chi'.