Read Chuj San Mateo Job 33 Bible Online

Job 33 - Chuj San Mateo bible

Job 33

¹Yuj chi' mamin Job, ab' tas ol vala', cham tza maclej ab' in lolonel tic:

²Yujto a spac a lolonel chi' ayxoec' d'a yol in ti' yic svalani.

³A tas nab'il vuuj, ol val d'ayach d'a stojolal yed' d'a smasanil in c'ool.

⁴A Dios Syal Yuj Smasanil, a' ix in b'oani, a tz'ac'an in q'uinal, yuj chi' pitzan in.

⁵Tac'van̈ d'ayin tato syal a pacani, na tas ol utej a colan a b'a.

⁶Lajanon̈n̈ej co chavan̈il d'a yichan̈ Dios chi', an̈eja' d'a lum luum tic b'ob'il on̈.

⁷Yuj chi' max yal a xiv vuuj, max yal emnaquil ol ach vutej.

⁸Icha tic ix vab' alani:

⁹Vach'chom malaj in mul, malaj jab'oc in paltail, malaj chucal tzin c'ulej,

¹⁰palta a Dios sayan tas tz'aj yac'anoch d'a vib'an̈, icha junoc yajc'ol tzin yutej.

¹¹Ichato ix yac'och q'uen cadena d'a voc, q'uelann̈ejoch d'ayin b'ajtac tzin eq'ui, xa chi.

¹²Palta a tas ix al tic man̈ vach'oclaj, yuj chi' ol vac' spac d'ayach: A Dios yelxo te ec'to yelc'och d'a quichan̈ a on̈ anima on̈ tic.

¹³¿Tas yuj tzaloch d'a sat to max spac tas tzal d'ay?

¹⁴A Dios chi' tzijtum macan̈il syutej lolon sb'a, palta max nachajel-laj cuuj.

¹⁵Ay b'aj slolon d'ac'valil, ma d'a vayichal, ma d'a ilvalil ayic te vaynac on̈.

¹⁶A Dios slolon d'a co pensar, yic tzon̈ cachjioch vaan d'a tas sco c'ulej, icha chi' tz'aj on̈ xib'tanpaxi.

¹⁷Icha chi' tzon̈ yutej Dios, yic vach' squiq'uel co b'a d'a scal chucal, yic man̈ comonoc squic'chaan̈ co b'a.

¹⁸Icha chi' syutej Dios on̈ scolanel d'a chamel yic vach' max on̈ sateli.

¹⁹Ay pax b'aj jun, a yed' yaelal syac' co cachnab'il Dios chi', scab'an val syail d'a co nivanil.

²⁰Masanil vael te vach' tz'ac'ji co va'a, ton̈ej sco yajeli.

²¹Stz'onb'i co nivanil, scheclajelta co b'aquil d'a co nivanil chi'.

²²Ichato sc'och co nivanil b'aj smucchaj eb' chamnac, ayxoec' d'a yol sc'ab' chamel.

²³Palta q'uinaloc d'a scal jantac eb' schecab' Dios, sic'jielta junoc te nivan yelc'ochi, scoti yic tzul colvaj qued'oc, syalani tas smoj sco c'ulej,

²⁴sc'anan cuuj d'a Dios to tz'oc' sc'ol d'ayon̈. Sc'ananpax d'a Dios chi' to max yiq'uel co q'uinal, yujto chequelxo mach stupan yuj co chucal chi'.

²⁵Icha chi' tz'aj sb'oxi co c'ool, axo co nivanil tic tz'uninb'ixi, icha yic scotnac quelemal.

²⁶Ayic tzon̈ tevi d'a Dios, syac'an svach'c'olal d'ayon̈. Val d'a tzalajc'olal tzon̈ och ejmelal d'a yichan̈ Dios, scalan svach'c'olal d'a scal eb' quetanimail.

²⁷Scalan junjun on̈ d'a yichan̈ eb' anima icha tic: Ix och in mul, ix in c'ulej tas man̈ tojoloc, palta a Dios maj yal sc'ol ix yac'och in yaelal d'a smojal.

²⁸A ix yutej to ix in scol d'a yol sc'ab' chamel, yuj chi' tzato vil saquilq'uinal, xco chama.

²⁹Icha chi' tzon̈ yutej Dios, man̈ jun chaelocn̈ej sc'ulej icha chi',

³⁰yuj on̈ scolanelta d'a yol sc'ab' chamel, yic scac'an tzalajb'oc jab'ocxo co c'ool.

³¹Mamin Job ab' val tas ol vala'. Numan tzach aji yacb'an tzin loloni.

³²Tato ay tas tza nib'ej tzala', syal alan d'ayin. Tato ay tas snachaj uuj, ala', tzin nib'ej malaj tas scan d'a ib'an̈.

³³Tato malaj tas tzal jun, maclej ab' tas ol vala', ol ach in c'ayb'ej d'a jelanil, xchi vin̈aj Eliú chi'.