Read Chuj San Mateo Sal 111 Bible Online

Sal 111 - Chuj San Mateo bible

Sal 111

¹Calec vach' lolonel d'a Jehová. D'a val smasanil in c'ool ol val vach' lolonel d'a Jehová, b'aj molanec' eb' anima vach' sb'eyb'al.

²Yelxo val te satub'tac tas sc'ulejnac Jehová. A mach xajanan tas sc'ulejnac chi', snaub'tan̈ej eb' d'a yib'an̈.

³Te nivan yelc'och tas sc'ulejnac Jehová chi', te vach' pax yilji. A svach'c'olal ayn̈ejec' d'a masanil tiempo.

⁴Malaj b'aq'uin̈ ol b'atcan satc'olal tas satub'tac sc'ulejnac. A Jehová chi' te nivan svach'c'olal, te ay pax yoq'uelc'olal.

⁵Syac' tas svaji d'a eb' ay xivc'olal d'ay. Naann̈ej strato yuuj.

⁶A juntzan̈ tas te satub'tac ix sc'ulej svach'iloc eb' schon̈ab'. Ix yac' lum sluum eb' ch'oc chon̈ab'il yiquej eb'.

⁷Tz'eln̈ejc'och tas syala', tojol toni. Masanil juntzan̈ schecnab'il, yeln̈ej syala'.

⁸Malaj b'aq'uin̈ sq'uexvi. Te tojol yaji, yeln̈ej pax syala'.

⁹A Jehová te nivan yelc'ochi, Axon̈ej Ochi, ix scolel schon̈ab', malaj b'aq'uin̈ ol sq'uex strato ix yac'cani.

¹⁰Tato sco nib'ej jelan tzon̈ aji, ayocab' yelc'och Jehová d'a co sat. A eb' sb'eyb'alan schecnab'il, te aj pensar eb'. Alchajocab' vach' lolonel d'a Jehová d'a masanil q'uinal.