Read Chuj San Mateo Sal 112 Bible Online

Sal 112 - Chuj San Mateo bible

Sal 112

¹Aljocab' vach' lolonel d'a Jehová. Te vach' yic junoc mach ay xivc'olal d'a Jehová, d'a smasanil sc'ol sc'anab'ajej schecnab'il.

²A yin̈tilal jun anima vach' chi', vach' yic eb' yuj Dios, tz'ac'ji yopisio eb' d'a sat luum tic.

³Man̈ jantacoc sb'eyumal d'a yol spat, axo stojolal, ayn̈ejec' d'a masanil tiempo.

⁴Icha val saquilq'uinal d'a scal q'uic'alq'uinal, icha chi' yaj Dios d'a eb' anima vach' spensar, yujto ay yoq'uelc'olal eb', ay svach'c'olal eb', tojol pax sb'eyb'al eb'.

⁵A junoc anima vach' spensar, elb'enn̈ej tas yuuj. Masanil tas sb'o d'a smunlajel, tojoln̈ej syutej.

⁶Yuj chi', malaj b'aq'uin̈ ol can d'a yalan̈. A anima vach' chi', ol nachajn̈ejcot d'a masanil tiempo.

⁷Malaj sxivc'olal d'a junoc ab'ix ay smay. Te tec'an syutej yac'anoch Jehová yipoc sc'ool.

⁸Max xivlaj jab'oc, ton̈ej stzevaj d'a eb' ayoch ajc'olal d'ay.

⁹Max syaejlaj tastac b'aj scolvaj d'a eb' meb'a'. A svach'c'olal chi' ayn̈ej d'a masanil tiempo, te nivan tz'aj sb'inaj yuj svach'il chi'.

¹⁰A eb' chuc spensar, scot yoval eb' ayic syilan eb' yic'jichaan̈ eb' anima vach' spensar chi'. Sc'ux val ye eb' scot yoval, ol lajvoccanel eb'. A tas sgana eb' anima chuc chi', man̈ ol elc'ochlaj.