Read Chuj San Mateo Sal 116 Bible Online

Sal 116 - Chuj San Mateo bible

Sal 116

¹Tzin xajanej Jehová, yujto ix yab' in lesal ayic ix in tevi d'ay.

²Yujto ix yab' tas ix in c'an d'ay, yuj chi' ol val in b'a d'ay yacb'an pitzan into.

³Ijan val ix in yamchaj yuj chamel. Ix ja syaelal chamel d'ayin. A ilc'olal yed' yaelal ix javi d'a vib'an̈.

⁴Ichato chi' ix valan in b'a d'a Jehová. Ix in tevi d'ay yic syac'an b'oxoc in c'ool.

⁵A Jehová, tojol toni, tz'oc' sc'ol d'ayon̈. A co Diosal, yelxo val te nivan svach'c'olal.

⁶A stan̈van eb' emnaquil yeq'ui. Ayic toxo ix el vip, a ix in colani.

⁷Ayxo in junc'olal ticnaic svab'i, yujto a Jehová vach' ix yutej sc'ol d'ayin.

⁸Maj in scha chamlaj, ix in scol d'a in cusc'olal, maj in schalaj telvoc.

⁹Yacb'an pitzan into ol in c'anab'ajej.

¹⁰Ix vac'och Jehová yipoc in c'ool, d'a scal in nivan yaelal ix valani: Te ya ayin, xin chi.

¹¹Man̈xo animaoc vaj svab'i, yuj chi' ix vala' to masanil eb' anima, max yal-laj cac'anoch tas syal eb' yipoc co c'ool.

¹²¿Tas ol vutej vac'an spac masanil svach'c'olal Jehová ix yac' d'ayin?

¹³Ol vic'cot vino ofrendail d'ay yuj vac'an yuj diosal d'ay, yujto ix in scolo'.

¹⁴A d'a yichan̈ masanil schon̈ab' ol vaq'uelc'och tas ix val d'ay.

¹⁵Te nivan yelc'och d'a yichan̈ Jehová ayic scham junoc mach yicxo.

¹⁶Mamin Jehová, a in ton tic, a checab' in. A ach ix in a coleli, yuj chi' libre in ticnaic.

¹⁷Ol vac' in silab' yuj ac'oj yuj diosal d'ayach yuj spacoc a vach'c'olal. Ol val in b'a d'ayach.

¹⁸Mamin Jehová, ol vaq'uelc'och in ti' d'ayach d'a yichan̈ masanil eb' a chon̈ab',

¹⁹d'a yamaq'uil a templo d'a snan̈al chon̈ab' Jerusalén. Scal vach' lolonel d'ayach Jehová.