Read Chuj San Mateo Sal 12 Bible Online

Sal 12 - Chuj San Mateo bible

Sal 12

¹Ayic sb'itan jun b'it tic vin̈ cuchb'um yic b'it, a yamc'ab' vajxaque' sch'an̈al sc'anchaji. Sb'it jun tic vin̈aj David. Mamin Jehová, colon̈, yujto man̈xalaj eb' ay elc'och d'a sat, van satel eb' tzach c'anab'ajan d'a scal eb' anima.

²Syesej eb' d'ay junjun. D'a chab'satil slolon eb' d'ay junjun yic slaj yixtan sb'a eb'.

³Mamin Jehová, satcanel juntzan̈ anima ayoch d'a chab'satil chi' yed' eb' syic'chaan̈ sb'a.

⁴Aton eb' tz'alani: An̈ej tato syal co loloni, c'ocb'iln̈ej chi'. A co ti' tic ol on̈ colanoc. ¿Machto val ol yal on̈ schecani? xchi eb'.

⁵Axo Jehová tz'alani: Tz'ixtaj val eb' malaj tas syal yuuj. A eb' meb'a' tz'el yav eb' yuj syail. Yuj chi', yovalil ol in colcanel eb' stan̈van in colval, xchi Jehová.

⁶A tas yalnaccan Jehová te vach'n̈ej. Icha val q'uen plata sic'lab'il stz'ai, man̈xalaj jab'oc smical, uquel sn̈usji d'a yol c'ac', icha chi' yaj tas yalnaccani.

⁷Mamin Jehová, a ach ton val tzon̈ a tan̈vej. Toxonton tzon̈ a coln̈ej d'a juntzan̈ anima tic.

⁸Ayic schaan yab' chucal eb' anima, masanil b'aj tz'ic'jichaan̈ eb' chuc chi'.