Read Chuj San Mateo Sal 128 Bible Online

Sal 128 - Chuj San Mateo bible

Sal 128

¹Sb'it eb' israel ayic van sq'ue eb' d'a sb'eal Jerusalén. Te vach' yic junoc mach ay xivc'olal d'a Jehová, sb'eyb'alan pax schecnab'il.

²D'a tzalajc'olal ol yab'lej sat tas syavej, te vach'n̈ej ol elc'ochoc.

³Icha satan te' uva d'a spatic schiquin spat, man̈ jantacoc sat syac'a', icha val chi' ol aj ix yetb'eyum. Icha svol te' olivo, icha val chi' ol ajoch oyan eb' yuninal d'a spatic smexa.

⁴Icha val chi' ol aj yac'an svach'c'olal Jehová d'a junoc mach ay xivc'olal d'ay.

⁵Yac'ocab'cot svach'c'olal Jehová d'a quib'an̈ masanto d'a tzalan Sion. Quilocab' svach'c'olal Jehová d'a Jerusalén d'a junjun c'u yacb'an pitzan on̈to.

⁶Olto quilec tas ol aj eb' yuninal eb' cuninal. Ayocab' junc'olal d'a quib'an̈ a on̈ israel on̈ tic.