Read Chuj San Mateo Sal 135 Bible Online

Sal 135 - Chuj San Mateo bible

Sal 135

¹Calec vach' lolonel d'a Jehová. Ex schecab' ex Jehová, alec vach' lolonel d'ay.

²Mach ex ayex ec' d'a yamaq'uil stemplo Jehová co Diosal,

³alec vach' lolonel d'ay, yujto vach'. B'itanan̈ec d'ay yujto te ay svach'c'olal d'ayon̈ anima on̈ tic.

⁴Ix on̈ sic'canel a on̈ israel on̈ yin̈tilal on̈ vin̈aj Jacob, yic tzon̈ och yicoc.

⁵A in tic vojtac val sic'lab'il to a Jehová co Diosal, yelxo val ec'b'al yelc'och d'a yichan̈ masanil comon dios.

⁶Syaln̈ej sc'ulan masanil tas snib'ej sc'ulej, vach'chom d'a satchaan̈, ma d'a sat luum tic, ma d'a a' mar, ma pax d'a yich a'.

⁷A' tz'ac'ancot asun b'aj slajvic'och lum luum tic. A' tz'ac'anec' copnaj leb'lon ayic syac'an n̈ab'. A' sjacanelta ic' b'aj molanec' yuuj.

⁸A' milannaccham eb' b'ab'el unin d'a junjun patil eb' aj Egipto yed' pax sb'ab'el yune' junjun noc' snoc' eb'.

⁹A d'a snan̈al chon̈ab' Egipto chi', ay juntzan̈ tas te satub'tac sc'ulejnac yic syac'an syaelal vin̈ rey yed' pax eb' schecab' vin̈.

¹⁰Tzijtum juntzan̈ chon̈ab' satnaquel yuuj, smilannaccham eb' rey te nivac yopisio.

¹¹Smilnaccham vin̈aj Sehón, sreyal eb' amorreo yed' vin̈aj Og sreyal Basán yed' masanil eb' rey d'a yol yic Canaán.

¹²Axo lum sluum eb' rey chi' yac'nac d'ayon̈ a on̈ israel on̈ tic, yic squiquejcan luum.

¹³Mamin Jehová, a a b'inajnaquil malaj b'aq'uin̈ ol sateloc. D'a masanil tiempo ol ach nachajcotoc.

¹⁴A Jehová sb'oan yaj oval d'a eb' schon̈ab', tz'oc' sc'ol d'a eb' schecab'.

¹⁵A sdiosal eb' ch'oc chon̈ab'il, nab'a oro, nab'a plata, anima sb'oani.

¹⁶Ay sti' sdiosal eb' chi', palta max lolonlaj. Ay sat, palta max yil-laj.

¹⁷Ay schiquin, palta max yab'laj, max yic'laj yic'.

¹⁸A eb' sb'oan juntzan̈ yechel chi' yed' eb' tz'ac'anoch d'a sc'ool, lajan eb' yed'oc.

¹⁹Ex vetisraelal, calec vach' lolonel d'a Jehová. Ex sacerdote, ex yin̈tilal vin̈aj Aarón, alec vach' lolonel d'a Jehová.

²⁰Ex yin̈tilal vin̈aj Leví, alec vach' lolonel d'a Jehová. Mach ex ay yelc'och Jehová d'a e sat, alec vach' lolonel d'ay.

²¹Aljocab' vach' lolonel d'a Jehová d'a Sion, aton d'a Jerusalén b'aj cajan. Calec vach' lolonel d'a Jehová.