Read Chuj San Mateo Sal 138 Bible Online

Sal 138 - Chuj San Mateo bible

Sal 138

¹Sb'it jun tic vin̈aj David. Mamin Jehová, d'a smasanil in c'ool ol vac' yuj diosal d'ayach, ol ach in b'itej d'a yichan̈ juntzan̈ dios.

²Ol in em cuman d'ayach d'a stojolal a templo to icn̈ej yaji, yuj vac'an yuj diosal d'ayach yuj a vach'c'olal, yujto tzaq'uelc'och tas tzala'. Ix ic'chaan̈ a b'i yed' a lolonel d'a yib'an̈ masanil tastac.

³Ix ach tac'vi d'ayin ayic ix in avaj d'ayach, ix ac'an vip.

⁴Masanil eb' rey d'a yolyib'an̈q'uinal tic, ol yal vach' lolonel eb' d'ayach ayic ol yab'an eb' tas alnaccani.

⁵Ol yal vach' lolonel eb' d'ayach yuj tastac a b'onac, yujto te nivan yelc'och a b'inajnaquil.

⁶Vach'chom te nivan elc'ochi, palta tz'oc' a c'ol d'a eb' anima emnaquil yeq'ui, axo eb' syic'chaan̈ sb'a, max ach b'atlaj q'uelan d'a eb'.

⁷Ayic ay in ec' d'a scal tas ay smay, pitzan inn̈ej uuj, tzac'ancot a poder, tzin a colanel d'a yoval eb' ayoch ajc'olal d'ayin.

⁸Ach Jehová, ol ach och ved'oc yic vach'n̈ej tzin elc'och d'a tas tza na d'ayin. A a vach'c'olal ayn̈ejec' d'a masanil tiempo. A tastac ix iq'uel yich d'ayin, mocab' can xepan.