Read Chuj San Mateo Sal 140 Bible Online

Sal 140 - Chuj San Mateo bible

Sal 140

¹Sb'it jun tic vin̈aj David sb'itej vin̈ cuchb'um d'a b'it. Mamin Jehová, colinel d'a yol sc'ab' eb' sc'ulan chucal, c'ub'ej in el d'a eb' b'aj malaj yelc'och a c'ayb'ub'al,

²yed' d'a yol sc'ab' eb' naann̈ej chucal yuuj, yujto an̈ej oval sna eb' d'a masanil tiempo.

³A sti' eb' icha val sti' noc' chan, a tas syal eb' icha val svenenoal sti' junoc noc' chan smilan anima.

⁴Mamin Jehová, c'ub'ej in el d'a eb' sc'ulan chucal, eb' malaj yelc'och a c'ayb'ub'al d'ay, eb' naann̈ej yuuj tas tz'aj in yac'an telvoc.

⁵A juntzan̈ eb' anima syic'chaan̈ sb'a chi', ix yaq'uem yaal eb' d'a yol in b'e.

⁶Mamin Jehová, a d'ayach ix vala': In Diosal ach, ab' tas svala' ayic tzin avaji svalan in b'a d'ayach.

⁷Mamin Dios, ach Vajalil, in Columal to syaln̈ej uuj, a ach ton tzin a col d'a scal oval, xin chi.

⁸Mamin Jehová, man̈ ac' sgana eb' sc'ulan chucal, man̈ ac' sgana spensar eb' yic max yic'chaan̈ sb'a eb'. A eb' tzoymajoch d'ayin, sna tastac eb', palta aocab' tas sna eb' chi' scot d'a yib'an̈.

¹⁰Emocab' tzac'ac' chac xilinac d'a yib'an̈ eb', b'atocab' eb' d'a scal c'ac'. Yumjocab'b'at eb' d'a yol xab' olan, b'aj maxtzac yal-laj sq'ueta eb'.

¹¹Mocxob' cajnajec' eb' alum chucal lolonel d'a sat luum tic. Javocab' yaelal d'a yib'an̈ eb' malaj yelc'och a c'ayb'ub'al d'ay, satocab'el eb'.

¹²Vojtac a in tic to a ach tza b'o yaj yoval eb' meb'a', tza colanel eb' d'a yol sc'ab' eb' tz'ic'ancanec' junoc tas d'a eb'.

¹³A eb' anima vach' spensar, ol yal vach' lolonel eb' d'ayach. A eb' anima tojol sb'eyb'al, ol ajn̈ejec' eb' d'a ichan̈.