Read Chuj San Mateo Sal 21 Bible Online

Sal 21 - Chuj San Mateo bible

Sal 21

¹Sb'it jun tic vin̈aj David. Mamin Jehová, a in rey in tic, tzin tzalaji, yujto syal uuj smasanil. Yelxo val tzin te tzalaji, yujto uuj val ix vac' ganar.

²Ix a b'o tas snib'ej in c'ool, maj a tenec'laj tas ix in c'ana'.

³Te nivan vach'il ix ac' d'ayin, ix ac'anq'ue jun corona oro d'a in jolom.

⁴Ix in c'an d'ayach to tzac' najatb'oc in q'uinal, a achxo ix ac' d'ayin.

⁵Te b'inajnac in yuj a colval. Uuj val syal vuuj, ay pax in tziquiquial.

⁶Man̈ jantacoc a vach'c'olal ix ac' d'ayin d'a masanil tiempo. Ste tzalaj in c'ool d'a ichan̈.

⁷Mamin Jehová, ec'al ach d'a yib'an̈ masanil, yujto a a vach'c'olal ayoch yipoc in c'ool, yuj chi' malaj b'aq'uin̈ ol in ac'joc ganar.

⁸Mamin rey, ol a yam masanil eb' ayoch ajc'olal d'ayach, aton eb' malaj sgana tzach yila'.

⁹Ayic ol a ch'oxan a b'a d'a scal eb', ol a satancanel eb', icha val tz'aj junoc tas slajviel yuj c'ac'. A Jehová ol satanel eb' yed' yoval sc'ool, axo c'ac' ol ac'an lajvoquel eb'.

¹⁰A yuninal eb' ajc'ool chi' yed' eb' yin̈tilal eb', ol a satcanel eb' d'a scal anima d'a sat luum tic.

¹¹Vach'chom ix snib'ej eb' ix ach yixtej, ix say val modo eb' tas tz'aj ach yac'an ganar, palta maj yal-laj yuj eb',

¹²yujto a ach tic ix a pechcanb'at eb' ayic ix och ijan a jul-lab' d'a eb'.

¹³Mamin Jehová, ach ic'jocab'chaan̈ yujto masanil syal uuj. Ol co b'itej ipalil.