Read Chuj San Mateo Sal 38 Bible Online

Sal 38 - Chuj San Mateo bible

Sal 38

¹A jun b'it tic sb'itaj yuj vin̈ cuchb'um d'a b'it, yic snaancot Dios tastac tzon̈ ic'ani. Sb'it jun tic vin̈aj David. Mamin Jehová, man̈ ac' in yaelal yuj yoval a c'ool. Man̈ ac' in yaelal yacb'an aycot a c'ac'alc'olal.

²Toxo ix och tzolan a jul-lab' d'ayin, ix ac'och in yaelal.

³A yuj yoval a c'ool chi', masanil in nivanil tic te ya' ay svab'i, yujn̈ej to ix och in mul d'ayach.

⁴A in chucal ichato c'ojanq'ue d'a vib'an̈ icha icatz, maxtzac techajlaj vuuj.

⁵Yujn̈ej in pital, vanxo sq'ue sjab' vechen yujto van sc'ab'ati.

⁶N̈ojan in emi tzin b'eyi. Juneln̈ej lachan vaji. Maxtzac och vaan jab'oc in cusc'olal.

⁷Van in cham yuj q'uixvelal svab'i. Masanil in nivanil te ya ay svab'i.

⁸Ix te b'uychaj in nivanil tic, man̈xalaj jab'oc yip. Tzin c'acvi yuj vilc'olal.

⁹Mamin Vajalil, ojtac masanil tas tzin nib'ej. Ayic sic'son sja in c'ool, ichan̈ yaj jun tic.

¹⁰Toxon̈ej ste tin̈tin̈an in pixan yab'an syail. Numumi yel vip, maxtzac yal-laj vilani.

¹¹A eb' anima vach' vac'an yed'oc yed' eb' junn̈ej tzin ec' yed'oc, najat sb'esel sb'a eb' d'ayin. A eb' cajan d'a in lac'anil, najat sb'esel sb'a eb' d'ayin yuj in yaelal.

¹²A eb' sgana in smilanchamoc, van yac'anem in yaalil eb'. A eb' snib'an yac' chucal d'ayin, an̈ej chucal syal eb' d'a in patic. Max ochlaj vaan eb' snaub'tan̈an tas ol in yutoc d'a elc'altac.

¹³A inxo pax jun, ichato macan in chiquin, max vab'laj tas syal eb', ichato max ujilaj in loloni, malaj tas tz'elta d'a in ti'.

¹⁴Lajan in icha junoc mach max yab'laj, max yal-laj yalan sb'a.

¹⁵Mamin Jehová in Diosal, a achn̈ej tzach vac'och yipoc in c'ool, a ach ol in a tac'vej.

¹⁶A jun tic tzin c'an d'ayach: Mocab' in stzetzej eb' ajc'ol chi'. Mocab' b'itan eb' yuj tzalajc'olal tato tzin ac'ji ganar.

¹⁷Palta ijanxo val tzin ac'ji ganar svab'i. Max och vaan jab'oc in yaelal tic.

¹⁸Ol valq'ueta in mul. Man̈xo in animaoc svab' yuj in chucal.

¹⁹A eb' ajc'ol sgana in chami, toxo ix te q'uib' sb'isul eb'. Man̈xo jantacoc ix te aj eb' tzin chacani, vach'chom malaj in mul d'a eb'.

²⁰Chucn̈ej syutej sb'a eb' d'ayin yuj in vach'c'olal d'a eb'. Yujn̈ej to tzin b'eyb'alej vach'il, tz'och eb' ajc'olal d'ayin.

²¹Mamin Jehová, man̈ in actejcani. Ach in Diosal, man̈ a b'esel a b'a d'ayin.

²²Ach Vajalil, ach in Columal, cotan̈ d'a elan̈chamel tzin a colani.