Read Chuj San Mateo Sal 4 Bible Online

Sal 4 - Chuj San Mateo bible

Sal 4

¹Ayic sb'itan jun b'it tic vin̈ cuchb'um yic b'it, a yamc'ab' ay sch'an̈al sc'anchaji. Sb'it jun tic vin̈aj David. Ach in Diosal, a ach tza b'o yaj in lolonel, tac'vej in ayic tzin avaj d'ayach. Ayic ay in och d'a syaelal ix in a colani. Oc'ocab' a c'ool d'ayin ticnaic, ab' tas sval d'a in lesal tic.

²Ex vetanimail, ¿b'aq'uin̈ ol eyactejcan eyalan in pecal? ¿B'aq'uin̈ ol eyactejcan eyalan lolonel malaj yelc'ochi? ¿B'aq'uin̈ ol eyactejcan e sayan tas man̈ yeloc?

³Ab'ec, a Jehová ix sic'ancanel eb' anima ayoch spensar d'ay, yic vach' tz'och eb' yicoc. Ayic tzin avaj d'ay, stac'vi d'ayin.

⁴Xivan̈ec d'a Dios, yic man̈xo ol och e mul. Ayic jichan ex eq'ui, a val yic te numan, tze b'eyc'olan e b'a.

⁵Aq'uec och Jehová yipoc e c'ool, aq'uec e silab' d'ay icha val d'a smojal.

⁶Tzijtum eb' tz'alani: ¿Mach ol ch'oxan svach'il d'ayon̈? xchi eb'. Mamin Jehová, ch'ox a vach'c'olal d'ayon̈.

⁷A ach ix ac'cot tzalajc'olal d'ayin, ec'to d'a yichan̈ stzalajc'olal eb' nivan tas syic' d'a smunlajel.

⁸Malaj tas tzin na' ayic tzin ec' jichan, te junc'olal tzin vayi. Mamin Jehová, a ach ton ayach och ved'oc, yuj chi' malaj tas tzin ic'ani.