Read Chuj San Mateo Sal 47 Bible Online

Sal 47 - Chuj San Mateo bible

Sal 47

¹Sb'it jun tic eb' yin̈tilal vin̈aj Coré. Tz'itec e c'ab' e masanil ex nación. Avajan̈ec d'a Dios d'a tzalajc'olal.

²Yujto a Jehová, ec'to d'a yib'an̈ smasanil, sat co c'ool yuj stziquiquial. Aton Yajalil d'a smasanil yolyib'an̈q'uinal tic.

³Ix laj can juntzan̈ nación d'a yalan̈ yuuj, ix yac'ancanoch d'a yol co c'ab'.

⁴A' ix sic'anel lum luum b'aj stzalajb'i co c'ool a on̈ yin̈tilal on̈ vin̈aj Jacob tic, a on̈ ton te xajan on̈ yuuj.

⁵A Jehová Dios toxo ix q'uec'och d'a sc'ojnub' d'a scal av yic tzalajc'olal yed' d'a scal yic van yoc' q'uen trompeta.

⁶Con̈ b'itanec, con̈ b'itanec d'a co Diosal. Con̈ b'itanec, con̈ b'itanec d'a co Reyal.

⁷Con̈ b'itanec d'a aloj vach' lolonel d'a Dios, yujto a' Yajal yaj d'a smasanil yolyib'an̈q'uinal tic.

⁸A Dios ayoch Yajalil d'a smasanil nación. C'ojanem d'a sc'ojnub' to an̈ej ay yico'.

⁹Ix smolb'ej sb'a eb' anima nivac yopisio d'a scal nación. Ix och eb' co tz'acub'oc a on̈ schon̈ab' on̈ sDiosal co mam quicham Abraham.

¹⁰A Dios ay yic eb' yajal d'a yolyib'an̈q'uinal tic. A' te nivan yelc'och d'a yib'an̈ smasanil.