Read Chuj San Mateo Sal 52 Bible Online

Sal 52 - Chuj San Mateo bible

Sal 52

¹Aton sb'it vin̈aj David sb'itej ayic ix c'och vin̈aj Doeg aj Edom yal d'a vin̈aj Saúl to ix ec' vin̈aj David d'a spat vin̈aj sacerdote Abimelec. A jun b'it tic tzon̈ c'ayb'ani, sc'an vin̈ cuchb'um d'a b'it. Ach to jelan ach d'a oval, ¿tas yuj tzic'chaan̈ a b'a d'a a chucal? A svach'c'olal Dios ayn̈ejec' d'a smasanil tiempo.

²An̈ej chucal a gana tza c'ulej. A a ti' tzac'lab'ej d'a lolonel man̈ yeloc, icha val junoc q'uen cuchilub' te jay ye syac'lab'ej junoc anima smil-lab'oc.

³A chucal a gana d'a yichan̈ vach'il. A lolonel es a gana d'a yichan̈ lolonel yel.

⁴Ach anima chab' sat, a val lolonel yic tz'ixtan anima a gana.

⁵Palta a Dios ol ach satanel d'a juneln̈ej. Ol och yub'naj d'ayach, ol ach yic'ancanel d'a a pat, ol yic'anel a q'uinal.

⁶A eb' sc'anab'ajan Dios ol yil jun tic eb', ol xiv eb' d'ay, palta ol b'uchvaj eb' d'a jun vin̈ chuc chi'.

⁷Ol yalan eb': Ilec val vin̈ maj ac'anoch Dios yipoc sc'ool. An̈ej val d'a nivac b'eyumal ix yac'och sc'ol vin̈, ayn̈ejoch spensar vin̈ sc'ulan chucal, xcham eb'.

⁸A inxo tic, lajan in icha junoc te' olivo te yaax, vach' sq'uib' d'a yamaq'uil stemplo Dios. An̈ej svach'c'olal Dios ol vac'och yipoc in c'ool.

⁹Ach in Diosal, ol vac'n̈ej yuj diosal yuj a vach'c'olal d'ayin. Tzach vac'n̈ejoch yipoc in c'ool yujto vach' ach. Ol valel ab'ixal d'a yichan̈ eb' icxo, to toxonton vach' ach.