Read Chuj San Mateo Sal 8 Bible Online

Sal 8 - Chuj San Mateo bible

Sal 8

¹Sb'itaj jun b'it tic icha sjajil b'it sb'itaji ayic stec'jiel yal sat te' uva. Sb'it jun tic vin̈aj David. Mamin Jehová, Cajalil ach. Te b'inajnac ach, te nivan elc'och d'a sat luum tic. Icha pax chi' tz'aj yalchaj vach' lolonel d'ayach d'a satchaan̈.

²A eb' unin yed' eb' tzato chuni tzac'lab'ej yic syalan ipalil eb', yic vach' tz'em numnaj eb' pit, eb' ajc'ool yajoch d'ayach.

³A val yic tzin q'ue q'uelan d'a satchaan̈ b'ob'il uuj, b'aj ay q'uen uj yed' q'uen c'anal a b'onac,

⁴tzin naan d'a yol vico': ¿Tas val jab'oc quelc'och a on̈ anima on̈ tic, yuj chi' tzon̈ a nacoti, tzon̈ a tan̈van yuj co vach'iloc?

⁵Ejminac ix on̈ utejcan janic' d'a yichan̈ eb' ángel ayic ix on̈ a b'oani, palta nivan quelc'och yuj copisio ix ac'a'.

⁶Ix ac' copisio d'a yib'an̈ tas ix a b'o'o. Ix ac'anoch masanil tastac b'ob'il uuj d'a yol co c'ab'.

⁷Ix ac'canoch masanil macan̈il noc' noc' d'a yol co c'ab': Noc' calnel, noc' vacax, noc' c'ultaquil noc',

⁸noc' much tz'ec' jen̈en̈oc d'a satchaan̈, noc' chay ay d'a yol a' mar yed' masanil noc' tz'ec' d'a yol a a' chi'.

⁹Mamin Jehová, Cajalil ach. Te b'inajnac ach, te nivan elc'och d'a sat luum tic.