Read Chuj San Mateo Sal 98 Bible Online

Sal 98 - Chuj San Mateo bible

Sal 98

¹B'itejec ac' b'it d'a Jehová. Ilecnab' tas satub'tac ix sc'ulej. A' ix on̈ colan a on̈ schon̈ab' on̈ tic yed' yipalil axon̈ej ochi.

²Ix sch'oxel scolval Jehová, ix sch'oxan yil juntzan̈ nivac nación to tojol syutej spactzitan d'a eb' ajc'ol yajoch d'ay.

³Ix eln̈ejc'och tas ix yal d'ayon̈ a on̈ schon̈ab' Israel on̈ tic. Ix yac'cot svach'c'olal d'ayon̈. Masanto d'a slajvub' yolyib'an̈q'uinal tic ix ilchaji to ix on̈ colchaj yuj co Diosal.

⁴Ex cajan ex d'a masanil sat luum tic, b'itanan̈ec d'a Jehová d'a tzalajc'olal. Aq'uec eyip e b'itan d'ay d'a tzalajc'olal.

⁵B'itejec b'it d'a Jehová yed' te' arpa yed' te' ay sch'an̈al.

⁶B'itanan̈ec d'a Jehová co Reyal d'a tzalajc'olal. B'itanan̈ec, tze pu'an q'uen trompeta, tze pu'anpax noc' ch'aac.

⁷B'itanocab' a' mar yed' masanil noc' noc' ay d'a yol a'. B'itanocab'pax yolyib'an̈q'uinal tic yed' eb' cajan d'ay.

⁸C'an̈ocab' a' nivac a' yuj tzalajc'olal. Junlajanocab' tz'aj yavaj lum nivac vitz d'a tzalajc'olal d'a yichan̈ Jehová,

⁹yujto ol javoc, ol ul yac'an Yajalil d'a yolyib'an̈q'uinal tic. A' ol ac'an Yajalil, junlajan ol yutoc sch'olb'itan juntzan̈ chon̈ab' d'a stojolal.