Read Chuj San Mateo Lm 3 Bible Online

Lm 3 - Chuj San Mateo bible

Lm 3

¹A in tic, nivan val ix aj vab'an syail yuj yoval sc'ol Dios.

²Ix in spechb'at d'a scal q'uic'alq'uinal b'aj juneln̈ej q'uic'olinac. Ix in yac' b'ey d'a yoltac b'e b'aj malaj saquilq'uinal.

³Masanil c'u ichan̈ej tic in smac'an yed' yoval sc'ool.

⁴Ix yac' ichamax in nivanil, choc'xon̈ej ix yutejcanb'at in b'aquil.

⁵Ix in smacchej yed' yaelal yed' cusc'olal.

⁶Ix in yac' aj d'a scal q'uic'alq'uinal, icha yaj eb' chamnacxo.

⁷Ix in smacchej b'aj man̈xa b'aj syal veli. Yed' val q'uen nivac cadena ix in stzec'a'.

⁸Vach'chom tz'el vav in c'anan scolval, max scha yab' tas tzin c'an d'ay.

⁹Ix smac in b'e yed' q'uen q'ueen, yuj chi' axon̈ej d'a q'uex b'e tzin b'ati.

¹⁰Lajan ix yutej sb'a Jehová d'ayin icha junoc noc' oso sc'ub'ejel sb'a, icha junoc noc' choj tz'elta jucnaj d'ayin.

¹¹Ix in sn̈erel d'a yol b'e yic choc' tzin yutejcanb'ati, ix in actajcan yuuj.

¹²Ix sb'o'och sjul-lab', ix can ijan d'ayin yed' sjul-lab' chi'.

¹³A sjul-lab' ix sjulcot d'ayin, ix c'axpaj d'a yol in c'ool.

¹⁴Masanil eb' vetanimail sb'uchvaj d'ayin, a inxon̈ej tzin yal eb' d'a scal slolonel.

¹⁵D'a val syaelal ix in ajec' yuj Dios. Te c'a' tas ix yac' vuq'uej.

¹⁶Ix el vecnaj q'uen ve ayic ix in em latnaj d'a sat lum yuuj, ix in can telan d'a cal pococ.

¹⁷Man̈xalaj in junc'olal, man̈xo naanoc tzalajc'olal vuuj.

¹⁸Svalani to man̈xa in tec'anil, yujto man̈xo ayococh Jehová yipoc in c'ool.

¹⁹A tzin naancot in cuselal yed' vec' in ch'ocojil, te ya svab'i.

²⁰A val yic tzin naancot juntzan̈ chi', man̈xo animaoc tzin aj svab'i.

²¹Palta ay jun tas tzin nib'ej, ayn̈ejec' d'a in pensar, aton jun chi' in gana svac'n̈ejoch yipoc in c'ool.

²²Aton val yuj svach'c'olal Jehová max on̈ sateli, yujto tz'oc'n̈ej sc'ool d'ayon̈.

²³Junjun q'uin̈ib'alil scheclaj svach'c'olal Jehová, syaln̈ej cac'anoch d'a co c'ool.

²⁴Yuj chi' svala' to icha in macb'en yaj Jehová, an̈ej ayoch yipoc in c'ool.

²⁵A eb' tz'ac'anoch Jehová d'a sc'ool, te vach' Jehová chi' d'a eb', aton eb' to sb'ec val och sb'a d'a yol sc'ab'.

²⁶Te vach' tato numan tzon̈ aj co tan̈vani masanto scolvaj Jehová d'ayon̈.

²⁷Yelxo vach' tato ayic unin animaon̈to scac'anoch co b'a d'a yalan̈ smandar Dios.

²⁸Vach' tato numan tzon̈ aj co ch'ocoj yacb'an syac'och co yaelal Jehová.

²⁹Yovalil tzon̈ och ejmelal, tzon̈ em n̈ojan d'a sat luum, talaj tz'oc' sc'ol Jehová d'ayon̈.

³⁰Vach'chom tzon̈ mac'ji, tzon̈ b'uchji, palta co chaocab'i.

³¹Max on̈ yactejcan Jehová d'a juneln̈ej.

³²Vach'chom syac'och co yaelal, palta tz'oc'pax sc'ool d'ayon̈, yujto te nivan svach'c'olal.

³³Val yel malaj sgana syac'och co cusc'olal yed' co yaelal.

³⁴A Jehová Dios Axon̈ej Ochi, malaj sgana tz'ixtaj eb' anima d'a preso,

³⁵malaj pax sgana tz'ic'jiel sderecho eb' ac'b'il yuuj.

³⁶Man̈ vach'oc d'a sat Dios tato max ch'olb'itaj eb' anima d'a stojolal.

³⁷Max elc'ochlaj tas sco na' tato man̈oc Jehová tz'alani.

³⁸Max javilaj vach'ilal ma yaelal, tato man̈oc Dios Axon̈ej Och tz'alani.

³⁹¿Tas yuj chuc scab'i tato yuj co chucal syac' co yaelal Dios?

⁴⁰Co b'eyc'olejec val co b'a sic'lab'il, chajtil yilji co b'eyb'al, scac'anxioch co b'a d'a yol sc'ab' Jehová.

⁴¹Caq'uecb'at co pensar d'a Dios aj satchaan̈, scalan d'a co lesal icha tic:

⁴²Ix och co mul, ix co pitej co b'a d'ayach, maj on̈ ac' nivanc'olal.

⁴³Ix javi yoval a c'ol d'ayon̈, ix on̈ a pechani, ix on̈ a sateli, majxo oc'laj a c'ool d'ayon̈.

⁴⁴Ix a c'ub'ejel a b'a, najat ach b'atcan d'ayon̈ yic maxtzac ab' co lesal.

⁴⁵Icha c'alem ix on̈ utej d'a scal masanil anima.

⁴⁶Masanil eb' cajc'ool, ix on̈ sb'uchval eb'.

⁴⁷Tzon̈ te xivi yujto a eb' ajc'ol d'ayon̈ tzon̈ syam eb', tzon̈ yixtan eb', tzon̈ satanel eb', xco chi.

⁴⁸Tz'el val jiljon yal in sat voc' yuj cusc'olal, yujto van satel eb' vetchon̈ab'.

⁴⁹Man̈ ol vactej voc' yuj vab'ann̈ej syail

⁵⁰masanto ol yac'cot svach'c'olal Jehová d'ayon̈ d'a satchaan̈.

⁵¹Te yaxo pax svab' yed' in pixan yuj tas tz'ec' d'a yib'an̈ eb' ix ix d'a yol in chon̈ab'.

⁵²A eb' ajc'ool, tzin spech eb' vach'chom malaj jab'oc in mul. Icha tz'aj spechji junoc noc' much icha chi' tzin yutej eb'.

⁵³Pitzan in val ix in syumanem eb' d'a yol jun jul, ix smacancan sti' jun jul chi' eb' yed' jun q'uen q'ueen, man̈xa b'aj syal veli.

⁵⁴Ichato ay in em d'a yol a a', ix in naani to yicxo chamel vaji.

⁵⁵Mamin Jehová, ato d'a sjulal yich jun jul tic tzin avaj d'ayach.

⁵⁶Ab' yoch in jaj, man̈ actej ab'an in tevi.

⁵⁷Ix a nitzcot a b'a d'ayin ayic ix ach vavtani, ix alan d'ayin: Man̈ ach xivoc, xa chi.

⁵⁸Mamin, ix in a colcanel d'a yol sc'ab' chamel.

⁵⁹Mamin Jehová, ojtac tas tzin utaj d'a man̈ stojolaloc tic. B'o yaj d'ayin d'a stojolal.

⁶⁰Ojtac tas snib'ej eb' ajc'ol d'ayin yed' tas sna eb' tzin yutej.

⁶¹Mamin Jehová, ix ab' jantac chucal syal eb' d'a in patic yed' jantac tas sna eb' tzin yutej.

⁶²Jun c'u syac' eb' in yalub'tan̈ani, snaan eb' tas ol in yutoc.

⁶³Ilnab' val, c'ual d'ac'val in sb'uchan eb'.

⁶⁴Mamin Jehová, ac' spac d'a eb' icha val smojalil yuj tas tzin yutej.

⁶⁵Ac' pitb'oquel spensar eb', tzac'anb'at catab' d'a yib'an̈ eb'.

⁶⁶Mamin, pech eb' yed' yoval a c'ool. Satel eb' d'a yolyib'an̈q'uinal tic.