Read Chuj San Mateo Ez 48 Bible Online

Ez 48 - Chuj San Mateo bible

Ez 48

¹A stz'acan̈il Israel d'a norte, schael d'a a' mar Mediterráneo, tz'ec' d'a Hetlón yed' b'aj tz'och b'e d'a Hamat yed' d'a Hazar-enán, tz'ec' d'a stojolal sur d'a lum yic Damasco yed' Hamat chi'. Junjun macan̈ yin̈tilal Israel scha junoc macan̈ lum luum smacb'enoc, sb'at stz'acan̈il lum d'a stojolal b'aj sjavi c'u, masanto sc'och d'a a' mar Mediterráneo, d'a stojolal b'aj tz'em c'u. Icha tic ol aj schaan lum smacb'en eb' chi' d'a stzolal, schael yich d'a norte scotn̈ej d'a sur: Dan, Aser, Neftalí, Manasés, Efraín, Rubén yed' Judá.

⁸A d'a stz'ey lum smacb'en Judá, ata' ay jun lum sic'b'ileli: 12 kilómetro yed' nan̈alxo sat luum. Axo steel luum, lajan yed' steel lum smacb'en junjun in̈tilal, scot d'a stojolal b'aj sjavi c'u masanto d'a stojolal b'aj tz'em c'u. A d'a snan̈al lum chi', ata' ay in templo.

⁹A d'a jun lum luum vic yaj chi', ay jun macan̈ luum, 12 kilómetro yed' nan̈alxo steel luum, oye' kilómetro pax sat luum. A d'a snan̈al lum chi', ata' ay in templo.

¹¹A jun lum chi', yic lum eb' sacerdote ayoch in yac'an servil, aton eb' yin̈tilal vin̈aj Sadoc, eb' maj tzac'laj d'a spatic eb' yetisraelal ayic in yactancan eb', icha ix yutej sb'a eb' yetlevitail eb'.

¹²A d'a sti' lum yic eb' sacerdote chi', ata' ay lum yic eb' levita. A lum chi', 12 kilómetro yed' nan̈alxo steel luum, oye' kilómetro pax sat luum. A lum vic yaj chi', 12 kilómetro yed' nan̈alxo steel luum, 10 kilómetro sat luum.

¹⁴A jun macan̈ lum chi' an̈ej lum te vach' d'a yol nación chi'. Malaj junoc macan̈ lum chi' syal schon̈chajeli. Max yal-laj sq'uexchaj luum, max yalpaxlaj yac'chaj lum d'a junocxo anima, yujto vic yaj luum.

¹⁵Ay junxo macan̈ luum d'a scostil lum vic yaj chi', 12 kilómetro yed' nan̈alxo steel luum, nan̈al yoxil kilómetro sat luum, comon yaj luum. A d'a snan̈al yol lum chi', ata' ay nivan chon̈ab'. Axo jantacto lum colan scani, syal scajnaj anima, syal pax sva noc' noc' ta'. A jun chon̈ab' chi', 2 mil 250 metro schan̈il pac'an̈. A d'a spatictac chon̈ab' chi', ay jab'xo lum luum oyaneq'ui, 125 metro sat luum. A noc' noc' sva d'a jab'xo lum luum chi'. A d'a jun pac'an d'a stojolal b'aj sjavi c'u d'a jun chon̈ab' chi', ay jun macan̈ lum luum, oye' kilómetro steel luum. An̈eja' d'a stojolal b'aj tz'em c'u, ay pax junxo macan̈ luum, oye' kilómetro pax steel luum. A d'a juntzan̈ lum chi' smunlaj anima ay d'a chon̈ab' chi', axo sat yavb'en eb' smolo', a syab'lej eb'.

¹⁹Yaln̈ej mach anima d'a yic junjun macan̈ yin̈tilal Israel smunlaj d'a yol chon̈ab' chi', syal smunlaj eb' d'a chab' macan̈ lum chi'.

²⁰Masanil lum vic yaji yed' lum yic jun nivan chon̈ab' ay d'a snan̈al jun lum sic'b'ilcanel chi', 12 kilómetro yed' nan̈alxo lum d'a schan̈il pac'an̈.

²¹A vin̈ yajal chon̈ab' chi', a vin̈ tz'ican lum aycan d'a snan̈al lum smacb'en Judá yed' lum smacb'en Benjamín, syalelc'ochi, aton lum ay d'a stz'eytac lum vic yaji yed' d'a stz'ey lum yic chon̈ab'. Ay jun macan̈ luum d'a stojolal b'aj sjavi c'u, 12 kilómetro yed' nan̈alxo sat luum, sb'atn̈ej lum d'a tz'acan̈ d'a stojolal b'aj sjavi c'u chi'. Axo pax d'a stojolal b'aj tz'em c'u ay junxo macan̈ luum, masanto d'a a' mar Mediterráneo sc'och luum. A d'a scal chab' macan̈ lum chi', ata' ay lum vic yaji, aton lum b'aj ay in templo yed' lum yic eb' sacerdote yed' pax lum yic eb' levita. Ata' ay pax lum b'aj ay nivan chon̈ab'.

²³A lum smacb'en juntzan̈xo macan̈ yin̈tilal Israel, sb'atn̈ej d'a sur. Junjun in̈tilal ol scha junjun macan̈ sluum, schael d'a tz'acan̈ d'a stojolal b'aj sjavi c'u masanto sc'och d'a tz'acan̈ d'a stojolal b'aj tz'em c'u. Icha tic ol aj schaan smacb'en eb' chi' d'a stzolal: Benjamín, Simeón, Isacar, Zabulón yed' Gad.

²⁸A d'a stojolal sur ay lum smacb'en Gad, a stz'acan̈il luum, schael d'a Tamar, tz'ec' d'a sjaj a a' yic Meriba-cades, d'a a' eluma' yic Egipto, masanto sc'och d'a a' mar Mediterráneo.

²⁹Aton jun lum chi' ol scha juntzan̈ yin̈tilal Israel smacb'enoc. Icha chi' ol aj e pucanec' luum.

³⁰A jun chon̈ab' d'a snan̈al luum chi', ayoch muro d'a spatictac. A muro chi', 2 mil 250 metro yaj junjun pac'an̈, lajan yaj schan̈il pac'an̈. A d'a junjun pac'an̈ ay oxe' puerta. A d'a junjun puerta chi' ayoch sb'i junjun yin̈tilal Israel, icha tic yaj stzolal: A d'a oxe' puerta d'a stojolal norte, ayoch sb'i yic Rubén, yic Judá yed' yic Leví. A d'a oxe' puerta d'a stojolal b'aj sjavi c'u, ayoch sb'i yic José, yic Benjamín yed' yic Dan. A d'a oxe' puerta d'a stojolal sur, ayoch sb'i yic Simeón, yic Isacar yed' yic Zabulón. Axo pax d'a oxe' puerta d'a stojolal b'aj tz'em c'u, ayoch sb'i yic Gad, yic Aser yed' yic Neftalí.

³⁵A jun muro chi' 9 kilómetro yajoch d'a spatictac nivan chon̈ab' chi'. A sb'i jun chon̈ab' chi' ayic ol b'eyn̈ejb'atoc: A Jehová ayec' d'a tic, ol sb'iej, xchi Jehová, xin chi.