Read Chuj San Mateo Nm 1 Bible Online

Nm 1 - Chuj San Mateo bible

Nm 1

¹A d'a b'ab'el c'ual, d'a schab'il uj yic schab'il ab'il yelta eb' israel d'a Egipto, ix lolon Jehová d'a vin̈aj Moisés d'a tz'inan lum Sinaí, aton b'aj ay scajnub' Jehová Dios b'aj sch'ox sb'a. Ix yalan icha tic:

²Ic'chaan̈ sb'isul eb' vinac d'a scal eb' etchon̈ab' israel, ato syal junjun macan̈ yaj eb' aton eb' ayto yuj sb'a, yic vach' tz'ilji jantac eb' yed' tastac sb'i eb'.

³Sb'ischaj eb' 20 ab'il sq'uinal, sb'eyn̈ejb'ati, aton eb' smoj val sb'at d'a oval, tz'ac'chajoch eb' d'a macquiltaquil. Colvajocab' vin̈aj Aarón ed'oc,

⁴yed' pax junjun yajalil junjun in̈tilal.

⁵Aton sb'i juntzan̈ eb' yajal yovalil scolvaj ed'oc tic: A d'a yin̈tilalcan vin̈aj Rubén, aton vin̈aj Elisur yuninal vin̈aj Sedeur. A d'a yin̈tilalcan vin̈aj Simeón, aton vin̈aj Selumiel yuninal vin̈aj Zurisadai. A d'a yin̈tilalcan vin̈aj Judá, aton vin̈aj Naasón yuninal vin̈aj Aminadab. A d'a yin̈tilalcan vin̈aj Isacar, aton vin̈aj Natanael yuninal vin̈aj Zuar. A d'a yin̈tilalcan vin̈aj Zabulón, aton vin̈aj Eliab yuninal vin̈aj Helón. A d'a eb' yin̈tilalcan vin̈aj José, a d'a eb' yic vin̈aj Efraín, aton vin̈aj Elisama yuninal vin̈aj Amiud, a d'a eb' yic vin̈aj Manasés, aton vin̈aj Gamaliel yuninal vin̈aj Pedasur. A d'a yin̈tilalcan vin̈aj Benjamín, aton vin̈aj Abidán yuninal vin̈aj Gedeoni. A d'a yin̈tilalcan vin̈aj Dan, aton vin̈aj Ahiezer yuninal vin̈aj Amisadai. A d'a yin̈tilalcan vin̈aj Aser, aton vin̈aj Pagiel yuninal vin̈aj Ocrán. A d'a yin̈tilalcan vin̈aj Gad, aton vin̈aj Eliasaf yuninal vin̈aj Deuel. A d'a yin̈tilalcan vin̈aj Neftalí, aton vin̈aj Ahira yuninal vin̈aj Enán, xchi Dios.

¹⁶Aton juntzan̈ eb' yajal tic ix sic'chajel d'a scal masanil yin̈tilal Israel.

¹⁷A d'a b'ab'el c'ual d'a schab'il ujal yic jun ab'il chi', ix smolb'ej juntzan̈ eb' vin̈ tic vin̈aj Moisés yed' vin̈aj Aarón, to satil tz'ajcan eb' vin̈ yuj Dios. An̈eja' ix molb'ajpax masanil eb' chon̈ab'. Icha chi' ix aj yic'jichaan̈ sb'isul eb' israel. D'a stzolal ix aj stz'ib'chaj sb'i eb', aton eb' 20 ab'il sq'uinal, sb'eyn̈ejb'ati, ato a' smacan̈il d'a junjun in̈tilal,

¹⁹icha ix aj yalan Jehová d'a vin̈aj Moisés. A d'a tz'inan luum d'a Sinaí ix ic'jichaan̈ sb'isul eb' chi'.

²⁰A d'a junjun in̈tilal, d'a junjun macquiltaquil, ix ic'jichaan̈ sb'isul eb' chi'. Ix tz'ib'chaj sb'i eb' yed' sb'isul eb' vinac tz'acanxo yab'ilal d'a 20 ab'il, yuj chi' aton val ix aj yelc'och tic: A d'a yin̈tilal vin̈aj Rubén, aton sb'ab'el yuninal vin̈aj Israel, 46 mil 500 eb' vinac smoj sb'at d'a oval.

²²A d'a yin̈tilal vin̈aj Simeón, ay 59 mil 300.

²⁴A d'a yin̈tilal vin̈aj Gad, ay 45 mil 650.

²⁶A d'a yin̈tilal vin̈aj Judá, ay 74 mil 600.

²⁸A d'a yin̈tilal vin̈aj Isacar, ay 54 mil 400.

³⁰A d'a yin̈tilal vin̈aj Zabulón, ay 57 mil 400.

³²Axo d'a yin̈tilalcan vin̈aj José: Ay 40 mil 500 d'a yin̈tilal vin̈aj Efraín, ay pax 32 mil 200 d'a yin̈tilal vin̈aj Manasés.

³⁶A d'a yin̈tilal vin̈aj Benjamín, ay 35 mil 400.

³⁸A d'a yin̈tilal vin̈aj Dan, ay 62 mil 700.

⁴⁰A d'a yin̈tilal vin̈aj Aser, ay 41 mil 500.

⁴²A d'a yin̈tilal vin̈aj Neftalí, ay 53 mil 400.

⁴⁴Aton ix aj yelc'och juntzan̈ sb'isul ix yic'chaan̈ vin̈aj Moisés tic, vin̈aj Aarón yed' lajchavan̈xo eb' yajal yaj d'a scal eb' israel d'a junjun in̈tilal.

⁴⁵Ix q'ue vaan juntzan̈ sb'isul chi' d'a junjun in̈tilal, d'a junjun macquiltaquil. A eb' israel, 20 ab'il sq'uinal sb'eyn̈ejb'ati, aton eb' chi' smoj sb'at d'a oval.

⁴⁶A d'a smasanil ay 603 mil 550 eb'.

⁴⁷A yin̈tilal vin̈aj Leví, maj ac'jiochlaj eb' sb'isuloc,

⁴⁸yujto a Jehová ix alan d'a vin̈aj Moisés:

⁴⁹Ayic ol ic'anq'ue vaan sb'isul chon̈ab' Israel tic, man̈ ol ac'ochlaj yin̈tilal vin̈aj Leví sb'isuloc.

⁵⁰Yujto a ex yin̈tilalexcan vin̈aj Leví chi', ol ex och yac'umaloc servil in cajnub' b'aj ayec' scaxail in trato yed' masanil syamc'ab'il. An̈eja' ex ol eyic'n̈ej b'ey in cajnub' chi' yed' masanil syamc'ab'il. Yovalil ol ex ajn̈ej cajan d'a spatic yichan̈ in cajnub' chi'.

⁵¹Ayic tz'ic'jib'at d'a juntac el, a ex tze xuyemi, tze b'oanpaxq'ue b'aj sc'och chi'. Yaln̈ej mach junoc anima man̈ levitaoc sjavi d'a slac'anil jun in cajnub' chi', tojoln̈ej schami.

⁵²Axo masanil juntzan̈xo yin̈tilal Israel ol cajnaj icha d'a stzolal, junjun eb' ol aj d'a scampamento, d'a yalan̈ sbandera.

⁵³A exxo pax yin̈tilal ex can vin̈aj Leví chi' jun, a d'a spatic yichan̈ in cajnub' ol ex ajoc. A ex ol e tan̈vej, yic vach' max cot voval d'a in chon̈ab' Israel, xchi Jehová.

⁵⁴Ix sc'anab'ajej eb' israel sc'ulan icha val ix aj yalan Jehová d'a vin̈aj Moisés chi'.