Read Chuj San Mateo Jos 21 Bible Online

Jos 21 - Chuj San Mateo bible

Jos 21

¹A eb' yajal yaj d'a scal eb' yin̈tilal Leví, ix b'at eb' d'a Silo d'a yol yic Canaán, yic sb'at yalan eb' d'a vin̈aj sacerdote Eleazar, d'a vin̈aj Josué yed' d'a eb' yajal yaj d'a junjun yin̈tilal eb' israel chi'. Ix yalan eb' icha tic: A Jehová aljinaccan d'a vin̈aj Moisés to tz'ac'ji co chon̈ab' b'aj tzon̈ aji yed' b'aj syal sva noc' co molb'etzal noc', xchi eb'.

³Yuj chi' ix yac' juntzan̈ chon̈ab' eb' yetisraelal eb' chi' d'ay. A juntzan̈ chon̈ab' chi' smasanil ix ac'ji slumal d'a spatictac b'aj syal sva noc' smolb'etzal noc' eb' icha ajnac yalan Jehová.

⁴D'a sb'ab'elal ix och suerte d'a jun macan̈ eb' levita yin̈tilal vin̈aj Coat, aton eb' sacerdote yin̈tilal vin̈aj Aarón. 13 chon̈ab' ix ac'ji d'a eb', aton juntzan̈ chon̈ab' ay d'a yol yic eb' yin̈tilal Judá, d'a yol yic eb' yin̈tilal Simeón yed' d'a yol yic eb' yin̈tilal Benjamín.

⁵An̈eja' juntzan̈xo eb' coatita chi', ix ac'ji lajun̈exo chon̈ab' d'a eb' d'a yol yic eb' yin̈tilal Efraín, d'a yol yic eb' yin̈tilal Dan yed' d'a yol yic nan̈alxo eb' yin̈tilal Manasés.

⁶Ix ac'jipax 13 chon̈ab' d'a eb' levita yin̈tilal Gersón d'a yol yic eb' yin̈tilal Isacar, d'a yol yic eb' yin̈tilal Neftalí yed' pax d'a yol yic nan̈alxo eb' yin̈tilal Manasés ay d'a Basán.

⁷Ix ac'jipax 12 chon̈ab' d'a eb' levita yin̈tilal Merari, d'a yol yic eb' yin̈tilal Rubén, d'a yol yic eb' yin̈tilal Gad yed' d'a yol yic eb' yin̈tilal Zabulón.

⁸Aton juntzan̈ chon̈ab' chi' ix ac'ji d'a eb' yin̈tilal Leví yuj eb' yetisraelal d'a suerteal. Masanil juntzan̈ chon̈ab' tic, ix ac'jican slumal d'a spatictac icha val ajnac yalancan Jehová d'a vin̈aj Moisés.

⁹A juntzan̈ chon̈ab' ol b'inaj tic, a d'a yol yic eb' yin̈tilal Judá ay yed' d'a yol yic eb' yin̈tilal Simeón.

¹⁰A eb' levita yin̈tilal Coat yin̈tilal pax Aarón, a eb' ix b'ab'laj chaan juntzan̈ chon̈ab' tic.

¹¹A d'a tzalquixtac d'a yol yic eb' yin̈tilal Judá, ix ac'ji Quiriat-arba d'a eb', aton Hebrón schon̈ab'can vin̈aj Arba smam yicham vin̈aj Anac.

¹²Axo pax masanil smacb'en jun chon̈ab' chi' yed' yaldeail ac'b'ilxo d'a vin̈aj Caleb yuninal vin̈aj Jefone.

¹³A Hebrón chi', aton d'ay scol sb'a eb' smac'ancham junoc anima. A eb' yin̈tilal Aarón chi' ix yic'pax juntzan̈ chon̈ab' tic eb': Libna, Jatir, Estemoa, Holón, Debir, Aín, Juta yed' Bet-semes. Aton b'alun̈e' chon̈ab' tic. Axo d'a yol yic eb' yin̈tilal Benjamín, chan̈e' chon̈ab' ix ac'ji d'a eb', aton Gabaón, Geba, Anatot yed' Almón. Yuj chi' a chon̈ab' ix yic' eb' yin̈tilal vin̈aj sacerdote Aarón, 13 d'a smasanil.

²⁰Axo d'a juntzan̈xo eb' levita yin̈tilal pax Coat chi', ix ac'ji juntzan̈xo chon̈ab' d'a eb' d'a yol yic eb' yin̈tilal Efraín. A d'a tzalquixtac, ix ac'ji Siquem d'a eb', aton b'aj syal scolan sb'a eb' smac'ancham junoc anima. Ix ac'jipax Gezer, Kibsaim yed' pax Bet-horón d'a eb', chan̈e' juntzan̈ chon̈ab' tic. Axo pax d'a yol yic eb' yin̈tilal Dan, chan̈e' chon̈ab' ix ac'ji d'a eb': Aton Elteque, Gibetón, Ajalón yed' Gat-rimón. Axo pax d'a yol yic nan̈alxo eb' yin̈tilal Manasés, chab' chon̈ab' ix ac'ji d'a eb', aton Taanac yed' Gat-rimón. Yuj chi' lajun̈e' chon̈ab' ix scha eb' yin̈tilal Coat, ato syal jay macan̈ yaj eb'.

²⁷Axo pax eb' levita yin̈tilal Gersón, chab' chon̈ab' ix ac'ji d'a eb' d'a yol yic nan̈alxo eb' yin̈tilal Manasés. A juntzan̈ chon̈ab' chi', aton Golán yed' Beestera d'a yol yic Basán. A d'a chon̈ab' Golán chi' syal scolan sb'a eb' smac'ancham junoc anima. Axo pax d'a yol yic eb' yin̈tilal Isacar chan̈e' chon̈ab' ix ac'jipax d'a eb', aton Cisón, Daberat, Jarmut yed' En-ganim. Axo d'a yol yic eb' yin̈tilal Aser, an̈eja' chan̈e' chon̈ab' ix ac'jipax d'a eb', aton Miseal, Abdón, Helcat yed' Rehob. Axo pax d'a yol yic eb' yin̈tilal Neftalí, oxe' chon̈ab' ix ac'jipax d'a eb', aton Cedes d'a yol yic Galilea, b'aj syal scolan sb'a eb' smac'ancham junoc anima. Ix ac'jipax chon̈ab' Hamot-dor yed' Cartán d'a eb'. Yuj chi' a masanil chon̈ab' ix yic' eb' yin̈tilal Gersón, 13 d'a smasanil, ato syal jay macan̈ yaj eb'.

³⁴Ayto eb' levita ixto cani, aton eb' yin̈tilal Merari. Ix ac'ji smacb'en eb' d'a yol yic eb' yin̈tilal Zabulón, chan̈e' chon̈ab' ix ac'ji d'a eb': Aton Jocneam, Carta, Dimna yed' Nahalal. Axo d'a yol yic eb' yin̈tilal Rubén, chan̈e' pax chon̈ab' ix ac'ji d'a eb': Aton Beser, Jahaza, Cademot yed' Mefaat. Axo d'a yol yic eb' yin̈tilal Gad, an̈eja' chan̈e' chon̈ab' ix ac'ji d'a eb': Aton Ramot d'a yol yic Galaad, Mahanaim, Hesbón yed' Jazer. A d'a Ramot chi' syal scolan sb'a eb' smac'ancham junoc anima. 12 chon̈ab' ix yic' eb' yin̈tilal Merari, yuninal Leví, icha jay macan̈ yaj eb'.

⁴¹A jantac chon̈ab' ix ac'jican d'a eb' yin̈tilal Leví chi' d'a yol smacb'en eb' yetisraelal, 48 d'a smasanil.

⁴²Junjun juntzan̈ chon̈ab' chi', ix cann̈ej slumal d'a spatictac b'aj syal sva noc' smolb'etzal noc' eb'.

⁴³Icha val chi' ix aj yac'jican lum luum d'a eb' israel yuj Jehová, aton masanil lum yac'nac sti' yac'an d'a eb' smam yicham eb'. Yuj chi' ix cajnajcan eb' d'a sat lum smasanil.

⁴⁴Ix eln̈ejc'och b'aj yac'nac sti' Jehová chi', ix can eb' ta' d'a junc'olal d'a masanil jun luum chi'. Majxo yal-laj stec'b'an sb'a eb' ajc'ol d'a yichan̈ eb', yujto a Jehová ix ac'anoch eb' d'a yol sc'ab' eb' israel.

⁴⁵Malaj junoc b'elan̈ lolonel b'aj yac'nac sti' Jehová chi' d'a eb' israel to maj elc'ochoc.