Read Chuj San Mateo 1 S 20 Bible Online

1 S 20 - Chuj San Mateo bible

1 S 20

¹Ix el lemnaj vin̈aj David d'a Naiot d'a yol yic Ramá, ix b'at yilan vin̈aj Jonatán vin̈, yic syal vin̈ d'a vin̈: —¿Tas val in mul? ¿Tom ay val junoc in mul te chuc ix in c'ulej d'a vin̈ a mam, yuj chi' tzin sayec' vin̈ yic tzin smilanchamoc? xchi vin̈.

²Ix tac'vi vin̈aj Jonatán chi': —Man̈ jab'oc, man̈ ol ach chamlaj. Scham a naani to a masanil tas sc'ulej vin̈ in mam chi', syaln̈ej vin̈ d'ayin, vach'chom nivan yelc'ochi, ma quenn̈ej. ¿Tom ijan man̈ ol yal vin̈ d'ayin yuj jun tic? Maay amlaj, xchi vin̈.

³Ix och ijan vin̈aj David chi' yalani: —Yojtac vin̈ a mam chi' to te vach' cac'ani, yuj chi' max yal-laj vin̈ d'ayach, max yal-laj sc'ol vin̈ tzojtaquejeli, yic max ach cusi. Palta yojtacxo Jehová to ayxo och chamel d'a vib'an̈, xchi vin̈.

⁴Ix yalan vin̈aj Jonatán chi': —Tato ay junoc b'aj syal ach in colani, al d'ayin, xchi vin̈.

⁵Ix tac'vi vin̈aj David chi': —A q'uic'an tz'och q'uin̈ yuj yalji q'uen uj, yovalil tzin em c'ojan in va d'a stz'ey vin̈ rey chi'. Elocab' d'a a c'ool tzin c'ub'ejcanel in b'a d'a caltac te' tic, masanto d'a yemc'ualil chab'ej.

⁶Tato tzin sc'anb'ej vin̈ a mam chi', tzal d'a vin̈ to a d'ayach ix in c'ana' to tzin b'atcan d'a Belén in chon̈ab', yujto a masanil eb' in c'ab' voc ol ac'anoch q'uin̈ ichataxon d'a junjun ab'il.

⁷Yic'ocab' tas tzal chi', tato xchi vin̈, vach' vic syal chi'. Tato scot yoval vin̈ jun, syalelc'ochi to naanxo yuj vin̈ in smilanchamoc.

⁸Ina to toxo ix cac' co ti' d'a yichan̈ Jehová to vach' cac'ani, yuj chi' tzin c'an jun tic d'ayach. Palta tato yel ay in mul, syal in a milanchamoc, man̈ yovaliloc tzin ic'b'at d'a yichan̈ vin̈ a mam chi', xchi vin̈.

⁹Ix tac'vi vin̈aj Jonatán chi': —Man̈ a na icha chi', tato ix vab' specal to snib'ej vin̈ in mam chi' tzach smilchamoc, toxom ix val d'ayach, xchi vin̈ d'a vin̈.

¹⁰—¿Mach pax ol alan d'ayin, tato chuc ol aj stac'voc vin̈ d'ayach? xchi vin̈aj David chi'.

¹¹Ix yalan vin̈aj Jonatán chi': —Con̈ ved'oc, con̈ el d'a spatiquel chon̈ab' tic, xchi vin̈. Ix b'at eb' vin̈ schavan̈il.

¹²Ayic ix c'och eb' vin̈ b'aj man̈xalaj anima, ix yalan vin̈aj Jonatán chi': —Yojtac Jehová co Diosal to yel svala'. A q'uic'an, ma chab'ej yab' icha tic, tzin c'anb'ej d'a vin̈ in mam chi', tas nab'il yuj vin̈. Tato vach' tas sna' vin̈ d'a a patic, svalcot ab'i.

¹³Tato chuc spensar vin̈ d'a a patic jun, aocab' Jehová ol ac'an in yaelal tato max val d'ayach yuj tas ol aj a colan a b'a. Axo ticnaic, colvajocab' Jehová ed'oc icha ix aj scolvaj yed' vin̈ in mam chi'.

¹⁴A ticnaic, tato pitzaninto ol ach ochcan reyal, tzin c'an d'ayach to ol oc' a c'ool d'ayin icha yoq'uelc'olal Jehová d'ayach, man̈ ol in a milchamlaj.

¹⁵Tato toxo in cham jun, tzin c'an d'ayach to tza nacot vin̈tilal d'a masanil tiempo. Ayic ol satjiel eb' ajc'ol yuj Jehová, mocab' satel in b'inaj d'a a macb'en, xchi vin̈.

¹⁶Icha chi' ix aj sb'oancan strato vin̈aj Jonatán chi' yed' vin̈aj David chi', ol b'eyn̈ejb'at d'a scal yin̈tilal vin̈aj David chi'. Ix yalan vin̈aj Jonatán chi' icha tic: Aocab' Jehová tz'ac'an a yaelal tato man̈ ol elc'och tas scalcan tic, xchi vin̈.

¹⁷Yujto te xajan vin̈aj David chi' yuj vin̈aj Jonatán chi', yuj chi' ix yal vin̈ to svach' b'oejxican jun strato eb' vin̈ chi'.

¹⁸Ix yalanxi vin̈aj Jonatán chi': —Q'uic'an tz'och q'uin̈ yuj yalji q'uen uj, scheclaji to malaj ach yujto secan tz'ajcan b'aj tzach em c'ojan.

¹⁹Palta axo chab'ej d'a yemc'ualil, sb'at a c'ub'ejel a b'a b'aj a c'ub'ejnaquel a b'a junel. Tza tan̈vej d'a slac'anil q'uen q'ueen scuch Ezel.

²⁰Tzin julb'at oxeoc in jul-lab' ta', ichato ay junoc mach b'aj van in julvajb'ati.

²¹Slajvi chi', svalan d'a vin̈ in checab': Ixic b'at ic'cot in jul-lab' chi', xin cham d'a vin̈. Tato sval d'a vin̈ icha tic: A d'a yichan̈cot tic ay, ic'cot te', ta xin chi, tzach cot d'a junc'olal, malaj tas ol ach ic'an syal chi'. Toxo ix vac' in ti' d'a yichan̈ Jehová to icha chi' ol vutej.

²²Palta tato sval jun: A jun in jul-lab' chi', najatto ay d'a ichan̈b'at chi', tato xin chi d'a vin̈, tzach b'at d'a najat a col a b'a yujto a Jehová tzach checanb'ati.

²³A pax d'a co ti' ix calcan tic jun, a Jehová testigo tz'ajcan d'ay to juneln̈ej scalcani, xchi vin̈ d'a vin̈.

²⁴Ix lajvi chi', ix sc'ub'anel sb'a vin̈aj David chi' d'a caltac te'. Ayic ix chajiel yich yic tz'och q'uin̈ yuj yalji q'uen uj, ix em c'ojan vin̈aj rey Saúl sva'i.

²⁵A d'a sat pat ix em c'ojan vin̈ d'a b'ajtaxon tz'em c'ojan. A d'a yichan̈ vin̈ ix em c'ojan vin̈aj Jonatán, axo d'a stz'ey vin̈ ix em c'ojan vin̈aj Abner, axo pax xila vin̈aj David, malaj mach ix em c'ojan d'ay.

²⁶A d'a b'ab'el c'u, malaj tas ix yal vin̈aj Saúl chi', yujto ix sna vin̈ icha tic: Tecan ay junoc tas man̈ vach'oc ix sc'ulej vin̈aj David chi', maj am yal sb'oan sb'a vin̈ icha yalan ley d'a ayocto, xchi vin̈ d'a spensar chi'.

²⁷Schab'ilxo c'ual yajoch q'uin̈ chi', colann̈ej xila vin̈aj David chi', malaj mach tz'em c'ojan d'ay. Yuj chi' ix sc'anb'ej vin̈aj Saúl d'a vin̈aj Jonatán icha tic: —¿Tas yuj maj javi vin̈ yuninal vin̈aj Isaí chi' vael ticnaic yed' evi? xchi vin̈.

²⁸Ix tac'vi vin̈aj Jonatán chi': —A vin̈aj David chi' alan d'ayin evi,

²⁹tob' masanil eb' sc'ab' yoc vin̈ snaan q'uin̈ yic silab' d'a schon̈ab', yuj chi' ix avtajb'at vin̈ yuj jun vin̈ yuc'tac. Yal vin̈ d'ayin icha tic: Tato vach' in d'a a sat, cha in b'at vac' tzalajb'oc in c'ool yed' eb' vuc'tac chi', xchi vin̈. Yuj chi' max javilaj vin̈ vael d'a a mexa tic, xchi vin̈.

³⁰Ayic ix yab'an vin̈ rey icha chi', ix cot yoval vin̈ d'a vin̈aj Jonatán chi', ix yalan vin̈: —Mitz' unin ach, b'ajam sic'b'il ach. Vojtac to vach' ac'an yed' vin̈ yuninal vin̈aj Isaí chi', yic q'uixvelal tzach ajcan yed' ix a nun.

³¹¿Tom max nachajel jab'oc uuj to yacb'an pitzan vin̈ yuninal vin̈aj Isaí chi', man̈ ol ach och reyal yed' pax eb' in̈tilal? A ticnaic, ac'b'at sayumal vin̈, tzic'ancot vin̈ d'ayin, ol in milancham vin̈, xchi vin̈.

³²Ix tac'vi vin̈aj Jonatán chi' icha tic: —¿Tas yuj ol cham vin̈? ¿Tom ay junoc tas chuc ix sc'ulej vin̈, yuj chi' icha chi' tzala'? xchi vin̈.

³³Ayic ix yab'an jun chi' vin̈aj Saúl chi', ix sjulanb'at jun q'uen slanza vin̈ d'a vin̈aj Jonatán chi' yic smilancham vin̈. Icha chi' ix aj snachajel yuj vin̈aj Jonatán chi' to a' vin̈ smam vin̈ chi', snib'ej vin̈ smilcham vin̈aj David chi'.

³⁴Ix cot yoval vin̈aj Jonatán chi', ix q'ue jucnaj vin̈, ix elta vin̈. Majxo valaj vin̈ yed' eb' vin̈ d'a schab'il c'ual chi', yujto ix cus vin̈ yuj vin̈aj David chi', yujto te chuc tas ix yal vin̈aj Saúl chi' ix yab' vin̈.

³⁵D'a val sacb'inaj d'a junxo c'u, ix b'at vin̈ yil vin̈aj David chi', icha yaj yalancan eb' vin̈, tzac'anoch jun vin̈ quelem unin yuj vin̈.

³⁶Ix yalan vin̈ d'a vin̈ quelem chi': —Elan̈chamel ol b'at ic'cot in jul-lab' ol in julb'at tic, xchi vin̈. Ix b'at vin̈ quelem chi' b'ian. A val sb'at vin̈ chi', ix julvajb'at vin̈aj Jonatán chi' d'a yichan̈b'at vin̈.

³⁷Ayic ix c'och vin̈ b'aj ix em jul-lab' chi', te chaan̈ ix avaj vin̈aj Jonatán chi' icha tic: —Yel a c'ool, man̈ ach och vaan, ato d'a ichan̈b'at ix c'ochi, xchi vin̈. Ix lajvi chi' ix yalanxi vin̈: —Yelc'olal a b'ati, man̈ ach och vaan, xchi vin̈. Ix sic'anq'ue jul-lab' chi' vin̈ quelem chi', ix yic'ancot vin̈.

³⁸

³⁹Palta maj nachajel-laj jab'oc yuj vin̈ tas ix sc'ulej vin̈aj Jonatán chi', an̈ej vin̈ ojtannac yed' vin̈aj David tas yaj jun slolonel chi'.

⁴⁰Ix lajvi chi', ix yac'an sjul-lab' vin̈aj Jonatán chi' d'a vin̈ quelem chi', ix schecan meltzaj vin̈ vin̈ d'a chon̈ab'.

⁴¹Ixn̈ej b'atcan vin̈ quelem chi', ix elcancot vin̈aj David d'a spatic q'uen q'ueen. Ixn̈ej elta vin̈ chi', oxel ix em n̈ojan vin̈ d'a yichan̈ vin̈aj Jonatán chi'. Ix lajvi chi' ix stz'ub'lanelta sti' eb' vin̈, ix oc' eb' vin̈ schavan̈il, ix sic'sic'an val vin̈aj David chi' yoq'ui.

⁴²Ix lajvi chi', ix yalan vin̈aj Jonatán chi' d'a vin̈: —Ixic, junc'olal a b'ati yujto a co ti' ix cac' co chavan̈il, d'a yichan̈ Jehová ix cala'. Ix co c'an d'a Jehová chi' to ayn̈ejocab'och qued'oc co chavan̈il yed' eb' quin̈tilal yic tz'elcanc'och b'aj ix cac' co ti', yic vach'n̈ej pax cac'ani yed' eb' quin̈tilal, xchi vin̈. Ix lajvi chi', ix b'atcan vin̈aj David chi', axo vin̈aj Jonatán chi' ix meltzajcancot vin̈ d'a chon̈ab'.