Read Chuj San Mateo 1 S 22 Bible Online

1 S 22 - Chuj San Mateo bible

1 S 22

¹Ix elxi vin̈aj David chi' ta', ix b'at sc'ub'anel sb'a vin̈ d'a jun q'uen n̈aq'ueen d'a yol yic Adulam. Ayic ix yab'an eb' vin̈ yuc'tac vin̈ yed' eb' sc'ab' yoc vin̈ b'aj ayec' vin̈, ix b'at eb' vin̈ sc'ub'ejel sb'a yed' vin̈.

²Ix c'ochpax eb' tz'ixtaxi, masanil eb' ay sb'oc yed' eb' ay schab'c'olal. A vin̈aj David chi' ix och yajaliloc eb'. Ay am junoc 400 eb' vin̈ vinac d'a smasanil.

³Spetoj vin̈aj David d'a Adulam chi', ix c'ochcan vin̈ d'a Mizpa, d'a yol yic Moab. Ix yalan vin̈ d'a vin̈ sreyal Moab chi' icha tic: —Tzin tevi d'ayach to scan vin̈ in mam yed' ix in nun ed'oc masanto ol vil tas ol in yutej Dios, xchi vin̈.

⁴Icha chi' ix aj yic'anb'at smam snun vin̈ chi' d'a yichan̈ vin̈ sreyal Moab chi'. A yed' vin̈ ix aj eb' yacb'an ayec' vin̈aj David chi' scol sb'a d'a jolomtac vitz.

⁵Axo vin̈aj Gad, schecab' Dios ix alan d'a vin̈aj David chi' icha tic: —Man̈ ach can d'a tic yuj a colan a b'a, palta meltzajan̈ d'a yol yic Judá, xchi vin̈. Icha chi' ix aj sb'at vin̈aj David, masanto ix c'och vin̈ d'a jun caltac te' d'a yol yic Haret.

⁶Ay jun c'ual, c'ojanem vin̈aj Saúl d'a yich jun te' tamarisco d'a jolom vitz d'a Gabaa, lac'b'ilq'ue q'uen slanza vin̈ yuuj, oyanoch eb' yajalil soldado d'a spatic vin̈. Ata' ix yab' vin̈ to ix checlaj b'aj ayec' vin̈aj David yed' eb' soldado.

⁷Yuj chi' ix yal vin̈ d'a eb' soldado oyanoch d'a spatic chi': —Ex vetchon̈ab' yin̈tilal Benjamín, ab'ec tas ol vala': ¿Tom tzeyac'och d'a e c'ool to a vin̈ yuninal vin̈aj Isaí chi' ol ac'an e luum yed' te' eyuva? ¿Tom e masanil ol ex och d'a comandanteal yed' d'a capitanil yuj vin̈?

⁸Yuj chi' e masanilxon̈ej a ex ayex ec' tic tzex och ajc'olal d'ayin. Malaj mach tz'alan d'ayin, tato a vin̈ vuninal toxo ix yac' strato vin̈ yed' vin̈ yuninal vin̈aj Isaí chi'. Malaj junoc ex ayex ec' tic tzex och jab'oc ilc'olal vuuj. Malaj junoc ex tzeyal d'ayin tato toxo ix och vin̈ vuninal chi' yac'an sc'ol jun in checab', yic tz'och ajc'olal d'ayin in smilan icha sc'ulej ticnaic, xchi vin̈aj Saúl chi'.

⁹Aypaxoch vin̈aj Doeg aj Edom d'a scal eb' schecab' vin̈aj Saúl chi', yuj chi' ix tac'vi vin̈ icha tic: —Ix vil vin̈ yuninal vin̈aj Isaí chi' ayic ix b'atcan vin̈ d'a Nob, ix c'och vin̈ d'a vin̈aj Ahimelec yuninal vin̈aj Ahitob.

¹⁰A vin̈aj Ahimelec chi', ix sc'anb'ej vin̈ d'a Jehová yuj vin̈aj David chi', ix ac'ji svael vin̈ yuj vin̈. Ix yac'anpax q'uen yespada vin̈aj Goliat vin̈ filisteo vin̈ d'a vin̈, xchi vin̈aj Doeg chi'.

¹¹Yuj chi' ix schecan vin̈ rey chi' avtaj vin̈aj sacerdote Ahimelec chi' yed' masanil eb' vin̈ sacerdote ay d'a Nob chi', aton eb' vin̈ sc'ab' yocto sb'a yed' vin̈aj Ahimelec chi'. Ayic ix c'och eb' vin̈ smasanil d'a yichan̈ vin̈ rey chi',

¹²ix yalan vin̈ d'a vin̈aj Ahimelec chi': —Ach yuninal vin̈aj Ahitob, ab' tas ol vala', xchi vin̈. —Ayinec' d'a yol a c'ab' mamin rey, xchi vin̈aj Ahimelec chi'.

¹³Ix sc'anb'an vin̈aj Saúl chi' d'a vin̈ icha tic: —¿Tas yuj ayach och ajc'olal d'ayin yed' vin̈ yuninal vin̈aj Isaí chi'? Ix ac' svael vin̈, ix ac'anpax jun q'uen espada d'a vin̈, ix a c'anb'an d'a Dios yuj vin̈, yic tz'och vin̈ ajc'olal d'ayin yic tzin smilani, ichaton sc'ulej vin̈ ticnaic, xchi vin̈.

¹⁴Ix yalan vin̈aj Ahimelec chi' d'a vin̈ rey chi': —Mamin rey, ¿mach junoc d'a scal eb' a checab' sc'anab'ajej val icha vin̈aj David, an̈ejtona' to a n̈i' pax vin̈, yajal pax yaj vin̈ d'a scal eb' a tan̈vumal, te nivan pax yelc'och vin̈ d'a a palacio?

¹⁵¿Tocval b'ab'elto tzin c'anb'ej d'a Dios yuj vin̈? Mamin rey, malaj b'aj tzin och ajc'olal d'ayach, yuj chi' mocab'a tas tza na' d'a in patic yed' d'a spatic eb' in c'ab' voc, yujto man̈ vojtacoc jab'oc tas yaj jun lolonel tic, xchi vin̈.

¹⁶Palta d'a yelc'olal ix yal vin̈ rey chi' d'a vin̈ icha tic: —An̈ejto tzac'och d'a a c'ool to ol ach cham yed' masanil eb' a c'ab' oc tic, xchi vin̈.

¹⁷A val d'a jun rato chi' ix schecan eb' stan̈vumal vin̈ rey chi', ix yalan vin̈: —Mileccham masanil eb' vin̈ sacerdote yic Jehová tic, yujto ayoch eb' vin̈ yed' vin̈aj David chi'. Yojtac eb' vin̈ to tz'el vin̈ elelal d'ayin, palta maj yal-laj eb' vin̈ vab'i, xchi vin̈. Palta a eb' soldado stan̈vumal vin̈ rey chi', maj yal-laj sc'ol eb' ix smilcham eb' vin̈ sacerdote yic Jehová chi'.

¹⁸Yuj chi' ix yal vin̈ rey chi' d'a vin̈aj Doeg chi': —Milcham eb' vin̈ a ach tic, xchi vin̈. Ix och ijan vin̈aj Doeg chi' smilancham eb' vin̈ sacerdote chi'. A d'a jun c'u chi', 85 eb' vinac tz'ac'anoch c'apac chaleca nab'a lino ix smilcham vin̈aj Doeg chi'.

¹⁹D'a elan̈chamel, ix ochpax vin̈ d'a yol chon̈ab' Nob, aton schon̈ab' eb' vin̈ sacerdote chi', a yed' q'uen espada ix smilcham masanil eb' vinac vin̈, eb' ix ix, eb' unin yed' eb' ato yalji. Ix smilpaxcham noc' vacax vin̈, noc' b'uru yed' noc' calnel.

²⁰Palta ay jun vin̈ yuninal vin̈aj Ahimelec, scuchan Abiatar, ix yac' ganar vin̈ yel lemnaj b'aj van yoch chamel chi', ix b'atcan vin̈ b'aj ayec' vin̈aj David.

²¹A' vin̈ ix alan d'a vin̈aj David chi' to a masanil eb' vin̈ sacerdote yic Jehová, toxo ix miljicham eb' vin̈ yuj tas ix yal vin̈aj Saúl.

²²Ix yalan vin̈aj David chi': —A jun chi' vojtactaxoni, yujto a d'a yic chi' ix vila' to ayec' vin̈aj Doeg ta', yuj chi' ix in na'a to a vin̈ ol alan d'a vin̈aj Saúl chi'. A ticnaic, vuuj ix cham masanil eb' a c'ab' oc chi',

²³palta jun, canan̈ ved' d'a tic. Man̈ ach xivoc, yujto a vin̈ ayoch ajc'olal chi' d'ayach, aypaxoch vin̈ ajc'olal d'ayin, palta vach' aj ved' d'a tic, xchi vin̈.