Read Biblia Revisión Chuya Qellqa 1992 – Chuya Qellqa 1992 Génesis 11 Bible Online

Génesis 11 - Biblia Revisión Chuya Qellqa 1992 – Chuya Qellqa 1992 bible

Génesis 11

¹Chay punchawkunapiqa llapallankum kay pachapi huk simillata rimarqaku.

²Intipa qespimunan lawmanta lloqsispankum paykuna Sinar lawpi huk pampata tariruspanku chaypi yacharqaku.

³Huk punchawmi ninakurqaku: Ladrillokunata ruwaspa hornopi kañasunchik, nispa. Chaymi rumikunapa rantinpi ladrillokuna servikurqa. Breañataqmi mezclapa rantinpi servikurqa.

⁴Chaymantam ninakurqaku: Huk llaqtata hatarichisun, cielokama haypaq torretawan perqarusunchik, chaynapi ancha reqsisqa kananchikpaq. Yanqañataq tukuy hinastinman kay pachapi cheqeruchwanchik, nispanku.

⁵Ichaqa Tayta Diosmi uraykamuspan runakunapa ruwasqan llaqtata chaynataq torretapas qawaykurqa.

⁶Chaymi Tayta Dios nirqa: Kay runakunaqa hukllam kachkanku, rimayninkupas hukllataqmi, chayraykum kay ruway qallarisqankutaqa mana imapas sayachiyta atinmanchu.

⁷Chaynaqa, uraykuspanchikyá rimayninkuta chaqwaramusun, chaynapi rimasqankuta mana entiendenakunankupaq, nispa.

⁸Chaynatam runakunata maymi kasqankumanta Tayta Dios tukuy hinastinman cheqerachirqa, hinaptinmi ruway qallarisqankuta saqerurqaku.

⁹Chayraykum chay llaqtata [13]Babelwan suticharqaku, runakunapa rimayninta Tayta Dios chaypi chaqwarusqanrayku, hinaspam kay pachapi tukuy hinastinman cheqerachirqa.

¹⁰Kaykunam Sempa mirayninkuna: Pachak watayuqña Sem kachkaptinmi churin Arfaxad nacerqa, iskay wataña sinchi parapa usyaramusqan qepanta.

¹¹Arfaxadpa nacesqanmantam Sem kawsarqa pichqa pachak watataraq, chay watakunapim qarikunata warmikunata churyarqa.

¹²Arfaxadmi kimsa chunka pichqayuq watanpi kachkaspan Salata churyarqa.

¹³Salapa nacesqanmantam Arfaxad tawa pachak kimsayuq watataraq kawsarqa, chay watakunapim qarikunata warmikunata churyarqa.

¹⁴Salam kimsa chunka watanpi kachkaspan Heberta churyarqa.

¹⁵Heberpa nacesqanmantam Salaqa tawa pachak kimsayuq watataraq kawsarqa, chay watakunapim qarikunata warmikunata churyarqa.

¹⁶Hebermi kimsa chunka tawayuq watanpi kachkaspan Pelegta churyarqa.

¹⁷Pelegpa nacesqanmantam Heberqa tawa pachak kimsa chunka watataraq kawsarqa, chay watakunapim qarikunata warmikunata churyarqa.

¹⁸Pelegmi kimsa chunka watayuq kachkaspan Reuta churyarqa.

¹⁹Reupa nacesqanmantam Pelegqa iskay pachak isqonniyuq watataraq kawsarqa, chay watakunapim qarikunata warmikunata churyarqa.

²⁰Kimsa chunka iskayniyuq watanpim Reuqa churyarqa Serugta.

²¹Serugpa nacesqanmantam Reuqa iskay pachak qanchisniyuq watataraq kawsarqa, chay watakunapim qarikunata warmikunata churyarqa.

²²Serugmi kimsa chunka watanpi kachkaspan Nacorta churyarqa.

²³Nacorpa nacesqanmantam Serugqa iskay pachak watataraq kawsarqa, chay watakunapim qarikunata warmikunata churyarqa.

²⁴Nacormi iskay chunka isqonniyuq watanpi kachkaspan Tareyta churyarqa.

²⁵Tareypa nacesqanmantam Nacorqa pachak chunka isqonniyuq watataraq kawsarqa, chay watakunapim qarikunata warmikunata churyarqa.

²⁶Tareymi qanchis chunka watayuq kachkaspan Abramta, Nacorta hinaspa Haranta churyarqa.

²⁷Tareypa mirayninkunam kaykuna. Tareypa churinkunam karqa Abram, Nacor hinaspa Harán. Haranpa churinñataqmi karqa Lot.

²⁸Haranqa taytan Tareymantapas puntataraqmi wañukurqa, maymi nacesqan Caldea law Ur llaqtapi.

²⁹Abrammi casarakurqa Saraiwan, Nacorñataqmi Milcawan. Haranmi karqa Milcapawan Iscapa taytan.

³⁰Saraiqa qolluq kasqanraykum mana wawayuq karqa.

³¹Tareymi lloqsirqa Caldea lawpi Ur llaqtamanta Canaán lawman rinanpaq, hinaspam pusarqa churin Abramta warmintinta, chaynataq Haranpa churin Lottapas; Lotqa karqa Tareypa willkanmi. Harán llaqtaman chayaruspankum chaypi yacharqaku.

³²Tareymi iskay pachak pichqayuq watanpi kachkaspan Harán llaqtapi wañukurqa.