Read Biblia Revisión Chuya Qellqa 1992 – Chuya Qellqa 1992 Génesis 19 Bible Online

Génesis 19 - Biblia Revisión Chuya Qellqa 1992 – Chuya Qellqa 1992 bible

Génesis 19

¹Chay iskay angelkunam Sodoma llaqtaman tardeykuytaña chayarurqaku. Lotñataqmi tiyachkarqa Sodoma llaqtapa punkunpi, chaymi angelkunata rikuykuspan paykunata chaskiq rirqa, hinaspam pampaman kumukuykuspan

²nirqa: Taytaykuna, ama hina kaspayá kay serviqnikichikpa wasinman samakunaykichikpaq chaynallataq chakikichiktapas mayllakunaykichikpaq yaykuykamuychik, paqarin achikyaqtañachiki pasakunkichik, nispa. Chaymi paykunañataq nirqaku: Graciastam qoykiku, ñoqaykuqa kay plazallapim achkisaqku, nispanku.

³Ichaqa Lotmi paykunata hikutarqa, chaymi wasinman yaykurqaku, Lotñataqmi mikuyta yanurachispa mana levadurayuq tantatawan qoykuptin mikurqaku.

⁴Manaraq puñuykuchkaptinkum Sodomapi llapa runakuna, jovenkunamanta qallarispa machukunakama Lotpa wasinta lliw muyururqaku.

⁵Hinaspam Lotta qayaykacharqaku: ¿Maytaq kunan tuta samachisqayki runakuna? Hurqomuy abusanaykupaq, nispanku.

⁶Chaymi Lot lloqsimuspan punkuta wichqaykurqa paykunawan rimananpaq.

⁷Hinaspanmi nirqa: Llaqtamasillaykuna, amayá chay mana allintaqa ruwaychikchu.

⁸Kachkanmi manaraq qari reqsiq iskay warmi churiykuna, paykunata hawaman hurqoramuptiyá munasqaykichikta ruwaychik. Kay runakunataqa ama imatapas ruwaychikchu wasiypi samakusqanrayku, nispa.

⁹Hinaptinmi chay runakunañataq nirqaku: Suchuy kaymanta, huklaw llaqtayuq kachkaspachu ¿kunanñataq juezña rikurirunki? Kunanqa paykunamantapas aswantaraqmi ruwasqaykiku, nispanku. Chaymi tukuy kallpankuwan Lotta tanqarqaku hinaspam punku pakinankupaq asuykurqaku.

¹⁰Hinaptinmi chay samakuqkuna Lotta wasi ukuman aysaykuspanku punkuta wichqarurqaku.

¹¹Hawapi runakunatañataqmi llapallankuta ñawsayarachirqaku, hinaptinmi manaña ima ruwakuyta atispa punkuta maskarqaku.

¹²Chaymantam chay samakuq runakuna Lotta nirqaku: ¿Kachkanchu kaypi aylluykikuna, masaykikuna, qari churikikuna hinaspa warmi churikikuna? Sichum kaptinqa llapallanta kay llaqtamanta hurqoy.

¹³Kay llaqtatam puchukachisaqku. Paykunapa millakuypaq hucha ruwasqankum Tayta Diospa qayllanman chayarun, chaymi pay kachamuwanku puchukachinaykupaq, nispanku.

¹⁴Chaymi wasinmanta Lot lloqsispan warmi churinkunata casaray munaqkunata nimurqa: Kay llaqtamanta utqayman lloqsiychik, Diosmi kay llaqtata puchukachinqa, nispa. Chay runakunam ichaqa burlapaq hapirurqaku.

¹⁵Achikyaykamuchkaptinmi angelkuna Lotta hikutarqaku: Utqayman lloqsiy, warmikiwan chaynallataq iskaynin warmi churikikunapiwan, kay llaqtata puchukachiptiyku mana wañunaykichikpaq, nispanku.

¹⁶Lot mana utqayman lloqsiptinmi, Tayta Diospa kuyapayakuyninman hina, chay iskaynin angelkuna Lotta, warminta hinaspa iskaynin warmi churinkunata makinmanta aysaspa llaqtamanta hawaman hurqorqaku.

¹⁷Hurqoramuspankum huknin ángel nirqa: Salvakuyta munaspaykiqa utqayman ayqey. Ichaqa amam qepaykita qawarikamunkichu amataqmi kay pampapiqa sayayllapas-sayaykunkichu, ama puchukarunaykipaq orqoman lluptiy, nispa.

¹⁸Hinaptinmi Lot nirqa: Taytallaykuna amayá chaynaqa pasakuchunchu.

¹⁹Kay siervollaykitaqa anchatañam yanapaykuwanki, kuyakuynikiman hinataqmi vidallaytapas salvaykuwanki, orqoman ayqeytaqa manam atiymanchu, qonqaytachá imapas pasawaptin wañuruyman.

²⁰Waqaya wak taksa llaqtacha hichpallapi kachkan, wakmanyá lluptikusaq mana wañurunaypaq, nispa.

²¹Chaymi huknin ángel nirqa: Kay mañakuynikitapas uyarinim, chaynaqa wak niwasqayki llaqtachataqa manam puchukachisaqchu.

²²Chaynaqa, utqayman lluptiy, wakman chayanaykikamam mana imatapas ruwasaqchu, nispa. Chayraykum chay llaqtachapa sutin [18]Zoar karqa.

²³Lotmi inti qespimuyta Zoar llaqtachaman chayarurqa.

²⁴Tayta Diosñataqmi azufretawan ninata cielomanta parachimurqa Sodoma, Gomorra llaqtakunaman.

²⁵Hinaspanmi chay qechwapi llaqtakunatapas, chaypi yachaq runakunatapas chaynallataq plantakunatapas lliwta puchukarachirqa.

²⁶Lotpa warminñataqmi qepaman qawariruspa kachi rumiman tikrakururqa.

²⁷Paqarinnintin tutapaytam Abraham rirqa Dioswan parlasqanku sitioman.

²⁸Chaymi Sodoma, Gomorra llaqtakuna lawta chaynataq tukuy qechwankunata qawariptin hornopa qosniynin hinaraq qosnirimuchkasqa.

²⁹Chaynatam Dios chinkarachirqa qechwapi llapallan llaqtakunata. Ichaqa Abrahamta yuyarispam Lotta hurqorqa, yachasqan llaqtapi mana puchukarunanpaq.

³⁰Lotmi Zoar llaqtachapi yachayta manchakuspan orqopi machayman pasakurqa, hinaspam iskaynin warmi churinkunapiwan chaypi yacharqa.

³¹Chaymi sullkanta piwi kaq nirqa: Taytanchikqa machuñam. Runakunapa costumbrenman hina casarakunanchikpaqpas manam ima qaripas kanñachu.

³²Chaynaqa, taytanchikta vinowan sinkarachispayá paywan puñurusunchik chaynapi paypa miraynin mana qollunanpaq, nispa.

³³Hinaspam chay tuta taytankuta vinowan sinkarachirqaku, chaymi taytanwan piwi kaq puñururqa. Taytanmi ichaqa mana musyakurqachu churin ustuykusqanta nitaq hatarisqantapas.

³⁴Paqarinnintinñataqmi sullkanta piwi kaq nirqa: Chisi tutam taytanchikwan puñururqani, chaynaqa kunanpas huktawanyá sinkarachisun, qamñataq paywan puñunaykipaq, chaynapi taytanchikpa miraynin mana qollurunanpaq, nispa.

³⁵Chay tutapas taytankuta sinkarachiptinkum sullka kaqñataq paywan puñururqa, taytanmi ichaqa mana musyakurqachu churin ustuykusqanta nitaq hatarisqantapas.

³⁶Chaynapim Lotpa iskay warmi churinkunaqa taytankupa churinta wiksayakururqaku.

³⁷Piwi kaqmi wachakuruspan Moabwan suticharqa, paypa mirayninkunam Moab casta runakuna karqaku.

³⁸Sullka kaqpas wachakuruspanmi [19]Ben-amiwan suticharqa, paypa mirayninkunam Amón casta runakuna karqaku.