Read Biblia Revisión Chuya Qellqa 1992 – Chuya Qellqa 1992 Génesis 2 Bible Online

Génesis 2 - Biblia Revisión Chuya Qellqa 1992 – Chuya Qellqa 1992 bible

Génesis 2

¹Chaynatam cielopas kay pachapas hinaspa chaypi tukuy ima kaqkunapas unanchay tukusqa karqa.

²Diosmi qanchis kaq punchawpi tukuy ima ruwasqankunata tukurqa, hinaspam chay punchawpi tukuy ima ruwasqanmanta samarqa.

³Hinaptinmi Diosqa qanchis kaq punchawta bendecispan kikinpa punchawninpaq sapaqcharqa, chay punchawpi tukuy ima unanchasqanmanta samasqanrayku.

⁴Kaynatam [1]Tayta Dios unancharqa hanaq pachatawan kay pachata. Hanaq pachatawan kay pachata Tayta Dios unanchayta qallariptinqa

⁵manaraqmi ima sachapas nitaq qorakunapas karqaraqchu, Tayta Dios manaraq parachimusqanrayku; nitaqmi runapas llamkananpaq karqaraqchu.

⁶Aswanqa allpamantam yaku waspimurqa kay pachata nuyunanpaq.

⁷Chaymantam [2]runata ñutu allpamanta Tayta Dios ruwarqa, hinaspam kawsachiq samayta senqanpi pukuykuptin kawsaq runaña rikurirurqa.

⁸Tayta Diosmi Edenpi, intipa qespimunan lawpi huk huertata ruwarqa, chaymanmi ruwasqan runata churarqa.

⁹Tayta Diosmi wiñachirqa mikunapaq sumaq ruruq tukuy rikchaq sachakunata. Wiñachirqataqmi kawsay qokuq sachatapas huertapa chawpinpi, chaynallataq allin kaqta mana allin kaqta reqsinapaq sachatapas.

¹⁰Huerta parqonanpaqmi Edenmanta mayu lloqsimurqa hinaspam tawa pallqaman rakikurqa.

¹¹Punta kaq pallqanpa sutinmi karqa Pisón, chay mayum tukuy Havila lawninta muyumun, chaypim kan qori.

¹²Chay allpapi qoriqa suma-sumaqmi. Kantaqmi miskillaña asnariq sachakunapas chaynallataq bedelio hinaspa ónice sutiyuq rumikunapas.

¹³Iskay kaq pallqanpa sutinmi Gihón, chay mayum tukuy Cus lawninta muyumun.

¹⁴Kimsa kaq pallqanpa sutinmi Tigris, chay mayuqa Asiria nacionpa intipa qespimunan lawnintam richkan. Tawa kaq pallqanpa sutinñataqmi Eufrates.

¹⁵Tayta Diosmi runata Edén huertaman churarqa chaypi llamkaspa nanachikunanpaq.

¹⁶Chaypim runata kaynata kamachirqa: Huertapi llapallan sachapa ruruntam mikunki,

¹⁷allin kaqta mana allin kaqta reqsinapaq sachapa ruruntam ichaqa ama mikunkichu, mikuruspaykiqa wañurunkipunim, nispa.

¹⁸Chaymantam Tayta Dios nirqa: Qaripa sapallan kayninqa manam allinchu, yanapaqnintayá paypaq hina ruwapusaq, nispa.

¹⁹Tayta Diosmi allpamanta unancharqa purun animalkunata, uywa animalkunata, chaynallataq alton pawaq animalkunatapas, hinaspam pusamurqa Adanman sutichananpaq. Paypa suti churasqanmi llapallan animalkunapa sutinqa.

²⁰Adanmi suticharqa purun animalkunata, uywa animalkunata chaynallataq alton pawaq animalkunatapas. Adanpaqmi ichaqa paypaq hina yanapaqnin mana karqachu.

²¹Chaymi Adanta Tayta Dios sinchita puñurachirqa. Puñunankamam huknin costillanta hurqoruspan aychanta kaqllamanta wichqaykurqa.

²²Chay costilla hurqosqanmantam Tayta Dios huk warmita ruwarurqa, hinaspanmi Adanman pusamurqa.

²³Hinaptinmi [3]Adán nirqa: ¡Paymi ichaqa tulluypapas tullun, aychaypapas aychan! Paypa sutinmi warmi kanqa, qarimanta ruwasqa kasqanrayku, nispa.

²⁴Chayraykum qariqa taytanta mamanta saqespa warminman hukllawakunqa, chaynapi iskayninku hukllaña kanankupaq.

²⁵Warmipas qaripas qalallam karqaku, ichaqa manam penqakurqakuchu.