Read Biblia Revisión Chuya Qellqa 1992 – Chuya Qellqa 1992 Génesis 22 Bible Online

Génesis 22 - Biblia Revisión Chuya Qellqa 1992 – Chuya Qellqa 1992 bible

Génesis 22

¹Kaykuna pasaruptinmi Abrahamta pruebaspan Dios nirqa: Abraham, nispa. Payñataqmi nirqa: Kaypim kachkani, nispa.

²Chaymi Dios nirqa: Moriah lawman riy kuyasqayki sapallan churiki Isaacta pusarikuspa, chaypi payta kañaspa ofrecemuway, ñoqam nisqayki mayqan orqopim ruwanaykitapas, nispa.

³Chaymi Abrahamqa paqarinnintin tutapayta yantata asnonpi cargakuykuspa churin Isaacwan hinaspa iskay criadonkunapiwan Diospa nisqan lugarman rirqaku, chaypi churinta kañaspa Diosman ofrecemunanpaq.

⁴Kimsa punchaw puriypiñam karullamantaraq chay lugarta Abraham rikururqa.

⁵Hinaspam criadonkunata nirqa: Asnontinyá kayllapi qepachkaychik, warmallawanña Diosta yupaychaq rirusaqku, chayllam kutiramusaqku, nispa.

⁶Hinaspanmi Abrahamqa sacrificiopaq ninata, cuchillota aparikuspa rirqa, yantatañataqmi churin Isaacwan qepichirqa.

⁷Chaymantam taytanta Isaac nirqa: Taytáy, nispa. Payñataqmi nirqa: Imatam ninki churilláy, nispa. Chaymi Isaac nirqa: Kaypim kachkan yantapiwan nina, ¿maytaq wañuchispa kañanapaq carneroqa? nispa.

⁸Abrahamñataqmi nirqa: Churilláy, Diosmi sacrificiopaq carnerotaqa churamunqa, nispa. Hinaspam kuskanku rirqaku.

⁹Diospa nisqan orqoman chayaruptinkum, altarta Abraham ruwarqa, chayman yantata churaykuspanmi churintañataq chaqnaykuspa chay yantapa hawanman churaykurqa.

¹⁰Hinaspanmi Abrahamqa cuchillota hapiykurqa churinta wañuchinanpaq.

¹¹Chaymi Tayta Diospa angelnin cielomanta nimurqa: ¡Abraham, Abraham! nispa. Hinaptinmi Abraham nirqa: Kaypim kachkani, nispa.

¹²Angelñataqmi nirqa: Ama imanaychu chay warmata, ñam yachaniña Dios manchakusqaykita, kuyasqayki sapallan churiki kachkaptinpas manam negakurqankichu Diospaq ofreceyta, nispa.

¹³Chaymi Abraham qawaykacharikuspan qepanpi rikururqa huk carnero waqranmanta chaprapi arwikusqata. Chay carnerota hapispam Abraham wañuchirqa churinpa rantinpi kañananpaq.

¹⁴Abrahammi chay orqota suticharqa “Tayta Diosmi churamunqa” niq sutiwan. Chayraykum kunankama ninku: “Orqonpiqa Tayta Diosmi churamunqa” nispa.

¹⁵Diospa angelninmi cielomanta huktawan Abrahamta qayamurqa,

¹⁶hinaspam nirqa: “Sapallan churikitapas ofrecewanaykipaq mana negakusqaykimantam kikiyrayku jurani.

¹⁷Anchata bendecispaymi chaskakunata chaynataq lamar qochapa patanpi aqota hinaña mirachisqayki. Miraynikikunam enemigoykikunapi munaychakunqa.

¹⁸Kasuwasqaykiraykum kay pachapi lliw runakuna miraynikitakama bendecisqa kanqaku”, nispa.

¹⁹Chaymantam Abraham sirvientenkunapa kasqanman kutirqa. Hinaspankum Beerseba llaqtaman kutikurqaku, chaypim Abraham yacharqa.

²⁰Kaykuna pasaruptinmi Abrahamman willarqaku: Milcapas wawqeki Nacorpa churinkunatam wachakurun.

²¹Piwinmi karqa Uz, qatiqninkunañataqmi Buz, Haranpa taytan Kemuel,

²²Quesed, Hazo, Pildas, Jidlaf hinaspa Betuel, nispanku.

²³Kay pusaqnintintam Abrahampa wawqen Nacorpata Milca wachakurqa. Betuelpa churinmi karqa Rebeca.

²⁴Nacorpa churiwachan Reumañataqmi wachakurqa Tebasta, Gahamta, Tahasta hinaspa Maacata.