Read Biblia Revisión Chuya Qellqa 1992 – Chuya Qellqa 1992 Génesis 25 Bible Online

Génesis 25 - Biblia Revisión Chuya Qellqa 1992 – Chuya Qellqa 1992 bible

Génesis 25

¹Abrahammi Cetura sutiyuq warmiwan yapakururqa.

²Paymi wachakurqa Zimramta, Jocsanta, Medanta, Madianta, Isbacta hinaspa Shuata.

³Jocsanpa churinmi karqa Sebawan Dedán. Dedanpa mirayninkunam karqaku Asurim, Letusim hinaspa Leumim runakuna.

⁴Madianpa churinkunam karqaku Efa, Efer, Hanoc, Abida hinaspa Elda. Paykunam karqaku Ceturapa mirayninkuna.

⁵Abrahamqa lliw kapuqninkunatam Isaacman qoykurqa.

⁶Hawa churinkunamanñataqmi regalokunata qorqa, hinaspam kawsachkaspallaraq Isaacpa ladonmanta intipa qespimunan lawman paykunata aviarurqa.

⁷Abrahamqa pachak qanchis chunka pichqayuq watankamam kawsarqa.

⁸Abrahammi allin wañukuyta wañukurqa sinchi yuyaq kachkaspanña, hinaspam ñawpaq taytankunaman huñukuykurqa.

⁹Hinaptinmi churin Isaacwan churin Ismael Macpela machaypi pamparqaku, chay machayqa karqa heteo Zoharpa churin Efronpa allpanpim, Mamre llaqtapa chimpanpi.

¹⁰Chay allpatam Abraham rantirqa Heteokunamanta, chaypim warmin Sarapa kasqanpi pampakurqa.

¹¹Abraham wañukuptinmi churin Isaacta Dios bendecirqa; Isaacqa yacharqa “Rikuqniy Kawsaq Diospa Pozon” sutiyuq lugarpa hichpanpim.

¹²Sarapa criadan Egiptomanta kaq Agarmi wachakurqa Abrahampa churin Ismaelta.

¹³Ismaelpa mirayninkunam nacesqankuman hina piwinmanta qallaykuspa kaykuna: Nebaiot, Cedar, Adbeel, Mibsam,

¹⁴Misma, Duma, Massa,

¹⁵Hadar, Tema, Jetur, Nafis hinaspa Cedema.

¹⁶Kaykunam Ismaelpa chunka iskayniyuq churinkunapa sutinkuna, hina chay sutinkuwantaqmi sapakamapa llaqtankupas, campamentonkupas sutichasqa karqa, paykunataqmi chaypi kamachikuqkunapas karqaku.

¹⁷Ismaelmi pachak kimsa chunka qanchisniyuq watanpi wañukurqa, hinaspam ñawpaq taytankunaman huñukuykurqa.

¹⁸Ismaelpa mirayninkunam yacharqaku Havilamanta Shur lawkama. Chayqa kachkan Asiriaman rinapim, Egiptopa chimpanpi. Ayllunkunapa cheqnisqan kachkaspankupas chaypim yacharqaku.

¹⁹Kaykunam Abrahampa churin Isaacpa mirayninkuna: Abrahammi churyarqa Isaacta.

²⁰Isaacmi tawa chunka watanpi Rebecawan casarakurqa, Rebecaqa karqa Padan-aram lawmanta kaq Betuelpa churinmi hinaspa arameo Labanpa paninmi.

²¹Isaacmi warmin qolluq kasqanrayku Tayta Diosta mañakurqa, mañakusqanta Dios uyariykuptinmi Rebeca wiksayakururqa.

²²Chaymi wawankuna wiksan ukupi peleakuptinku nirqa: ¿Imapaqtaq kawsasaq kayna kaptinqa? nispa. Chayraykum Tayta Diosta tapurqa.

²³Hinaptinmi Tayta Dios nirqa: Iskay nacionkunam wiksaykipi kachkan, chay nacionkunam wiksaykimantapuni rakinasqa kachkan. Huknin nacionmi hukninmanta aswan kallpayuq kanqa, piwi kaqmi sullkanta servinqa, nispa.

²⁴Wachakunan punchaw chayaramuptinmi wiksanpiqa [21]awa kasqa.

²⁵Punta nacemuqmi kasqa paqo chukcha, cuerponpi pelosapallaña, paytam Esauwan suticharqaku.

²⁶Qepa nacemuqñataqmi Esaupa talonnin hapikusqa naceramurqa, paytam Jacobwan suticharqaku. Isaacqa soqta chunka watanpiñam karqa Rebeca wachakuptinqa.

²⁷Iskayninkum wiñarurqaku. Esaumi karqa purun animalkuna hapiq hinaspa campoman amañasqa runa, Jacobñataqmi karqa carpallapi yachaspa hawkalla kakuq runa.

²⁸Isaacmi Esauta masta kuyarqa, purun animalkuna hapimusqanta mikuchisqanrayku. Rebecañataqmi Jacobta masta kuyarqa.

²⁹Huk punchawmi lenteja picanteta Jacob yanukuchkarqa. Esauñataqmi campomanta pisipasqallaña kutiramuspan

³⁰Jacobta nirqa: Llumpay yarqasqam kachkani. Ama hina kaspayá chay picantekita qaraykuway, nispa. (Chayraykum Esauqa [22]Edomwan sutichasqa karqa).

³¹Chaymi Jacob nirqa: Piwi kaynikipa derechontam munani, kunanyá rantikuruway, nispa.

³²Esauñataqmi nirqa: Ñoqaqa yarqaymantam wañuruchkaniña ¿Imapaqtaq piwi kayniy serviwanqa? nispa.

³³Chaymi Jacob nirqa: Kunanpuni juraykuway, nispa. Chaymi Esaú juraspa piwi kayninpa derechonta Jacobman rantikururqa.

³⁴Hinaptinñam Jacobqa tantatawan lenteja picanteta Esauman qoykurqa. Esauñataqmi mikuykuspa, tomaykuspa pasakurqa. Chaynatam Esaú piwi kayninpa derechonta wischupakururqa.