Read Biblia Revisión Chuya Qellqa 1992 – Chuya Qellqa 1992 Génesis 28 Bible Online

Génesis 28 - Biblia Revisión Chuya Qellqa 1992 – Chuya Qellqa 1992 bible

Génesis 28

¹Isaacmi Jacobta qayaykuspan bendeciykurqa, hinaspam kamachirqa: Canaán llaqta warmiwanqa amam casarakunkichu,

²Padan-aram lawpi mamaykipa taytan Betuelpa wasinman riy hinaspa mamaykipa turin Labanpa hukkaqnin warmi churinwan casarakamuy.

³Tukuy Atiyniyuq Tayta Diosyá bendecisunki churisapallaña kanaykipaq, chaynapi qanmanta achka nacionkuna lloqsinanpaq.

⁴Abrahamman prometesqan bendicionnintayá qanmanwan miraynikikunaman qosunkichik, chaynapi mana llaqtayuq hina yachasqanchik allpa qamkunapaña kananpaq, nispa.

⁵Chaynata nispanmi churin Jacobta Isaacqa aviarurqa, Padan-aram lawpi Labanpa wasinman. Labanqa karqa Aram casta Betuelpa churinmi, chaynallataq Jacobpa Esaupa maman Rebecapa turinmi.

⁶Esaumi rikururqa Jacobpaq bendicionta Isaac mañakuspan Padan-aram lawman aviarusqanta. Yacharurqataqmi Canaán warmikunawan ama casarakunanpaq Jacobta taytan kamachisqantapas,

⁷chaynallataq tayta-mamanta kasukuspa Padan-aram lawman Jacobpa pasakusqantapas.

⁸Chaynapim Esaú yacharurqa Canaán warmikunataqa taytan Isaac mana munasqanta.

⁹Chaymi Esauqa warminkuna kachkaptinpas Mahalatwan casarakurqa. Mahalatqa karqa Ismaelpa churinmi, Nebaiotpa panin hinaspa Abrahampa willkanmi.

¹⁰Jacobmi Beerseba llaqtamanta lloqsispan Harán lawman rirqa.

¹¹Chaymi inti seqaykuruptin chay ñan risqanpi samarurqa, hinaspam rumiwan sawnakuykuspa puñururqa.

¹²Hinaspanmi mosqoyninpi huk escalerata pampamanta hanaq pachaman haypaqta rikururqa, chaynintakama Diospa angelninkuna seqaqta uraykamuchkaqta.

¹³Tayta Diostapas ladonpi sayachkaqtam rikururqa. Diosmi nirqa: Ñoqaqa abueloyki Abrahampa hinaspa taytayki Isaacpa yupaychasqan Diosmi kani. Kay puñusqayki allpatam qanmanwan miraynikikunaman qosqaykichik.

¹⁴Chaymi miraynikikuna kanqa ñutu allpa hina mana yupay atina. Paykunam cheqenqa tukuy hinastinman, qamrayku hinaspa miraynikiraykum kay pachapi llapallan ayllukuna bendecisqa kanqa.

¹⁵Ñoqam qanwan kachkani, mayman riptikipas waqaychasqaykim, hinaspam kay allpaman kutichimusqayki. Manam saqesqaykichu, nisqaykunataqa cumplisaqpunim, nispa.

¹⁶Puñusqanmanta rikchariruspanmi Jacob nirqa: Cheqaptapunim Diosqa kaypi kasqa, manam ñoqaqa yacharqanichu, nispa.

¹⁷Mancharikuspam nirqa: Manchakuypaqmi kay lugarqa kasqa. Kayqa Diospa wasinmi hinaspa hanaq pachapa punkunmi, nispa.

¹⁸Tutapayta hatarispanmi sawnakusqan suytu rumita Jacob sayachirqa, hinaspam aceiteta talliykurqa Diospaq sapaqchananpaq.

¹⁹Chay lugartam [27]Bet-elwan suticharqa, punta sutinñataqmi karqa [28]Luz.

²⁰Chaypim prometikuspan Jacob nirqa: Dios Taytalláy, kay risqaypi waqaychawaspayki mikuytapas pachatapas qowaspa

²¹taytaypa wasinman hawkallata kutichimuwanki hinaspaqa qanmi Diosniy kanki.

²²Kay sayachisqay suytu rumim Diospa Wasin kanqa. Lliw qowasqaykimantapas diezmoytam qosqayki, nispa.