Read Biblia Revisión Chuya Qellqa 1992 – Chuya Qellqa 1992 Génesis 39 Bible Online

Génesis 39 - Biblia Revisión Chuya Qellqa 1992 – Chuya Qellqa 1992 bible

Génesis 39

¹Ismael castakuna Egipto nacionman Joseyta aparuptinkum, Potifar rantirurqa. Potifarqa Egiptopi rey Faraonta waqaychaq soldadokunapa capitanninmi karqa.

²Ichaqa Tayta Diosmi Joseywan karqa, chaynapim payqa Egipto nacionniyuq patronninpa wasinpi yachaspa ima ruwasqanpipas allin lloqsirqa.

³Potifarmi qawarqa Joseywan Tayta Dios kasqanta chaynataq tukuy ruwasqanpipas yanapasqanta.

⁴Chaymi Potifarqa Joseyta allinpaq qawaykuspa wasinpi mayordomonpaq churarqa, tukuy kapuqninkunapi nanachikunanpaq.

⁵Chay punchawmantam Joseyrayku Potifarpa wasinta Tayta Dios bendecirqa. Chaymi Tayta Dios tukuy kapuqninpi, wasinpi chaynataq chakranpipas bendeciykurqa.

⁶Tukuy kapuqninta Joseyman saqeykuspanmi Potifarqa manaña imamantapas preocupakurqañachu, aswanqa mikunallanmantañam. Joseyqa allin rikchayniyuq kuyapa jovenmi karqa.

⁷Chaykunapa qepantam patronninpa warminqa Joseyta munapayaspan nirqa: Ñoqawan puñuy, nispa.

⁸Joseyñataqmi mana munaspan patronanta nirqa: Patronniyqa wasinpi tukuy ima kaqkunatam ñoqaman saqeykuwan, chaynapim payqa manaña imamantapas preocupakunñachu.

⁹Kay wasipiqa ñoqamanta aswan munayniyuqqa manam pipas kanchu. Wasinpi tukuy iman kaqkunatam nanachikunaypaq saqeykuwan, qamllatañam manaqa saqewarqachu warmin kasqaykirayku. ¿Imaynataq kay mana allinta ruwaspay Diospa contranpi huchallikuyman? nispa.

¹⁰Sapa punchawmi Joseyta chay warmi hikutaq paywan puñunanpaq, Joseymi ichaqa mana munakuqchu.

¹¹Huk punchawmi Joseyqa wasi allichaq yaykurqa, wasipiqa manam pipas karqachu.

¹²Hinaptinmi Joseypa pachanmanta hapikuruspa chay warmi hikutaspa kaynata nirqa: ¡Hamuy puñusun! nispa. Joseymi ichaqa hawaman lluptikaramurqa, warmipa makinpi pachanta saqeramuspa.

¹³Hinaptinmi chay warmiqa Joseypa pachanta makinpi qawaykuspan,

¹⁴wasinpi criadonkunata qayaspan nirqa: Qawaychik, qosaypa pusamusqan hebreo runam burlakuwachkanchik. Paymi abusawananpaq yaykuramuwan, ichaqa ñoqam hatunmanta qaparirqani.

¹⁵Qaparispay qayakuptiymi pachantapas waqtaypi saqeruspan hawaman lluptirurqa, nispa.

¹⁶Chaymi Joseypa pachanta chay warmi hatallirqa wasiman qosan kutimunankama.

¹⁷Hinaspam imaynam criadonkunaman nisqanta hina qosanmanpas willarqa: Pusamusqayki hebreo casta criadom abusawananpaq yaykuramuwarqa,

¹⁸chaymi qaparispa qayakuptiy hawaman lluptirurqa pachantapas waqtaypi saqeruspan.

¹⁹Chaynatam criadoyki ruwawan, nispa. Chaynata warmin willaykuptinmi Joseypa patronnin Potifarqa sinchita piñakururqa.

²⁰Hinaspanmi Joseyta presocharuspan reypa presonkunapa kasqan carcelman churarurqa.

²¹Ichaqa Tayta Diosmi Joseywan karqa hinaspam kuyapayarqa, carcelpi kamachikuqwanpas allinpaqmi qawachirqa.

²²Chaymi carcelpi kamachikuqqa llapallan presokunata Joseyman kunaykurqa nanachikunanpaq, hinaptinmi payña presokunata kamachirqa.

²³Carcelpi kamachikuqmi Joseyman kunaykusqan punchawmanta manaña preocupakurqañachu Joseywan Dios kasqanrayku. Tayta Dios yanapaptinmi tukuy ima ruwasqanpas allin karqa.