Read Biblia Revisión Chuya Qellqa 1992 – Chuya Qellqa 1992 Génesis 44 Bible Online

Génesis 44 - Biblia Revisión Chuya Qellqa 1992 – Chuya Qellqa 1992 bible

Génesis 44

¹Joseymi wasinpi mayordomonta kamachirqa: Kay runakunapa costalninman kawsayta hinamuy apay atinankukama, qollqe apamusqankutañataq kawsay rantisqanku qollqetawan kuskata sapakamapa costalninman churamuy.

²Sullkankupa costalninmanñataqmi qollqemanta vasoytawan kawsay rantinanpaq qollqetawan kuskata churanki, nispa. Chay mayordomom Joseypa imam nisqanta ruwarqa.

³Achkiramuptinmi chay runakunata asnonkunatawan aviarurqaku.

⁴Paykuna llaqtamanta lloqsiruspa manaraqpas karupi kachkaptinkum, mayordomonta José nirqa: Utqayman chay runakunata qatiy, hayparuspaykim paykunata ninki: “¿Imanasqataq allin ruwasuqnikichikta mana allinwan kutirachinkichik? ¿Imanasqataq qollqemanta vasonta suwaramurqankichik?

⁵¿Manachu chay vasoqa señorniypa tomanan hinaspa adivinanan vaso? ¡Kaytaqa manam allintachu ruwarunkichik!” nispa.

⁶Paykunata hayparuspanmi Joseypa imam yachachisqanta hina chay mayordomo nirqa.

⁷Hinaptinmi paykunañataq nirqaku: Señorllayku ¿imatataq kaytaqa niwankiku? Manam haykapipas ñoqaykuqa chaytaqa ruwaymankuchu.

⁸Qollqetaña costalniykupi tariruspapas Canaán lawmantaraqmi kutichimurqaniku. ¿Imaynataq patronnikipa wasinmantaqa qorintawan qollqentaqa suwakamuymanku karqa?

⁹Hukkaqniykupapi chay vasota tariruspaqa wañuchiyá, wakiqniykupas señorniykupa criadonyá kasaqku, nispanku.

¹⁰Chaymi mayordomo nirqa: Nisqaykichikman hinayá kachun. Pipapipas tariruptiyqa payllam criadoyqa kanqa, wakiqnikichikqa mana huchayuqmi kankichik, nispa.

¹¹Paykunañataqmi utqayman costalninkuta uraykachispanku sapakama kicharqaku.

¹²Chaymi piwi kaqmanta maskayta qallaykuspan sullka kaqpi tukurqa, hinaspam Benjaminpa costalninpi vasota tarirurqa.

¹³Tariruptinmi paykuna mana ima ruwakuyta atispa pachankuta llikiparqaku, hinaspam asnonkuman cargakuykuspa llaqtaman kutirqaku.

¹⁴Chayaruptinkum Joseyqa wasillanpiraq kachkasqa, chaymi Judaqa wawqenkunapiwan Joseypa ñawpaqninpi qonqoranpa kumuykurqaku.

¹⁵Hinaptinmi paykunata José nirqa: ¿Imatataq kayta ruwarunkichik? ¿Manachum yacharqankichik ñoqaqa adivinaq kasqayta? nispa.

¹⁶Chaymi Judá nirqa: Manam imatapas nikikumanñachu nitaqmi negakuytapas atiymankuñachu. Mana allin ruwasqaykutam Dios rikurirachin. Chaynaqa, makikipiñam kaniku, vasoyki apaqpiwan kuska qamllataña servinaykupaq, nispa.

¹⁷Hinaptinmi José nirqa: Manam chaynatachu ruwasaq, copa apaqllam criadoyqa kanqa, qamkunañataqmi taytaykichikpa wasinman hawkalla kutikunkichik, nispa.

¹⁸Chaymi Judaqa Joseyman asuykuspan nirqa: ¡Señorlláy! Ama hina kaspaykiyá kay serviqllaykipa rimariyninta uyariykullaway. Amayá piñakuykuychu, qamqa kanki rey Faraón hinam.

¹⁹Señorlláy, qanmi tapuwarqankiku: “¿Taytaykichik chaynataq wawqekichik kanraqchu?” nispayki.

²⁰Hinaptinmi nirqaykiku: Arí taytaykuqa kawsakunraqmi, ichaqa yuyaqñam. Kantaqmi sullka wawqeykupas; paytam taytayku yuyaqyayninpiña churyakurqa. Nirqaykikutaqmi chay churintaqa taytaykupa ancha kuyasqantapas, anchataqa kuyan warmin Raquelpi iskaylla churinkuna kasqanraykum, chay iskaymantam mayor kaq wañukurqa, nispayku.

²¹Qamñataqmi kay serviqllaykikunata niwarqankiku: “Chay warmata pusamuwaychik reqsinaypaq” nispayki.

²²Chaymi ñoqayku nirqaykiku: “Warmaqa manam taytanta saqemuyta atinmanchu, saqeramuptinqa wañurunmanchá” nispayku.

²³Hinaptinmi kay serviqllaykikunata niwarqankiku: “Sullka wawqekichikta mana pusamuspaqa amam kutimuwankichikchu” nispayki.

²⁴Taytaykuman chayaruspa niwasqaykikuta hina willaptiykum,

²⁵taytayku niwarqaku: “Kutispayá ñoqanchikpaq asllatapas kawsayta rantimuychik” nispa.

²⁶Ñoqaykuñataqmi nirqaniku: “Manam riymankuchu sullka wawqeyku mana ñoqaykuwan riptinqa, paywanmi ichaqa risaqku, mana riptinqa chay señormanqa manam rikuriymankuchu” nispayku.

²⁷Chaymi taytayku niwarqaku: “Qamkunaqa yachankichikmi warmiy Raquelqa iskay wawayuqlla kasqanta.

²⁸Hukninmi ladoymanta lloqsirqa hinaspam kunankama mana kutiykamunchu, ima purun animalchá llikiparurqa.

²⁹Kunan huknintapas ladoymanta pusaruptikichik imapas pasaruptinqa qamkunapa hawaykichikpim waqachkaspalla yuyaqyayniypi wañurusaq” nispa.

³⁰Chaynaqa, señorllayku, taytaykuqa warmanraykum kawsachkan. Kunan taytaykuman mana warmayuq kutiykuptiykuqa,

³¹watukuykuspachiki wañurunqa, ñoqaykuñataq huchayuq kasaqku yuyaq taytayku waqasqallanpi wañukuptinqa.

³²Kay warmataqa ñoqa serviqllaykim taytanpa qayllanmanta pusamurqani, “mana kutichimuspayqa ñoqam wiñaypaq huchayuq kasaq” nispay.

³³Chayraykum mañakuyki ñoqaña criadoyki hina qepanaypaq, warmañataqyá wawqeykunawan kutichun.

³⁴¿Imaynataq mana warmantinqa taytayman kutiykuyman? Manam munaymanchu taytayta imapas pasarunantaqa, nispa.