Read Biblia Revisión Chuya Qellqa 1992 – Chuya Qellqa 1992 Génesis 49 Bible Online

Génesis 49 - Biblia Revisión Chuya Qellqa 1992 – Chuya Qellqa 1992 bible

Génesis 49

¹Churinkunata qayaykuspam Jacob nirqa: Huñunakamuychik, hamuq punchawkunapi imayna kanaykichikmanta willasqaykichik.

²Jacobpa churinkuna, huñunakamuychik taytaykichik Israelta uyarinaykichikpaq.

³Rubén, qamqa piwi churiymi kanki, atiyniywan kallpaypa qallariyninmi kanki. Hatunchasqa hinaspa atiyniyuqmi kanki.

⁴Lloqlla hina mana harkay atinam kanki, manañam piwi churiyñachu kanki, taytaykipa churiwachan warmiwan puñuruspayki camaytapas qanrachasqaykimanta.

⁵Simeonwan Leviyqa wawqentinmi kanku, armankupas mana allinkuna ruwanallankupaqmi.

⁶Huñunakuyninkumanpas manam yaykuymanchu, paykunawanqa espirituypas manam hukllawakunmanchu. Piñakuyninkupim runata wañuchirqaku, caprichakuspankum toropa ankunta kuchurqaku.

⁷Piñakuyninkupas ñakasqa kachun, mana llakipayakuq kayninkupas ñakasqa kachun, Jacobpa mirayninkuna ukupim mirayninkunata rakinasaq. Israel nacionpim mirayninkunata cheqechisaq.

⁸Judá, wawqekikunam qamta alabasunki, enemigoykikunatam kunkanmanta hapinki, wawqekikunam ñawpaqnikipi kumuykunqaku.

⁹Churilláy Judá, uña león hinam qamqa kanki, hapimusqaykiwan saksaspam waqtapanki. Hatun león hinaraq kurkuykuspa siriykuptiki ¿pitaq rikchachisunkiman?

¹⁰Manam pipas Judapa atiynin qechuyta atinqachu, dueño hamunankamam makinpi varatapas mana qechunqakuchu, payllatañam lliw runakunapas kasunqaku.

¹¹Uvas sachamanmi malta asnonta wataykunqa, uvaspa ikllipanmanmi uña asnochanta wataykunqa; vinowanmi payqa pachantapas taqsanqa, uvaspa yakunwanmi capantapas taqsanqa.

¹²Vinomantapas aswan pukam ñawinkunaqa, lechemantapas aswan yuraqmi kirunkunapas.

¹³Zabulonmi lamar qochapa patanpi yachanqa, chaypim barcokunapa sayanan kanqa; linderonñataqmi Sidón llaqtakama chayanqa.

¹⁴Isacarqa kallpan huntasqa asno hinam, payqa corralninpi waqtapaq asno hinam.

¹⁵Samakuyqa allin kasqanta rikuspam, chaynataq allpapa sumaqllaña kasqanta rikuspam, wasanta kurkuykachispan qepita aparqa, criado hinam hukpaq llamkarqa.

¹⁶Danqa Israelpa huknin ayllun hinam castankunata allinta kamachinqa.

¹⁷Payqa ñanpa patanpi maqta urum, pasaq caballokunapa ankunta kachuspam silladakunata saqtachin.

¹⁸Diosnilláy, salvaykuwanaykitam suyachkani.

¹⁹Gadqa atacasqam kanqa, chaymantam paypas kutichikuspa vencenqa.

²⁰Aserpa tantanqa miskillañam kanqa, reykunamanpas miskillaña mikuytam qonqa.

²¹Neftaliyqa munasqanpi purikuq tarukam, kuyayllapaq uñakunatam wachakunqa.

²²Joseyqa yakupa patanpi rurusapallaña sacham, kallmankunapas perqapa hawantam mastarikun.

²³Payta cheqnikuspankum flechakunawan flechamunku, yuya-yuyarispam paytaqa kamimunku.

²⁴Chaywanpas Joseyqa flechanantam allinta takyachin, brazonkunatapas allin niqtam kallpanchan, chaynataqa ruwanqa Jacobpa atiyniyuq Diosninraykum, Israelpa michiqnin Diosninraykum, Israelpa harkaqnin Diosninraykum.

²⁵Taytaykipa Diosninmi yanapasunki, Tukuy Atiyniyuq Diosmi bendecisunki, cielokunapi kaqkunawan, lamar qochapi kaqkunawanmi bendecisunki. Warmikitapas achka wawakunawanmi bendecinqa.

²⁶Taytaykunapa bendeciwasqanmantapas mastaraqmi bendecichkayki, wiñaypaq kaq orqokunamantapas mastaraqmi bendecichkayki, Joseypa umanpiyá kay bendicionkuna wiñaypaq kachun, qamqa wawqekikunamanta akllasqam karqanki.

²⁷Benjaminqa qechukuq atoqmi, achikyaramuptin hapimusqanta mikuqmi, tardeykuruptin qechumusqanta rakinaqmi.

²⁸Kaykunam Israelpa mirayninmanta chunka iskayniyuq ayllukuna. Paykunatam sapakamata taytanku bendeciykurqa.

²⁹Churinkunata kamachispanmi Jacob nirqa: Wañukuptiyqa ñawpaq taytaykunapa pampakusqanpim pampawankichik. Paykunaqa Het casta Efronpa chakranpi kaq machaypim pampakurqaku.

³⁰Chay machayqa kachkan Canaán law Mamrepa chimpan Macpela chakrapim. Chay machaytam Abraham rantirqa Het casta Efronmanta, mirayninkuna chaypi pampakunanpaq.

³¹Chay machaypim pamparqaku: Abrahamta, warmin Sarata, Isaacta, warmin Rebecata chaynallataq Leatapas.

³²Chay chakrawan machayqa Hetpa mirayninkunamanta rantisqanmi karqa, nispa.

³³Churinkunaman kamachikuykunata niykuspanmi, waqtapaykuspa Jacob wañukurqa, hinaspam ñawpaq taytankunapa kasqanman huñukuykurqa.