Read Biblia Revisión Chuya Qellqa 1992 – Chuya Qellqa 1992 Génesis 5 Bible Online

Génesis 5 - Biblia Revisión Chuya Qellqa 1992 – Chuya Qellqa 1992 bible

Génesis 5

¹Kaykunam Adanpa mirayninkuna. Runata Dios unanchaspanqa kikinman rikchakuqtam unancharqa.

²Qaritawan warmitam unancharqa hinaspanmi bendeciykuspan chay punchaw paykunata “runa” nispa suticharqa.

³Adanqa pachak kimsa chunka watayuq kachkaptinmi payman rikchakuq huknin qari churin nacemurqa, paytam Setwan suticharqa.

⁴Setpa nacesqanmantam Adán pusaq pachak watataraq kawsarqa. Chay watakunapim qarikunata warmikunata churyarqa.

⁵Adanqa isqon pachak kimsa chunka watanpiñam wañukurqa.

⁶Setmi pachak pichqayuq watanpi kachkaspan Enosta churyarqa.

⁷Enospa nacesqanmantam Set kawsarqa pusaq pachak qanchisniyuq watataraq. Chay watakunapim qarikunata warmikunata churyarqa.

⁸Setqa isqon pachak chunka iskayniyuq watanpiñam wañukurqa.

⁹Enosmi isqon chunka watayuq kachkaspan Cainanta churyarqa.

¹⁰Cainanpa nacesqanmantam Enós pusaq pachak chunka pichqayuq watataraq kawsarqa. Chay watakunapim qarikunata warmikunata churyarqa.

¹¹Enosqa isqon pachak pichqayuq watanpiñam wañukurqa.

¹²Cainanmi qanchis chunka watayuq kachkaspan Mahalaleelta churyarurqa.

¹³Mahalaleelpa nacesqanmantam Cainán pusaq pachak tawa chunka watataraq kawsarqa. Chay watakunapim qarikunata warmikunata churyarqa.

¹⁴Cainanqa isqon pachak chunkayuq watanpiñam wañukurqa.

¹⁵Mahalaleelmi soqta chunka pichqayuq watanpi kachkaspan Jaredta churyarqa.

¹⁶Jaredpa nacesqanmantam Mahalaleel pusaq pachak kimsa chunka watataraq kawsarqa. Chay watakunapim qarikunata warmikunata churyarqa.

¹⁷Mahalaleelqa pusaq pachak isqon chunka pichqayuq watanpiñam wañukurqa.

¹⁸Jaredmi pachak soqta chunka iskayniyuq watanpi kachkaspan Enocta churyarqa.

¹⁹Enocpa nacesqanmantam Jaredqa pusaq pachak watataraq kawsarqa. Chay watakunapim qarikunata warmikunata churyarqa.

²⁰Jaredqa isqon pachak soqta chunka iskayniyuq watanpiñam wañukurqa.

²¹Enocmi soqta chunka pichqayuq watanpi kachkaspan Matusalenta churyarqa.

²²Matusalenpa nacesqanmantam Enoc kimsa pachak watataraq kawsarqa. Payqa Diospa munasqanman hinam kawsarqa. Chay watakunapim qarikunata warmikunata churyarqa.

²³Enocqa kimsa pachak soqta chunka pichqayuq watam kawsarqa.

²⁴Diospa munasqanman hina kawsasqanraykum Dios pusakuptin chinkarurqa.

²⁵Matusalenmi pachak pusaq chunka qanchisniyuq watanpi kachkaspan Lamecta churyarqa.

²⁶Lamecpa nacesqanmantam Matusalenqa qanchis pachak pusaq chunka iskayniyuq watataraq kawsarqa. Chay watakunapim qarikunata warmikunata churyarqa.

²⁷Matusalenqa isqon pachak soqta chunka isqonniyuq watanpiñam wañukurqa.

²⁸Lamecmi pachak pusaq chunka iskayniyuq watanpi kachkaspan huk qari wawata churyarqa.

²⁹Paytam [9]Noeywan sutichaspa nirqa: Paymi tukuy ima ruwayninchikmanta chaynallataq llapa llamkayninchikmanta samaykachiwasun, kay allpa Diospa ñakasqan kasqanrayku, nispa.

³⁰Noeypa nacesqanmantam Lamec pichqa pachak isqon chunka pichqayuq watataraq kawsarqa. Chay watakunapim qarikunata warmikunata churyarqa.

³¹Lamecqa qanchis pachak qanchis chunka qanchisniyuq watanpiñam wañukurqa.

³²Noeyqa pichqa pachak watayuq kachkaspanmi Semta, Camta hinaspa Jafetta churyarqa.