Read Biblia Revisión Chuya Qellqa 1992 – Chuya Qellqa 1992 Génesis 6 Bible Online

Génesis 6 - Biblia Revisión Chuya Qellqa 1992 – Chuya Qellqa 1992 bible

Génesis 6

¹Runakuna kay pachapi mirayta qallaykuptinkum warmi churinkupas nacemurqa.

²Diospa churinkunam, runakunapa warmi churinkuna kuyayllapaq kasqanta qawaykuspanku, munasqankuta akllakuykuspa casarakurqaku.

³Chaymi Tayta Dios nirqa: Manam wiñaypaqchu espirituyqa runakunapi kanqa, cheqaptapunipas payqa runallam, pachak iskay chunka watallatañam kawsanqa, nispa.

⁴ [10]Diospa churinkuna llapa runakunapa warmi churinkunawan casarakuptinkum, churinku nacemurqa paykunam karqaku llumpay hatun sayayniyuq runakuna. Paykunaqa ñawpaqmantapacham ancha reqsisqa hinaspa guerrapi peleaq kallpasapa runakuna karqaku.

⁵Tayta Diosmi qawarirqa kay pachapi runakuna llumpay mana allin ruwayllapiña kasqankuta, chaynallataq yuyaymanayninkupas sapa punchaw mana allin ruwayllamanña qokurusqanta.

⁶Chaymi runa ruwasqanmanta, Tayta Dios llumpayta pesakurqa, sonqonpipas anchatam llakikurqa.

⁷Chayraykum Tayta Dios nirqa: Kay pachapi unanchasqay runakunatam chinkarachisaq. Chaynataqmi uywa animalkunatawan purun animalkunatapas, qasqonpa puriq animalkunatawan alton pawaq animalkunatapas chinkachisaq. Pesakunim ruwasqaytapas, nispa.

⁸Noeytam ichaqa Tayta Dios allinpaq qawarqa.

⁹Kaymi Noeypa vidanmanta willakuy. Noeyqa karqa runamasinkunamantapas allin ruwaq runam, payqa mana faltayuq kaspam Diospa munasqanman hina kawsarqa.

¹⁰Noeypa churinkunam kimsa karqa: Sem, Cam hinaspa Jafet.

¹¹Diospa qayllanpim llapa runakuna paqwayta huchallikurqaku, chaymi kay pachaqa llumpay mana allinpa huntasqan karqa.

¹²Diosmi kay pachata qawamurqa huchapa llumpay intusqanta, llapa runam paqwayta huchaman qokururqaku,

¹³Chaymi Noeyta Dios nirqa: Kunanmi tantearuni llapa runakuna chinkachiyta, paykunapa huchanmantam kay pacha kaynaniraq tarikun. Chaynaqa, kay pachamantam puchukachisaq.

¹⁴Gofer sachamanta huk arcata ruway, ruwaytaq ukunpi cuartokunatapas hinaspa hawanta ukunta breawan llusiy, yaku mana yaykunanpaq.

¹⁵Kaynatam ruwanki: Arcapa largonmi kanqa pachak kimsa chunka pichqayuq metro, anchonñataqmi kanqa iskay chunka iskayniyuq metro parten, sayayninñataqmi kanqa chunka kimsayuq metro parten.

¹⁶Chay arcataqa ruwanki kimsa altosniyuqtam, ventanantañataqmi qatanmanta medio metro ukunpi ruwanki, punkuntapas waqtanpim ruwanki.

¹⁷Ñoqam kay pachaman sinchi parata kachaykamuspay pamparachisaq, chaynatam kay pachapi llapallan kawsaqkunata chinkachisaq. Manam chullapas puchunqachu.

¹⁸Qanwanmi ichaqa huk pactota ruwasaq. Chay arcamanmi yaykunki, yaykunqataqmi warmikipas chaynataq churikikunapas warmintinkama.

¹⁹Llapa animalkunatapas, castanman hinam parisnintintakama orqontin chinantinta arcaman yaykuchinki, chaynapi qanwan kuska kawsanankupaq.

²⁰Alton pawaqkunatapas, uywa animalkunatapas, allpapi qasqonpa puriqkunatapas castanman hinam parisnintintakama orqontin chinantinta yaykuchinki, qanwan kuska kawsanankupaq.

²¹Apaykunkitaqmi tukuy rikchaq mikuykunatapas, qamkuna mikunaykichikpaq chaynataq animalkunapa mikunanpaqpas.

²²Noeymi Diospa kamachisqanman hina lliwta ruwarqa.