Read Biblia Revisión Chuya Qellqa 1992 – Chuya Qellqa 1992 2 Samuel 1 Bible Online

2 Samuel 1 - Biblia Revisión Chuya Qellqa 1992 – Chuya Qellqa 1992 bible

2 Samuel 1

¹Saulpa wañukusqanpa qepantam, Amalec runakunata vencerusqanmanta David kutiramuspan, iskay punchawña Siclag llaqtapi kachkarqa.

²Hinaptinmi kimsa kaq punchawpi, Saulpa campamentonmanta huk runa llumpay llakisqa hamururqa, pachankunapas llikipasqa hinaspa allpallaña umayuq. Davidpa kasqanman chayaramuspanmi qayllanpi pampakama kumuykurqa.

³Chaymi David tapurqa: ¿Maymantataq hamuchkanki? nispa Payñataqmi nirqa: Israelpa campamentonmantam lluptiramuni, nispa.

⁴Hinaptinmi David tapurqa: ¿Imataq pasakurun? ¡Ama pakaspa lliwta willaykuway! nispa. Chay runañataqmi nirqa: Israelmi guerrapi vencerachikun, achkallañam wañurunku, wakinñataqmi lluptikunku. Saulwan churin Jonatanpas wañurunkum, nispa.

⁵Davidñataqmi tapurqa: ¿Imaynanpitaq yachanki Saulpas chaynataq Jonatanpas wañurusqantaqa? nispa.

⁶Hinaptinmi chay joven nirqa: Qonqayta Gilboa moqopi kachkaspaymi, Saulta lanzanpi tawnapakuchkaqta rikururqani chaynataq enemigo tropakunapas carretakunapi caballokunapi paypa kasqanman chayaykuchkaqtaña.

⁷Qepaman qawarimuspanmi Saúl rikuramuwaspan qayamuwarqa; ñoqañataqmi nirqani: ¿Imanantaq? nispay.

⁸Chaymi tapuwarqa: Qamqa ¿pitaq kanki? nispa. Hinaptinmi nirqani: Amalec ayllum kani, nispa.

⁹Chaymi niwarqa: “Ama hina kaspayki wañurachiway, herido kaspaymi ñakarichkani”, nispa.

¹⁰Hinaptiymi asuykuspay, wañuy patanpiña kasqanta qawaykuspay wañurachirqani. Umanpi coronatawan brazonpi brazaletetañataqmi hurqoykuspay qanman apamuchkayki, nispan.

¹¹Chayta uyariykuspanmi Davidqa runankunapiwan pachankuta llikiparqaku.

¹²Hinaspam Saulpa chaynataq churin Jonatanpa wañukusqanmanta, llumpayta waqaspanku tardeykuqkama ayunarqaku. Waqarqakutaqmi Tayta Diospa tropankuna vencesqa kasqanmantapas chaynataq Israel runakuna guerrapi wañusqankumantapas.

¹³Willaqnin joventam David nirqa: ¿Maymantataq qamqa kanki? nispa. Payñataqmi nirqa: Ñoqaqa huklaw llaqtayuq Amalecita castam kani, nispa.

¹⁴Davidñataqmi nirqa: ¿Imanasqataq Tayta Diospa akllasqan rey wañurachiyta mana manchakurqankichu? nispa.

¹⁵Chaymi hukkaqnin runanta qayaykuspan David nirqa: Asuykuspa wañuchiy, nispa. Hinaptinmi wañurachirqa.

¹⁶Wañunanpaq kachkaptinmi David nirqa: Wañuchisqaykimantam qamqa huchayuq kanki, qampunim nirqanki: “Tayta Diospa akllasqan reytam wañurachimuni”, nispayki.

¹⁷Saulpa chaynataq churin Jonatanpa wañukusqanmantam kay aya takita David takirqa.

¹⁸Judapa mirayninkunaman yachachinanpaqmi “flechana arcowan” sutiyuq kay aya takita kamachikurqa. Kay aya takiqa Jazerpa libronpi qellqasqam kachkan.

¹⁹¡Israel atiynikim wichirun, sumaq kaynikim orqokunapi tukurun! ¡Allinnin qari-qari soldadokunam wichirun!

²⁰Gat llaqtapiqa amam willakunkichikchu, Ascalón llaqtapa callenkunapiqa amam willakunkichikchu Filistea warmikunam kusikunmanku, Diosta mana reqsiq warmikunam kusikuymanta pawaykachanmanku.

²¹Gilboa orqokuna, hawaykimanqa amañayá sullapas nitaq parapas chayamuchunchu, allin ruruq chakrakunapas amañayá kachunchu, chaypim allinnin qari-qari soldadokunapa escudonta saruparurqaku, chaypim Saulpa escudonpa llipipipiynin tukururqa.

²²Jonatanpa arconqa wañuchiqpunim, Saulpa espadanpas wañuchiqpunim, kallpasapa qarikunata wañuchispam kutiykamuqku.

²³Saulwan Jonatanqa kuyachikuqmi karqaku, paykunaqa waylluchikuqmi karqaku, haykapipas manam rakinakurqakuchu, kuskankum wañukunkupas; ankakunamantapas mastaraqmi kallparqaku, leonkunamantapas aswan kallpasapam karqaku.

²⁴Israel warmikuna, Saulmanta waqaychik; suma-sumaq pachawan pachachisuqnikichikmanta, qori alhajakunawan pachaykichik adornaqmanta waqaychik.

²⁵¡Imaynamá allinnin qari-qari soldadokunaqa guerrapi wichirunku! ¡Orqoykikunapim Jonatanta wañurachirqaku!

²⁶Wawqelláy Jonatán, qanmantam llakisqa kachkani, wawqentin hinam llumpayta kuyanakurqanchik, warmikunapa kuyakuyninmantapas mastam kuyawarqanki.

²⁷¡Allinnin qari-qari runakunam wichirunku! ¡Guerrapi peleana armakunam ñutusqa rikurirun! nispa.