Read Biblia Revisión Chuya Qellqa 1992 – Chuya Qellqa 1992 1 Reyes 11 Bible Online

1 Reyes 11 - Biblia Revisión Chuya Qellqa 1992 – Chuya Qellqa 1992 bible

1 Reyes 11

¹Rey Salomonqa Faraonpa churinwan casado kachkaspapas huklaw nacionniyuq warmikunatapas casararqam, paykunam karqa: Moab, Amón, Edom, Sidón hinaspa Het casta warmikuna.

²Chay nacionniyuq runakunamantam Israelpa mirayninkunata Tayta Dios nirqa: Amam paykunawanqa hukllawakunkichikchu nitaqmi paykunapas qamkunawanqa casarakunqachu, yanqañataq diosninkuna qatiqtaña ruwarusunkichikman, nispa. Salomonmi ichaqa chay warmikunaman hukllawakururqa.

³Salomonpa warminkunaqa qanchis pachak reinakunam karqa, uywanakusqan warminkunañataqmi karqa kimsa pachak. Chay warminkunam Salomonpa sonqonta Tayta Diosmanta karuncharachirqa.

⁴Yuyaqyaruptinmi Salomonta chay warminkuna sapaq dioskunataña yupaychachirqaku, chaynapim payqa mana taytan David hinachu tukuy sonqonwan Tayta Diosman hapipakurqa.

⁵Aswanqa Sidón runakunapa Astoret idolotañam yupaycharqa, yupaycharqataqmi amonitakunapa millakuypaq Milcom idolotapas.

⁶Chaynapim Salomonqa Tayta Diospa qayllanpi mana allinkunata ruwarqa, manam taytan David hinachu Tayta Diosta kasukurqa.

⁷Hinaspanmi Jerusalenpa chimpan moqopi huk capillata ruwarachirqa Moab castakunapa yupaychanan millakuypaq Quemos idolopaq chaynataq Amonpa yupaychasqan millakuypaq Moloc idolopaqpas.

⁸Chaynallatam ruwarqa llapallan huklaw nacionniyuq warminkunapaqpas, hinaptinmi sapakama diosninkuman inciensota qontichispa sacrificiokunata ofreceqku.

⁹Chaymi Salomonpaq Tayta Dios piñakururqa, paymanta sonqon karunchakusqanrayku. Israelpa yupaychasqan Tayta Diosqa iskay kutitam payman rikurirqa,

¹⁰hinaspam kaynata kamachirqa: Amam huk dioskunataqa yupaychankichu nitaqmi qatinkichu. Ichaqa manam Tayta Diospa kamachisqanta kasukurqachu.

¹¹Chayraykum Salomonta Tayta Dios nirqa: Kaynata kawsaspa kamachisqay pactotawan yachachikuyniykunata mana kasukusqaykiraykum munaychakuynikita qanmanta qechuspay serviqnikimanña qoykusaq.

¹²Chaywanpas kawsanaykikamaqa kuyasqay taytayki Davidraykum mana qechusqaykichu, aswanqa churikimantañam qechusaq.

¹³Ichaqa manam llapallan naciontachu qechusaq, aswanqa serviqniy Davidraykum hinaspa ñoqapaq akllakusqay Jerusalenraykum huk aylluta churikiman qosaq, nispa.

¹⁴Tayta Diosmi Salomonpa contranpi hatarirachirqa Edom nacionpi reykunapa miraynin Hadadta.

¹⁵Edom nacionta David venceruptinmi, tropakunapa kamachiqnin Joab, guerrapi wañuqkunata pampaq rispan Edom nacionniyuq runakunata lliwta wañurachimurqa.

¹⁶Joabqa soqta killam Israel tropakunawan kuska chaypi qeparqa, Edom nacionpi llapa runakuna wañuchiyta tukunankama.

¹⁷Hadadmi ichaqa warmallaraq kachkaspan, taytanpa serviqnin Edom runakunawan kuska Egipto nacionman lluptirurqa.

¹⁸Madián lawmanta lloqsispankum Parán lawman chayarurqaku. Parán llaqtayuq runakunamanta wakinta huñuruspankum Egipto nacionpi rey Faraonpa kasqanman chayarurqaku, hinaptinmi Faraón qoykurqa wasita, mikuyta chaynataq chakratapas.

¹⁹Hadadmi Faraonwan anchata kuyarachikurqa, chayraykum Faraonqa warmin Tahpenespa ñañanwan Hadadta casararachirqa.

²⁰Tahpenespa ñañanmi Hadadpa churinta wachakururqa, chay wawatam Genubatwan suticharqaku. Chay wawatam reina Tahpenes uywarqa Faraonpa palacionpi wawankunatawan kuskata.

²¹Hadadmi Egipto nacionpi kachkaspan Davidpa wañukusqanmanta yacharurqa chaynataq llapa tropakunapa kamachiqnin Joabpa wañukusqantapas, chaymi Faraonta nirqa: Kachaykuway llaqtayman kutinaypaq, nispa.

²²Hinaptinmi Faraón nirqa: ¿Imataq kaypi pisisunki llaqtaykiman kutiyta munanaykipaq? nispa. Chaymi Hadad nirqa: Manam imapas pisiwanchu, ichaqa kutinaypaq kachaykuway, nispa.

²³Diosmi Eliadapa churin Rezonta Salomonpa contranpi hatarirachirqa, paymi Soba nacionpa reynin Hadad-ezerta servisqanmanta lluptirurqa.

²⁴Hinaspam Rezonqa, runakunata huñuruspa salteaqkunapa capitannin rikurirurqa. Soba nacionpi kaqkunata David wañuchiptinmi, Rezonqa Damasco llaqtaman ripukurqa, chaypim reyninkupaq payta churarurqaku.

²⁵Chaymantapunim Rezonqa Israelpa enemigon rikurirurqa Salomonpa wañukunan punchawkama. Paypas Israel nacionpa contranpi Hadadpa ruwasqankunamanmi hukllawakururqa. Payqa Israel naciontam cheqnirqa, chaynataqmi Siria nacionpipas munaychakurqa.

²⁶Salomonpa serviqnin Sereda llaqtayuq Jeroboampas reypa contranpim hoqarikururqa. Jeroboamqa karqa Efraín casta Nabatpa churinmi, mamanñataqmi karqa Zerúa, payqa viudañam karqa.

²⁷Kayna kasqanraykum Jeroboamqa reypa contranpi hoqarikururqa: Salomonmi taytan “Davidpa Llaqtanpa” inti qespimunan lawpi wayqota allpawan huntachirqa.

²⁸Jeroboamqa kallpasapa allin llamkakuq runam karqa. Salomonmi allin llamkaq kasqanta qawaykuspan José ayllumanta kaq llamkaqkunapa kamachiqninpaq churarurqa.

²⁹Huk punchawmi Jeroboamqa Jerusalenmanta lloqsispan tuparurqa Silo llaqtayuq profeta Ahiaswan musoq capayuq richkaqwan. Iskayllanku campopi kachkaptinkum,

³⁰Ahiasqa churakusqan musoq capanta chunka iskayniyuq retazoman llikiparurqa,

³¹hinaspam Jeroboamta nirqa: Chunka retazokunata hapiy, Israelpa yupaychasqan Tayta Diosmi kaynata nin: “Ñoqam Salomonmanta qechusaq chunka ayllukunata hinaspam qanman qosqayki.

³²Salomonmanñataqmi, serviqniy Davidrayku chaynataq Israelpa llapallan llaqtakunamanta akllakusqay Jerusalenrayku huk ayllullata saqesaq.

³³Chaynataqa ruwasaq qepanchakuruwaspan Sidón llaqtayuq runakunapa yupaychasqan Astoret idolotawan, moabitakunapa yupaychasqan Quemos idolota chaynataq amonitakunapa yupaychasqan Moloc idolotaña yupaychasqanraykum. Payqa manam taytan David hinachu munasqayman hina kawsaspa kamachikuykuna yachachikuykuna qosqayta kasukurqa.

³⁴Chaywanpas Salomonmantaqa manam qechusaqraqchu, payqa akllakusqay serviqniy Davidraykum wañunankama munaychakunqa, Davidqa kamachikuyniykunata hinaspa yachachikuyniykunatam waqaycharqa.

³⁵Salomonpa churinmanta qechuspaymi chunka ayllukunata qanman qosqayki.

³⁶Salomonpa churinmanñataqmi huk ayllullata qosaq, chaynapi serviqniy Davidpa achkiynin qayllaymanta Jerusalén llaqtapi mana chinkarunanpaq, chay llaqtatam akllakurqani chaypi sutiy reqsisqa kananpaq.

³⁷Ñoqam qamta Israel nacionpi munaychakunaykipaq churasqayki, chaynapi llapa llaqtakunapi munasqaykiman hina munaychakunaykipaq.

³⁸Sichum kamachikuyniykunata yachachikuyniykunata kasukunki hinaspa munasqayman hina kawsaspa serviqniy David hina allinta ruwaptikiqa, ñoqam yanapasqayki, Davidpa munaychakuyninta hinam munaychakuynikitapas takyachisaq, Israel naciontapas makikimanmi churasaq,

³⁹hinaspam Davidpa mirayninkunatapas ñakarichisaq, ichaqa manam wiñaypaqchu”, nispa.

⁴⁰Chayraykum Salomonqa Jeroboamta wañurachiyta munarqa, Jeroboammi ichaqa Egipto nacionpi rey Sisacpaman ayqekurqa hinaspa Salomón wañunankama chaypi yachamurqa.

⁴¹Salomonpa wakin ruwasqankunapas, yachayninpas, imaynam kawsasqanpas, Salomonpa ruwayninkunamanta willakuq libropi qellqasqam kachkan.

⁴²Rey Salomonmi Jerusalén llaqtapi yachaspa lliw Israel nacionpi tawa chunka wata munaychakurqa.

⁴³Salomón wañuruptinmi taytan “Davidpa Llaqtanpi” pamparurqaku. Paypa rantinpim churin Roboamña munaychakurqa.