Read Biblia Revisión Chuya Qellqa 1992 – Chuya Qellqa 1992 1 Reyes 2 Bible Online

1 Reyes 2 - Biblia Revisión Chuya Qellqa 1992 – Chuya Qellqa 1992 bible

1 Reyes 2

¹Davidpa wañukunan punchaw hichpamuptinmi, churin Salomonta kunaspan nirqa:

²Ñoqaqa wañukusaqñam chaynaqa kallpanchakuspayá qarinchakuy.

³Tayta Diospa munasqanman hina kawsaspayá yachachikuyninkunata, kamachikuyninkunata, decretonkunata hinaspa estatutokunata kasukuy, imaynam Moisespa qellqasqan libropi kasqanman hina. Chaynata kawsaspaqa mayman risqaykipas ima ruwasqaykipas allinmi lloqsinqa.

⁴Tayta Diosmi prometewasqanta cumplinqa, paymi kaynata niwarqa: “Sichum miraynikikuna ñoqamanta mana rakikuspa nisqaykunata tukuy sonqonwan hinaspa tukuy almanwan kasukuspa kawsaptinkuqa, manam faltanqachu qampa miraynikikunamanta Israel nacionpi munaychakuq”, nispa.

⁵ Qamqa yachankiñam Sarviapa wawan Joabpa imam ruwawasqantapas, paymi Israelpa tropankunapa kamachiqninkunata wañurachirqa: Nerpa churin Abnertawan Jeterpa churin Amasata. Paykunataqa manam guerra tiempopichu wañurachirqa, paykunapa yawarninwanmi weqaw watakunaytawan usutaytapas yawarcharurqa.

⁶Chaynaqa, yachaywanyá ruway, amayá machuyanankamaqa saqeychu, wañuchinkipunim.

⁷Galaad lawmanta kaq Barzilaipa mirayninkunatam ichaqa kuyapayarinki, paykunaqa palacioykipim qanwan kuska mikunqaku, wawqeki Absalonmanta lluptiptiymi paykunaqa yanapaykuwarqaku.

⁸Qanwantaqmi kachkan Bahurim lawpi yachaq Benjamín ayllumanta kaq Gerapa churin Simeipas, paymi Mahanaim llaqtaman richkaptiy hatun ñakaywan ñakawarqa. Kutimuptiymi ichaqa Jordán mayuman taripamuwaspa chaskiykuwarqa, chaymi Diosrayku jurarqani: “Manam wañuchisqaykichu”, nispay.

⁹Chaywanpas qamqa amam pampachankichu; yuyayniyuq runam kanki, tanteasqaykiman hina ruwaspa wañuchiypuni, nispa.

¹⁰David wañukuptinmi llaqtanpi pamparurqaku.

¹¹Davidmi Israel nacionpi tawa chunka wata munaychakurqa: Qanchis watam Hebrón llaqtapi, kimsa chunka kimsayuq watañataqmi Jerusalén llaqtapi.

¹²Taytan David wañuruptinmi Salomonña munaychakurqa, paypa munaychakuyninqa allintam takyarqa.

¹³Chaymantam Salomonpa maman Betsabeyman Haguitpa wawan Adonías rirqa, chaymi Betsabé nirqa: ¿Allin sonqowanchu hamuchkanki? nispa. Adoniasñataqmi nirqa: Arí, allinllam, nispa.

¹⁴Chaymantam nirqa: Huk ninaymi kachkan, nispa. Betsabeyñataqmi nirqa: Imapas niwanayki kaptinqa niykuwayá, nispa.

¹⁵Adoniasñataqmi nirqa: Yachankim taytaypa rantinpi munaychakunaytaqa, Israelpa mirayninkunapas ñoqapa munaychakunaytam suyachkarqaku, ichaqa Tayta Diospa munasqanman hinam wawqey Salomonta munaychakunanpaq churarunku.

¹⁶Chaynaqa, mañakunaymi kachkan, amayá negaruwaychu, nispa. Chaymi Betsabé, nirqa: Rimariyá, nispa.

¹⁷Adoniasñataqmi nirqa: Ama hina kaspaykiyá rey Salomonta rimapayaykapuway Sunem llaqtayuq Abisagwan casarachiwananpaq, qamtaqa manam negasunkichu, nispa.

¹⁸Chaymi Betsabé, nirqa: Allinmi, niykusaqmi, nispa.

¹⁹Chaynapim Betsabeyqa Adoniaspa mañakuyninta nimunanpaq rey Salomonpa qayllanman rirqa. Rey Salomonñataqmi mamanta chaskinanpaq sayarispan qayllanpi kumuykurqa. Ñataq tiyaykuspanmi tiyanata mamanpaq apachimurqa, chaymi reypa alleqninpi tiyaykuspan

²⁰nirqa: Taksa mañakuyniymi kachkan, amamá negaykuwankichu, nispa. Chaymi rey Salomón nirqa: Mamay, imataña mañawaptikipas qoykusqaykim, nispa.

²¹Hinaptinmi maman nirqa: Sunem llaqtayuq Abisagwanyá wawqeki Adoniasta casararachiy, nispa.

²²Hinaptinmi mamanta Salomón nirqa: ¿Imanasqataq Sunem llaqtayuq Abisagta Adoniaswan casarachinayta munanki? Chaynaqa, munaychakuyniytawanyá paypaq mañakuruway. Payqa mayor wawqey kasqanraykum munaychakuyniy qechuwayta maskachkan, chaypaqmi sacerdote Abiatarwan chaynataq Sarviapa wawan Joabwan hukllawakurun, nispa.

²³Chaynata nispanmi rey Salomonqa Tayta Diosrayku jurarqa: Tayta Diosyá llumpayta castigawachun, kay mañakusqanmanta Adoniasta mana wañuchiptiyqa.

²⁴Taytay Davidpa munaychakunan tiyananpi churawaspan takyachiwananpaq prometewaqniy Tayta Diospa sutinpim jurani, kunanpunim Adonías wañunqa, nispa.

²⁵Hinaspam Joiadapa churin Benaiata kachaptin Adoniasta wañurachimurqa.

²⁶Chaymantam sacerdote Abiatarta rey Salomón nirqa: Anatot llaqtapi chakraykiman ripuy, wañunaykim yachakun, ichaqa Tayta Diospa Arcanta taytay Davidwan kuska apasqaykiraykum chaynataq taytaywan kuska ñakarisqaykiraykum mana wañuchisqaykichu, nispa.

²⁷Chaynatam Tayta Diospa sacerdoten Abiatarta rey Salomón qarqorurqa, chaynapim Eliypa mirayninpa contranpi Silo llaqtapi Diospa rimasqan cumplikurqa.

²⁸Joabqa Absalonwan mana hukllawakuchkaspapas ichaqa Adoniaswan kuskam hatarirqa, chayraykum chaykunata uyariruspan Tayta Diospa carpanman lluptikurqa chaypim altarpa waqrachankunaman hapikururqa.

²⁹Rey Salomonmanmi willaykurqaku Tayta Diospa carpanman Joab lluptiruspan altarpa waqtanpi kasqanta, hinaptinmi Joiadapa churin Benaiata kacharqa Joabta wañuchimunanpaq.

³⁰Chaymi Tayta Diospa carpanman yaykuruspan Benaía nirqa: Reymi lloqsinaykipaq kamachikamun, nispa. Joabñataqmi nirqa: Manam lloqsiymanchu, ñoqaqa kaypim wañukusaq, nispa. Hinaptinmi Benaía kutispan Joabpa nisqanta reyman willarqa.

³¹Chaymi rey Salomón nirqa: Munasqanman hina ruwaspaykiyá wañuchispayki pamparamuy, chaynapim ñoqamantawan taytaypa mirayninkunamanta mana huchayuq runakunata Joabpa wañuchisqan huchata chinkachinki.

³²Tayta Diosmi runakuna wañuchisqanmanta castiganqa, Joabqa taytay Davidpa mana yachasqantam allin sonqoyuq runakunata, Israelpa tropankuna kamachiq Nerpa churin Abnertawan Judapa tropankuna kamachiq Jeterpa churin Amasatapas wañurachirqa.

³³Chay ruwasqanmantam Joabwan mirayninkuna castigasqa kanqaku. Davidpa mirayninkunatawan wasinta chaynataq munaychakuynintam ichaqa Tayta Dios wiñaypaq takyachinqa, nispa.

³⁴Chaymi Benaía rispan Joabta wañurachimurqa. Hinaptinmi Joabta chunniq lawpi wasinman apaspa pamparurqaku.

³⁵Chaymi rey Salomonqa, Joiadapa rantinpi tropakunata kamachinanpaq Benaiataña churarqa, Sadoctañataqmi Abiatarpa rantinpi sacerdote kananpaq churarqa.

³⁶Chaymantam Simeita qayachispan rey Salomón nirqa: Jerusalén llaqtapi wasita ruwaspa chaypi yachakuy ichaqa amam maymanpas lloqsinkichu.

³⁷Sichum haykapipas Cedrón wayqota chimparuspaqa wañunkipunim, hinaspaqa kikikim huchayuq kanki, nispa.

³⁸Chaymi rey Salomonta Simei nirqa: Allinmi, qam reyniypa nisqaykiman hinam ruwasaq, nispa. Chaynapim Simeiqa Jerusalén llaqtapi unayta yacharqa.

³⁹Ichaqa kimsa wata pasaruptinmi Simeipa iskay criadonkuna, Gat llaqtapa reynin Maacapa churin Aquispaman lluptirurqaku. Chaytam Simeiman kaynata willaykurqaku: Criadoykikunaqa Gat llaqtapim kachkanku, nispanku.

⁴⁰Chaymi Simeiqa asnonta caronaykuspan Gat llaqtapi Aquispa wasinman rirqa, criadonkunata maskamunanpaq. Riruspanmi Simeiqa criadonkunata Gat llaqtamanta kutichimurqa.

⁴¹Simeipa Jerusalén llaqtamanta lloqsispa Gat llaqtamanta kutiramusqantam Salomonman willaykurqaku.

⁴²Chaymi rey Salomonqa Simeita qayachispan nirqa: ¿Manachum Tayta Diosrayku jurachispay nirqayki: “Kaymanta lloqsispaykiqa wañunkipunim” nispay? ¿Manachum qampas niwarqanki: “Allinmi niwasqaykiqa” nispa?

⁴³¿Imanasqataq Tayta Diosrayku jurasqaykita chaynataq kamachisqaytapas mana kasukurqankichu?

⁴⁴Sonqoykipim yachakunki taytay Davidpa contranpi mana allinkuna ruwasqaykita, chaynaqa Tayta Diosmi mana allin ruwasqaykimanta castigasunki.

⁴⁵Ñoqa rey Salomonmi ichaqa bendecisqa kasaq, hinaptinmi Tayta Diospa qayllanpi Davidpa munaychakuynin wiñaypaq takyachisqa kanqa, nispa.

⁴⁶Hinaspanmi Joiadapa churin Benaiata kamachirqa Simeita wañuchimunanpaq, chaymi rispan Simeita wañurachimurqa. Chaynatam Salomonqa allinta munaychakurqa.