Read Biblia Revisión Chuya Qellqa 1992 – Chuya Qellqa 1992 1 Reyes 21 Bible Online

1 Reyes 21 - Biblia Revisión Chuya Qellqa 1992 – Chuya Qellqa 1992 bible

1 Reyes 21

¹Jezreel llaqtayuq Nabotpam uvas huertan kapurqa. Chay huertaqa karqa Samaria llaqtapi rey Acabpa palacionpa waqtanpim.

²Chaymi Nabotta rey Acab nirqa: Palacioypa waqtanpi kasqanraykuyá uvas huertaykita qoykuway yuyukunata tarpunaypaq, chaypa rantinpim aswan allin uvas huertataña qosqayki, mana chayqa qollqeypaqyá rantikuruway, nispa.

³Chaymi rey Acabta Nabot nirqa: Amayá Tayta Diospas munachunchu ñawpaq taytaykunapa qowasqan tupaqniy allpata qanman qoykunaytaqa, nispa.

⁴Hinaptinmi rey Acabqa llakisqa hinaspa piñasqa palacionman kutikurqa, Jezreel llaqtayuq Nabotpa “ñawpaq taytaykunapa qowasqan herencia allpataqa manam qoykimanchu” nisqanwan. Palacionman chayaruspanmi camanman wischukuykurqa, hinaspam perqa lawman muyuriruspan mikuytapas mana munarqachu.

⁵Chaymi warmin Jezabel hamuruspan nirqa: ¿Imanasqataq llakisqa kachkanki hinaspa mikuytapas wischupakuchkanki? nispa.

⁶Acabñataqmi nirqa: Jezreel llaqtayuq Nabottam nirqani: “Uvas huertaykita rantikuruway, mana rantipi munaptikiqa chaypa rantinpim huk uvas huertata qosqayki” nispay, ichaqa manam qowayta munarqachu.

⁷Chaymi warmin Jezabel nirqa: ¿Manachu qamqa Israelpa reynin karqanki? Hatarispayki mikuy hinaspa kusikuy, Jezreel llaqtayuq Nabotpa uvas huertantaqa ñoqam qosqayki, nispa.

⁸Hinaspanmi reina Jezabelqa qosan Acabpa sutinpi cartakunata qellqaruspan sellonwan sellaruspan Nabotpa yachasqan llaqtapi ancianokunaman chaynataq ancha reqsisqa runakunaman aparachirqa.

⁹Chay cartapim kaynata nirqa: Ayunanankupaq runakunata kamachiychik hinaspa llapallaykichikpa qayllaykichikman Nabotta tiyachiychik.

¹⁰Iskay mana allin runakunatayá maskaychik paypa contranpi llullakuspa: “Diostawan reytam insultarqanki”, ninankupaq, hinaspam llaqtamanta hawaman pusaspaykichik rumiwan choqapaspa wañurachinkichik.

¹¹Chaymi Nabotpa llaqtanpi yachaq ancianokunawan ancha reqsisqa runakuna, Jezabelpa qellqasqan cartapa nisqanman hina ruwarqaku.

¹²Runakunata ayunopaq qayachispankum Nabottapas llapa runakunapa ñawpaqninpi tiyachirqaku.

¹³Chaymantam iskay mana allin runakuna hamuruspanku Nabotpa chimpanpi tiyaykurqaku, paykunam llullakuspanku runakunapa qayllanpi Nabotpa contranpi nirqaku: Nabotmi Diostawan reyta insultarun, nispanku. Chaymi llaqtamanta hawaman pusaruspanku rumiwan choqapaspa wañurachirqaku.

¹⁴Chaytam reina Jezabelman kaynata willachimurqaku: Nabottam rumiwan choqaspa wañurachinku, nispanku.

¹⁵Nabotta rumiwan wañurachisqankuta yacharuspanmi qosan Acabta Jezabel nirqa: Rispayki Jezreel llaqtayuq Nabotpa mana rantikuy munasusqayki huertanta hapikamuy. Payqa wañurunñam, manam kawsanñachu, nispa.

¹⁶Nabotpa wañurusqanta yacharuspanmi rey Acabqa uvas huertata hapikunanpaq rirqa.

¹⁷Chaymi Tisbe llaqtayuq Eliasta Tayta Dios nirqa:

¹⁸Samaria llaqtapi yachaq Israel nacionpa reynin Acabpa kasqanman riy, payqa Nabotpa uvas huertanpim kachkan, chay huertata hapikunanpaqmi uraykun.

¹⁹Hinaspam ninki, Tayta Diosmi kaynata nin: ¿Nabotta wañurachichkaspapas huertantawanraqchu hapikuykunki? Maypim Nabotpa yawarninta allqokuna llaqwasqanpim qampa yawarnikitapas allqokuna llaqwanqa, nispa.

²⁰Chaymi Eliasta rey Acab nirqa: Yaw, enemigoy ¿tariramuwankichu? nispa. Eliasñataqmi nirqa: Arí, tariramuykim, Tayta Diospa qayllanpim qamqa mana allin ruwayman qokurunki.

²¹Chaymi Tayta Dios kaynata nin: “Kunanmi qanman hatun ñakariyta apamusaq, hinaspam llapa miraynikikunata tukusaq. Israel ukumantam llapallan qari churikikunata chinkachisaq, criado kaqtapas chaynataq libre kaqtapas tukusaqmi, manam pipas puchunqachu.

²²Israel nacionta huchallichispa piñachiwasqaykiraykum, Nabatpa churin Jeroboampa mirayninkunatawan Ahiaspa churin Baasapa mirayninkunata hina qampa miraynikikunatapas chinkachisaq”.

²³Jezabelmantapas Tayta Diosqa kaynatam nin: “Jezreel llaqtapa murallanpa waqtanpim Jezabelta allqokuna mikunqa.

²⁴Acabpa ayllunkunamantam; llaqtapi wañuqkunata allqokuna mikunqa, campopi wañuqkunatañataq ullachkukuna mikunqa”, nispa.

²⁵Rey Acab hinaqa manam pipas karqachu, payqa warmin Jezabelpa umachasqanmi tukuy mana allinta Tayta Diospa qayllanpi ruwarqa.

²⁶Idolokunata qatispam millakuypaq huchakunata ruwarqa, amorreokunapa ruwasqanta hinam ruwarqa. Paykunatam Israelpa mirayninkunapa qayllanmanta Tayta Dios wischururqa.

²⁷Chaykunata uyariykuspanmi Acabqa pachanta llikiparurqa, hinaspam qachqa pachawan churakuruspa ayunarqa. Hina chay qachqa pachantillanmi puñurqapas, hinaspam llakisqallaña purirqa.

²⁸Chaymi Tisbe llaqtayuq Eliasta Tayta Dios nirqa:

²⁹¿Rikurqankichu qayllaypi Acabpa imaynam uchuychakusqanta? Qayllaypi uchuychakusqanraykum kawsanankamaqa mana castigasaqchu, aswanqa churinpa munaychakuyninpiñam castankunaman chay ñakariyta apamusaq, nispa.