Read Biblia Revisión Chuya Qellqa 1992 – Chuya Qellqa 1992 1 Reyes 6 Bible Online

1 Reyes 6 - Biblia Revisión Chuya Qellqa 1992 – Chuya Qellqa 1992 bible

1 Reyes 6

¹Israelpa mirayninkuna Egipto nacionmanta lloqsimusqanku tawa pachak pusaq chunka wataña pasaruptinmi otaq Salomón tawa wataña Israel nacionpi munayckakuchkaspanmi Ziv sutiyuq iskay kaq killapi Tayta Diospa templonta ruwayta qallarichirqa.

²Tayta Diospaq rey Salomonpa templo ruwachisqanpa largonmi karqa iskay chunka qanchisniyuq metro, anchonmi karqa isqon metro, sayayninñataqmi karqa chunka kimsayuq metro parten.

³Templopa corredorninpa largonmi karqa isqon metro, templopa anchonwan igual; chay corredorpa anchonñataqmi karqa tawa metro parten.

⁴Salomonmi kamachikurqa ventanakunaman rejillata churanankupaq.

⁵Ruwachirqataqmi muyuriqninpi temploman laqanasqa wasikunatapas, chay wasikunaqa hapichisqa karqa “Chuya” sutiyuq cuartopa hinaspa “Chuyay-chuyay” sutiyuq cuartopa muyuriqninmanmi.

⁶Sapa cuartopa anchonmi karqa iskay metro iskay chunka pichqayuq centímetro, altosninpa anchonñataqmi karqa iskay metro qanchis chunka centímetro, chay altospa altosninpa anchonñataqmi karqa kimsa metro chunka pichqayuq centímetro. Chaynataqa ruwarqaku templopa hawa lawninpi perqakunata menosyarachisqankuraykum, chaynapi qerukunata ustuchinankupaq wasipa perqanta manaña uchkunankupaq.

⁷Templota ruwanankupaqqa rumikunatapas labrasqatañam apamurqaku, chaynapim templota ruwaptinkuqa martillopa, cincelpa nitaq fierromanta herramientakunapa taqtaqyasqanpas manaña uyarikurqachu.

⁸Templopa waqtankunapi cuartokunaman yaykunapaq punkum templopa alleq lawninpi karqa. Chayninta yaykuspam gradasninta seqaqku punta kaq altosman hinaspa iskay kaq altosmanpas.

⁹Salomonmi Templota qespirachispan cedromanta qerukunawan hinaspa cedromanta tablakunawan qatachirqa.

¹⁰Templopa muyuriqninpipas cuartokunatam ruwachirqa iskay metro iskay chunka pichqayuq centímetro sayayniyuqtakama, chay cuartokunam temploman hapichisqa karqa cedromanta qerukunawan.

¹¹Hinaptinmi Salomonta Tayta Dios nirqa:

¹²Kay templota ruwapuwasqaykiraykum niki: Sichum kamachikuyniykunata hinaspa yachachikuyniykunata kasukuptikiqa taytayki Davidman kawsachkaptinraq qanmanta prometesqaykunatam cumplisaq;

¹³hinaspaymi Israelpa mirayninkunawan yachasaq, Israelpa mirayninkunataqa manam saqesaqchu, nispa.

¹⁴Salomonmi templo ruwayta tukururqa.

¹⁵Templopa uku perqankunatam pampanmanta qatankama cedro tablakunawan tableachirqa, pampantañataqmi ciprés tablakunawan tableachirqa.

¹⁶Templopa uku lawninpi “Chuyay-chuyay” sutiyuq cuartotapas pampanmanta qatankamam cedro tablakunawan tableachirqa, chay cuartopa largonmi karqa isqon metro.

¹⁷“Chuyay-chuyay” sutiyuq cuartopa ñawpaqninpim karqa huk hatun cuarto, largonmi karqa chunka pusaqniyuq metro.

¹⁸Templopa ukunmi cedro tablakunawan tableasqa karqa, chay tablakunapim tallarqaku purun calabazaman rikchakuq adornokunata, tallarqakutaqmi umpariq waytaman rikchakuq adornokunatapas. Lliwmi cedromanta ruwasqa karqa, manam ima rumipas rikurirqachu.

¹⁹Salomonmi templopa uku lawninpi “Chuyay-chuyay” sutiyuq cuartota allicharqa, Tayta Diospa pacto ruwasqan Arcata chayman churananpaq.

²⁰Uku lawpi kaq “Chuyay-chuyay” sutiyuq cuartopa largonmi karqa isqon metro, anchonpas sayayninpas isqon metrokamataqmi karqa. Chay cuartotam suma-sumaqta qoriwan llusichirqa. Chay cuartopa ñawpaqninpim cedromanta altarta ruwarqa, hinaspam qoriwan llusichirqa.

²¹Salomonqa templopa ukuntapas chaynataq “Chuyay-chuyay” sutiyuq cuartotapas qoriwanmi llusichirqa. “Chuyay-chuyay” sutiyuq cuartopa punkuntapas qorimanta cadenawanmi wichqarurqa.

²²Chaynaqa, lliw templotam qoriwan kuchun-kuchun llusichirqa; “Chuyay-chuyay” sutiyuq cuartopa ñawpaqninpi kaq altartapas qoriwanmi llusichirqa.

²³“Chuyay-chuyay” sutiyuq cuartopaqmi ruwachirqa aceitunas sachamanta iskay querubinkunata. Sapa querubinpa sayayninmi karqa tawa metro parten.

²⁴Chay querubinkunapa sapa rapranpa largonmi karqa iskay metro iskay chunka pichqayuq centimetrokama. Chaynapim huknin rapranpa puntanmanta huknin rapranpa puntankama karqa tawa metro parten.

²⁵Iskaynin querubinkunam chayna sayayniyuqkamalla karqaku, raprankupas sapakamapam tawa metro parten largoyuqkama karqa. Iskayninkum kaqkamalla karqaku.

²⁶Sayayninkupas karqa tawa metro partenkamam.

²⁷Chay querubinkunatam templopa uku lawninpi kaq “Chuyay-chuyay” sutiyuq cuartoman churarqa, chaynapim huknin querubinpa mastarisqa rapranpa puntan kaylaw perqaman tuparqa, hukninpa mastarisqa rapranñataqmi waklaw perqaman tuparqa, huknin raprankupa puntanñataqmi chay cuartopa chawpinpi tupanakurqa.

²⁸Salomonqa chay querubinkunatapas qoriwanmi llusirqa.

²⁹Templopa perqankunapipas, hawa lawpi uku lawpim tukuy rikchaq querubinkunata, palmerakunata hinaspa umpaq waytakunata tallachirqa, tallachirqataqmi “Chuyay-chuyay” sutiyuq cuartopipas.

³⁰Templopa pampantapas qoriwanmi kuchun-kuchun llusichirqa.

³¹“Chuyay-chuyay” sutiyuq cuartoman yaykunapaqmi, aceitunas sachamanta punkukunata ruwachirqa, chay punkukunapa chakankunawan sayaqninkunam karqa pichqa esquinayuqkama.

³²Iskaynin punkukunam aceitunas sachamanta karqa. Chay tablakunapim tallachirqa querubinkunata, palmerakunata hinaspa umpaq waytakunata; tukuy chaykunatapas qoriwanmi llusichirqa. Querubinkunatapas palmerakunatapas qoriwanmi llusichirqa.

³³Templopa punkunpaqmi aceitunas sachamanta ruwachirqa tawa esquinayuq pilarkunata.

³⁴Iskaynin punkunkunañataqmi karqa ciprés tablakunamanta. Chay punkukunaqa muyuqllam karqa.

³⁵Chay punkukunapim querubinkunata, palmerakunata, umpaq waytakunata tallachirqa, hinaspam qoriwan llusichirqa.

³⁶Templopa uku lawninpi patiotapas labrasqa rumikunamantam ruwachirqa, sapa kimsa seqe rumikunapa hawanpim churachirqa huk seqeta cedromanta pilarkunata.

³⁷Tawa wataña Salomón munaychakuchkaptinmi Ziv sutiyuq killapi, Tayta Diospa templonpa cimientonkuna churayta qallarirqaku.

³⁸Chunka hukniyuq wataña Salomón munaychakuchkaptinmi, Bul sutiyuq pusaq kaq killapi qespirachirqaku. Planoman hinam tukuy imantinta ruwarurqaku. Qanchis watapim chay templota Salomón qespirachirqa.